João 12:34-46

³⁴— Moisés ekawẽntup e'em: Cristo je'ũ g̃u―Deus emunaẽ, i. Soat em itabẽg̃ e'em, i. Imẽn Moisés ekawẽntup e'em — io'e ip ya'ĩjojo'ibiyũ. — Ẽn pit e'em “Soat wag̃o õn,” i, “Soat wag̃o subamuyu ip ce'ũ ãm,” i dak. Deus emunaẽ du soat wag̃o? — io'e ip Jesus pe.

³⁵— Õn kabiaap puxim — io'e. — Ojot ijodiat mutaybin am Deus ekawẽn — io'e. — Darem ma ijodi og̃uy eymutaybinbin. Okay eyetabun cuy epesop eyetabun put pima. Eyetabun cuy epesop ipiatpi'ajojoap pe eyjuap puxim. Kabiok tag̃ jekuku'ukayũ itaybit g̃u poma oceju iam. Imẽnpuxim itabut'ũmayũ itaybit g̃u ipiatpi'ajojoap kay oceju iam — Jesus o'e.

³⁶— Õn eyxe bima, eyetabun cuy epesop okay — io'e. — Eyetabun puje webekitkiyũm epesop. Kabia dag̃ jekuku'ukayũ buximayũm epesop. Ikẽrẽat mujurũg̃rũg̃'ug̃ g̃u epesop. Eyag̃uyisum epeku — io'e. Jesus o'jẽm adeayũ xewi iboam e buje.

³⁷Soat em ma Jesus wuywebe i'e ba'oreat mubapukpuk'uk osunuy adeayũ etabun. Inaka ibu'u jĩjã ip osodop jetabut am cekay.

³⁸Imẽn cuk adi o'tupmubararak Isaías'ũm kuyje―Deus ekawẽn muwẽnuwẽn'ukat'ũm: Kariwa, kawẽn icẽmat muwẽnuwẽn ocekukuku adeayũ be, i. Imẽnpit itabut g̃u ip o'e ocekawẽn kay, i. Soat podi ma a'õbaca ẽn iap iba'arẽm o'e cexe ip, i. Imẽn ibararak opop tup pe. Itabut g̃u ip o'e Jesus kay apẽn kuyjeayũ Isaías'ũm ekawẽn kay itabut'ũmap puxim.

³⁹Judeuyũ kukukayũ ibu'u o'e jetabut am Jesus kay, Isaías'ũm emudupmubararaktup e'eap puxim o'jebapuk cebe ip puye.

⁴⁰Imẽn Isaías'ũm ekawẽn: Deus iteyũ adeayũ o'yag̃uymubabi'ũm, i. Imẽnpuye itabut g̃u osodop ip, Deus a'õbacaap co ma'g̃u ip, i. Itabut g̃u osodop ip Deus ekawẽn co ma'g̃u ip, i. Ikẽrẽat mujurũg̃rũg̃ap o'jepere g̃u ip, i. Itabut g̃u osodop ip Deus kay ixe be ikẽrẽat uk am cebewi ip, i. Imẽn Isaías'ũm ekawẽn.

⁴¹Isaías'ũm iboam o'e kuyje Jesus soat podi ma idip iam itaybit puye. Imẽnpuye Jesus o'g̃uwẽnuwẽn.

⁴²Ade Judeuyũ kukukayũ oitabun ip Jesus kay. “Jesus kay ocetabut,” i'ũmg̃u bit e'em oekuku ip Fariseuyũ buxim jeparara pibun. Jetabucap muwẽnuwẽn g̃u ip oekuku Fariseuyũ be ixeyũ mujẽmap puxim Deus eju kawẽnwẽnap'a bewi.

⁴³Deus mucokcok pin g̃u ip osodop―ijodiat mucokcok pin acã. Fariseuyũ mucokcok pin ip osodop.

⁴⁴G̃ebuje Jesus o'jekawẽn adeayũ be. — Okay itabucayũ omudocat kay dak itabut ip — io'e.

⁴⁵— “Deus ipot teku” i'e'e'ukat “Deus o'g̃udot ijodi,” i'e'em tak.

⁴⁶Ijodi juk ojot Deus ekawẽn eymutaybin am. Okay itabucayũ ikẽrẽat mujurũg̃rũg̃ g̃u. Yag̃uyisum jeku ip — io'e. — Kabiok tag̃ jekuku'ukayũ buxim g̃u ip―kabia dag̃ jekuku'ukayũ buxim acã — io'e.