Yuhaana 12:34-46

³⁴Himɓe ɓen toontii mo: «tawreeta batii: ‟Cuɓaaɗo maayataa abada. Noy baawirtaa ko wi'i Ɓii neɗɗo ettete?” Moy woni Ɓii neɗɗo on?»

³⁵Yeesu toontii ɓe: «Jaayŋol na'on caka mon, amma ɗum ɓooyataa. Jahee diga oon goodi jayŋol, gam to niwre juhu on. Gam jahoowo der niwre annaa to yahata.

³⁶Goonɗinee jayŋol diga oon goodi ŋol gam laatoɗon ɓiɓɓe jayŋol.» Ɓaawo Yeesu bati kaa ɗon, yawti suuɗoyii ɓe to woɗɗi.»

³⁷Baa no o waɗi kaayeefiiji ɗuuɗɗi yeeso maɓɓe, ɓe goonɗinay mo,

³⁸nunnun haala annabi Esaaya goonɗiri: «Joomiraawo, moy goonɗini lilal meeɗen? Moy Joomiraawo holli baawɗe mum?»

³⁹Esaaya wi'ii kade bo gam ume himɓe ɓen waawataa ko goonɗini:

⁴⁰«Alla wuminii ɓe, yoorinii ɓerne maɓɓe, gam to gite maɓɓe yi'u, to ɓerɗe maɓɓe faamu, to ɓe tuubu, to mi nyawtu ɓe bo.»

⁴¹Esaaya wi'u ɗum nun gam o yi'ii tedduŋal Yeesu, go o bati haala makko.

⁴²Amma baa hooreeɓe Yahuduuɓe ɗuuɓɓe goonɗinii Yeesu. Amma gam Farisaaɓe, ɓe kulii wurtingo ɗum, gam to ɓe burtinee e waajorde.

⁴³Gam ɓee jiɗi manoore himɓe ɓuri manoore Alla.

⁴⁴Yeesu towni daane, wi'i: «Goonɗinɗo am fu, min bane o goonɗini, amma lilɗo am nun o goonɗini.

⁴⁵Ji'uɗo am bo yi'ii liloyɗo am.

⁴⁶Mi warii e duuniyaaru, mii jayŋol, gam goonɗinɗo am fu to jooɗoo der niwre.