Yowan 12:34-46

³⁴Le nga di tooltool malala mai tina ngan tilongo, le tiyei ne, “Am nga lomam galanga be ger ke Maro iwete nen, be Kirisi in ole iyepe nen a tala. E nga yelei a kuwete be ole tiyitmaka Tool Moolmool ke Maro nga? Ngan Tool Moolmool ke Maro in sei?”

³⁵Motong la Yesu iwete nen, “Awete pang nen, lal mooloo tiap la be sul iken kataunu yang nga. Le sul be ikenen yang nen go nga, ngan kapa ye nunngana, a be nen ngan todo idukang be. Yesoo, kumata le tool be ipa todo lono nga, ngan ole lon galanga ye ni nangai yo be ipa pang ye i, in tiap.

³⁶Le nookoot nga ye kene yo sul tani in ikenen yang go nga, ngan katara lomim medana pang sul tani a be nen ngan kayei ben sul di natunu.” Yesu iwetewete pang di tooltool tina nen a imot, motong la iyege di sila tiyepe, inbe itarkoolene ye di a ipa a ila.

³⁷Yesu iyei kaiye mos alunu a iyei ben tarkilanga panga be di tooltool tikamata, bong titara lodi medana panga pitiap yege.

³⁸Ngan iyei nen nga, ngan le lo iyei betanga ke Maro koonoo yo Esai in iwodo nga, le itar kanono moolmool. Ngan Esai tani in iwete nen, “Tool Mai, sei be itara lono medana ye betanga kiam i, inbe sei be ikamata gurana kiong yo kupapos ye urata yo kuyei nga? Tool siap yege.” 

³⁹Ngan ye punu yo titara lodi medana pang Yesu ye tiap in nen, yesoo Esai iwodo betanga san mulu in iwete nen,

⁴⁰“Maro iyei matadi le tikamata ni tiap, inbe ipammata lodi le lodi galanga ye so siap. Ole nen ngan matadi nga tikamata so ye, inbe lodi galanga ye betanga punu, ngan ole tiportak lodi a timulu pang yau a be nen ngan akarata di le dook mata.” 

⁴¹Esai in iwete nen, yesoo ikamata be pang dama ni ngan gurana mai ke Yesu ole iyeie ene le ilo ete ke be di tooltool tipayiti ye, ngan la le iwete betanga nen ye nga.

⁴²Ye kene tani in di tooltool yo titara lodi medana pang Yesu nga, ngan kapala ngan di kuto maimai lapau. Bong titattadai di Paresi, le lodi be tipapos lo medana kidi tina ngan ila mallangana tiap, yesoo ole nen ngan di Paresi tigunkala di le ke be tilo rumu kidi Yuda ke gaongo in lono lo tiye di tigaua mulu tiap.

⁴³Ngan di Paresi tina ngan lodi pang dada yo be di tooltool tiyitmak edi ye, in mai san, bong lodi pang dada yo Maro be iyitmak edi ye, in tiap.

⁴⁴Motong la Yesu iwete le maimai nen, “Sei tool be itara lono medana pau nga, ngan ya in itara lono medana pau leu tiap, bong itara lono medana pang Tamak yo iwangau a asi i, in lapau.

⁴⁵Inbe sei tool yo ikamatau i, in ikamata Tamak yo iwangau a asi i.

⁴⁶Ngan au i asi ye tana i nga, ngan dawa ben sul, a be nen ngan di sema tooltool be titara lodi medana pau nga, ngan o ke be tiyepe ye ni todo lono mulu tiap.