Job 29

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ne impelaus ni Job is menge lalag din,

²“Angin pezem ke edlikù is nenlavey he menge andew he zutun ebentayan e pa te Megbevayà,

³hein edteyawan din pa is ibayè ku zutun te kedhipanew ku ziyà te merusirem.

⁴Dutun te timpu he meupiya pa is kebpekesavuk ku, iyan is Megbevayà utew ku emiǥu, ne edtuvazan din is pemilya ku.

⁵Dutun he timpu ebpekiduma pa kedì is Mekeǥeǥehem he Megbevayà, wey zuma ku pa is menge anak ku.

⁶Dutun he timpu is menge vaka ku nekeveǥey te utew zekelà he ǥatas, is menge ulibu ku nekeveǥey te utew zekelà he lana.

⁷Emun edhendiyà a te pultahan te inged su edtampu a te ebpemendumala te inged dutun te kebmiting dan,

⁸ebpekilid is betan-en he menge maama emun egkeehè e zan ne ebpemenhitindeg is menge meǥurang te kedtahud kedì.

⁹Ebpereremek minsan is menge pengulu

¹⁰wey dungganen he menge etew emun egkeehè e zan.

¹¹Is minsan hentei he nekaahà etawa nekezineg kedì he egkaǥi, edalig kedì.

¹²Su edtevangan ku is menge pubri he mibpetavang kedì wey is menge ilu he wazà ebpeketavang kandan.

¹³Ebpenubtuvazan a te edserupatey he menge etew he netevangan ku, wey nelipey is balu he menge vahi he netevangan ku zaan.

¹⁴Layun ku edhimuwa is metazeng wey hustu; iring heini te visti wey tengkulu he idselu-ub ku.

¹⁵Nehimu a he mata te etew he nelakap wey paa te etew he nepigket.

¹⁶Nehimu a he amey te menge pubri; minsan is menge lumelengyawà, midtevangan ku te menge kasu zan.

¹⁷In-awè ku is gehem te lalung he menge etew ne midlibri ku is menge mibiktima zan.

¹⁸“Mid-isip ku he ebmeluǥayad is untung ku ne emun ebpatey ad egkeliǥuyan a te pemilya ku.

¹⁹Wey mid-isip ku he egkeiring a te melig-en he kayu he nendalid diyà te wahig he layun egkezehemuǥi is menge subpang din.

²⁰Layun a edeliǥa te menge etew wey layun a melig-en.

²¹Emun ebeǥey a te sambag ebpereremek is menge etew su ebpurung dan ebpemineg.

²²Emun ebpekepasad a he egkaǥi ne wazè dan en igkeuman su ereg en kandan is mibpengaǥi ku.

²³Ebpengenduyen dan is menge lalag ku iring te kebpengenduya zan te uzan. Utew zan heini egkesuati te ebpemineg.

²⁴Henduen be te kenè dan ebpeketuu emun egemenan ku sikandan; is melipayen he kedezagwey ku ebpekezasig kandan.

²⁵Ne iring a te pengulu su ebpenuruen ku sikandan te ereg he ebeelan dan. Ebpenguluwan ku sikandan te iring te kebpengulu te hadì te menge sundaru. Edlipayen ku sikandan emun egkeseeng dan.