John 12:34-46

³⁴Me fulweg fapi girdi’ ni aram urngirad ni lungurad, “Motochiyel rodad e be yog ngodad ni fare Messiah e ra par nib fos ndariy n’umngin nap’an. Ere mang ni kamog ni en ni Fak e Girdi’ e thingar ni tining ngalang? I mini’ e cha’nir ni Fak e Girdi’?”

³⁵Me fulweg Jesus ngorad ni ga’ar, “Bayi par fare tamilang u fithik’med nib n’uw boch nap’an. N’en ni gimed be rin’ e ngam rin’ed ko ngiyal’ ni kabay e tamilang romed, nge dabi yib e lumor nga dakenmed; ya cha’ nma par u fithik’ e lumor e der nang e gin ni be sor ngay.

³⁶Ere nge mich u wun’med fare tamilang ko ngiyal’ ni kabay romed, nge yag ni mmanged girdi’en e re tamilang nem.” Nga tomuren nike yog Jesus e re bugithin ney me pagrad nge yan i mith rorad.

³⁷Yugu aram rogon nike ngongliy urngin e pi maang’ang ney u p’eowcherad, machane de mich Jesus u wun’rad,

³⁸ni fan e nge yib i m’ug nib riyul’ e tin ni yog Isaiah ni profet ni ga’ar: “Somol, i mini’ e ke mich u wan’ e thin rom ni kug weliyed? I mini’ e ke dag Somol gelngin ngak ke guy?”

³⁹Ireray fan nde yag ni nge mich Jesus u wun’rad ya ki yog Isaiah ni ga’ar:

⁴⁰“I Got e ke upunguy lan owcherad. ma ke ning lanin’rad, ya nge dabiyag ni guy owcherad ban’en, ma lanin’rad e dabiyag ni nge nang fan, ke ga’ar Got, gathi bay ra pigichealgad ngog ni ngug gol nagrad.”

⁴¹I yog Isaiah ni profet e re bugithin ney ni bochan e guy e fla’ab rok Jesus, me weliy murung’agen.

⁴²Machane yugu aram rogon ma bo’or e girdi’ nma yog e thin u Israel ni mich Jesus u wun’rad, machane bochan e pi Farise ma aram e de yag ni ngar weliyed rogon e leam rorad u fithik’ e girdi’, ni bochan e yad be magarnag nrichey minog ngorad ndab kur uned ngalan tafen e mu’ulung.

⁴³Ya kab t’uf rorad ni ngar fel’gad u laniyan’ e girdi’ ko bin ni ngar fel’gad u laniyan’ Got.

⁴⁴Me welthin Jesus ni ba ga’ laman ni ga’ar, “Cha’ nra gu mich u wan’ e gathi go’ gag e kug mich u wan’, ya ku errogon nike mich u wan’ e cha’ nike l’oegeg ku gub.

⁴⁵Ma cha’ nra guyeg, e ku errogon nike guy e cha’ nike l’oegeg ku gub.

⁴⁶Ku gub nga fayleng ni gag e tamilang, ni urngin e girdi’ ni gu ra mich u wun’rad e dab kur pired u fithik’ e lumor.