Jon 12:34-46

³⁴Dabudine banaga a riuna, “Tauma tarawatu nopone kè kataiena da Tauwai yawasana tauna tokare e mia nonoḡana. Be yodi nemanama da kwa riuriuna, ‘Banaga Natunama tokare korosie tai dawe? Banaga Natunama inam aitau?’”

³⁵Be Yesu ya riuedina, “Taugu vutuna ami yanama, be taugu tokare nam taumi mate tà mia gurata. Vutuna aubainama yodi raḡan daumorine taumi inam yananama noponaḡa ko babarana. Inam kedane tadiwanawana tokare nam e rupu tawemi. Baninama aitauḡa tadiwanawana noponaḡa ta babababarana, taudi keda nam tima kitakitana, taudi ta naḡonaḡona aikedae ta tavana nam ti kataiena.

³⁶Taumi yana yodi ḡaromie e miamiana maika, naumeki da taumi yananama koi sumaḡena, inam raḡanine taumi tokare yana natunatunama ko tubuḡana.” Be Yesu na giuma yawai kovina, murine tauna ya gosedi be ya naḡo waimatapoviedina.

³⁷Yesu mataira toitoi Jius matedie ya voiedina, be taudi yaḡoro nam ti sumaḡena,

³⁸baninama peroveta Aisaia aba ya riuriuena nama a tubuḡana. Tauna umanama ya riuna, “Bada, aitau tokare ama giuma ei sumaḡe? Be aitau ḡarodie tokare am rewapanama kwai maḡatari?”

³⁹Be mate Aisaia gabu ḡesaune umanama ya riuna,

⁴⁰“Mamaitua taudi matedima be nuedima yai potedina, inam kedane taudi matedie nam aba sibo a kita, bo nuedie nam aba sibo a kataie da nuedima a vitaredi be sibo ei yawasanidi.”

⁴¹Aisaia nama ya riuna, baninama tauna kaite Yesu neneḡarinama ya kita be ya giuena.

⁴²Be yaḡoro banaga toitoi be Jius babadidima toitoi mate Yesu ai sumaḡena. Be taudi Parisi a nairedina, baninama deḡoda sinagog nopone be tima tavu dobiḡedi. Vutuna aubainama taudi nam ti maḡatara munaḡedina da taudi tauwai sumaḡa,

⁴³baninama taudi a ḡoeḡoena da Mamaitua sibo ya kawa saḡedina. Be adi ḡoana kauama inam sibo banaga taudi a kawa saḡedina.

⁴⁴Dabudine Yesu bonanama dosine ya riuna, “Banaga aitau taugu ewai sumaḡeguna, inam nam tauguḡa imawai sumaḡeguna, ibewa da tauriuporeguma mate ewai sumaḡena.

⁴⁵Be deḡoda aitau taugu ya kitaguna, inam tauriuporeguma kaite ya kitana.

⁴⁶Taugu è yovona dobu waiyananama aubainama. Be aitau taugu ewai sumaḡeguna, tauna tokare nam tadiwanawanae e mia.