Ayup 29

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ayup bayanini dawamlashturup mundaq dédi: —

²«Ah, ehwalim ilgiriki aylardikidek bolsidi, Tengri mendin xewer alghan künlerdikidek bolsidi!

³U chaghda Uning chirighi béshimgha nur chachqan, Uning yoruqluqi bilen qarangghuluqtin ötüp ketken bolattim!

⁴Bu ishlar men qiran waqtimda, Yeni Tengri chédirimda manga sirdash dost bolghan waqitta bolghanidi!

⁵Hemmige Qadir men bilen bille bolghan, Méning yash balilirim etrapimda bolghan;

⁶Méning basqan qedemlirim sériq maygha chömülgen; Yénimdiki tash men üchün zeytun may deryasi bolup aqqan;

⁷Sheher derwazisigha chiqqan waqtimda, Keng meydanda ornum teyyarlan'ghanda,

⁸Yashlar méni körüpla eyminip özlirini chetke alatti, Qérilar bolsa ornidin turatti,

⁹Shahzadilermu geptin toxtap, Qoli bilen aghzini étiwalatti.

¹⁰Aqsöngeklermu tinchlinip, Tilini tangliyigha chapliwalatti.

¹¹Qulaq sözümni anglisila, manga bext tileytti, Köz méni körsila manga yaxshi guwahliq béretti.

¹²Chünki men manga himaye bol dep yélin'ghan ézilgüchilerni, Panahsiz qalghan yétim-yésirlarnimu qutquzup turattim.

¹³Halak bolay dégen kishi manga bext tileytti; Men tul xotunning könglini shadlandurup naxsha yangratquzattim.

¹⁴Men heqqaniyliqni ton qilip kiyiwaldim, U méni öz gewdisi qildi. Adaletlikim manga yépincha hem selle bolghan.

¹⁵Men korgha köz bolattim, Tokurgha put bolattim.

¹⁶Yoqsullargha ata bolattim, Manga natonush kishining dewasinimu tekshürüp chiqattim.

¹⁷Men adaletsizning hinggayghan chishlirini chéqip tashlayttim, Oljisini chishliridin élip kétettim.

¹⁸Hem: «Méning künlirim qumdek köp bolup, Öz uwamda rahet ichide ölimen» deyttim;

¹⁹Hem: «Yiltizim sularghiche tartilip baridu, Shebnem pütün kéchiche shéximgha chapliship yatidu;

²⁰Shöhritim herdaim mende yéngilinip turidu, Qolumdiki oqyayim herdaim yéngi bolup turidu» deyttim.

²¹Ademler manga qulaq salatti, kütüp turatti; Nesihetlirini anglay dep süküt ichide turatti.

²²Men gep qilghandin kéyin ular qayta gep qilmaytti, Sözlirim ularning üstige shebnem bolup chüshetti.

²³Ular yamghurlarni kütkendek méni kütetti, Kishiler waqtida yaghqan «kéyinki yamghur»ni qarshi alghandek sözlirimni aghzini échip ichetti!

²⁴Ümidsizlen'ginide men ulargha qarap külümsireyttim, Yüzümdiki nurni ular yerge chüshurmeytti.

²⁵Men ulargha yolini tallap körsitip bérettim, Ularning arisida kattiwash bolup olturattim, Qoshunliri arisida turghan padishahdek yashayttim, Biraq buning bilen matem tutidighanlargha teselli yetküzgüchimu bolattim».