Duku 9:31-62

³¹Kɛ̀ Kuyie nkó tikpetì bɛ̀ fitɛ́ kɛ̀ bɛ̀ ò nɑ̀ɑ́ nhò yóó kú mɛ̀ɛ̀ botí Sedisɑdɛmmu.

³²Piɛri nɛ̀ o nɛ́pobɛ̀ bɛ̀ do yɛ̃̀ nkɛ́duɔ́mu kɛ́nhenniní kɛ́yɑ̀ Yesu kó tikpetì nɛ̀ bɛnìtìbɛ̀ bɛ̀dɛ́bɛ̀ bɛ̀ɛ̀ do ò còḿmúnɛ̀.

³³Edii nɛ̀ Mɔyiisi, bɛ̀ ìtɛ́ dìì mɔ̀nnì kɛ̀ Piɛrii nɑ́kɛ́ Yesu kɛ dɔ̀: Dɛ̀ wennimu kɛ dò ntí mbo diɛ, ti bo dɔɔ̀ titouti tìtɑ̃ɑ̃ti, fɔ̃́ nkumɑ́ɑ̀, Mɔyiisi kutɛkù, Edii kutɛkù. (Piɛri do í yɛ̃́ ò nɑ̀ɑ́ nkɛ tú mù).

³⁴Ò kpɑɑ́ kɛ mɛ nnɑɑ́ nkɛ̀ diwɛtirì mɑrìi kɔtɛní kɛ́ bɛ̀ dɑ̀tínnɛ́, kɛ̀ kufɔ̃wɑɑ́ mpĩ́ nYesu tɑncɔ́ùmbɛ̀ bɛ̀ yɑ̀ dìì mɔ̀nnì diwɛtirì bɛ̀ dɑ̀tínnɛ́mɛ̀.

³⁵Kɛ̀ mɛtɑmmɛ̀ mɑmɛ̀ɛ yɛ̀nní diwɛtirì miɛkɛ kɛ tú: Yie nweè tu m birɛ n tɑ̃ɑ̃tɛ́ dɛ̀, nyíénnɛ̀ o kpɛti.

³⁶Bɛ̀ yóó keè dɛ kó mɛtɑmmɛ̀ kɛ̀ Yesu weè mɑ́ɑ̀ dɛ̀ kpɑɑ́. Dɛ kó yɛwe miɛkɛ kɛ̀ Yesu tɑncɔ́ùmbɛ̀ ndò yúóó bɛ̀ í nnɑ̀kɛ́ òmɔù bɛ̀ yɑ̀ dɛ̀.

³⁷Kɛ̀ dɛ̀ɛ wentɛ́ kɛ̀ bɛ̀ ncutiní ditɑ̃rì, kɛ̀ ditĩ̀nnìi diɛrìi kɔtɛní kɛ́co Yesu.

³⁸Kòo mɔùu kuɔ́nko ditĩ̀nnì cuokɛ̀ kɛ dɔ̀: Okótì, dɑɑtɛ m birɛ kpɛ́í! N dɛ̀ mɔ̀kɛ dɛmɑ́ɑ̀ ndi,

³⁹kɛ̀ dibɔɔ̀ mɑrì ɔ̃ɔ̃ dɛ̀ pĩ nkɛ̀ dɛ̀ nwúótí, kɛ̀ dì dɛ̀ kpékíi, kɛ̀ tinɔ́ntɔ̃ũpùùtì yìɛ̀ dɛ̀ nùù, bɑ́ dì bɑ́ɑ́ cɑ̃rikɛ kɛ́ítɛ́, kɛ́nyiti kɛ dɛ̀ fɛ̃́ũ mmɛdiɛ̀.

⁴⁰Kɛ̀ m bɑ́ntɛ̀ ɑ tɑncɔ́ùmbɛ̀ kɛ yɛ̃ mbɛ̀ɛ dì bɛ̀ti kɛ̀ bɛ̀ yĩɛ̃kɛ.

⁴¹Kɛ̀ Yesu bɛ́i nkɛ dɔ̀: Itookperí yɛmbɛ̀ díndi bɛ̀ɛ̀ dɔ̀ɔ̀ri mɛyɛi, míì yó nhɑ̃ kɛ di bonɑ̀ɑ̀? Míì yó nhɑ̃ kɛ di tɔɑɑ̀? Kɔtɛnní diɛ nhɑ birɛ.

⁴²Dɛbirɛ tɔ̀ɔ́nní dìì mɔ̀nnì Yesu borɛ̀, kɛ̀ dibɔɔ̀ dɛ̀ bɔ, nkɛ́ ndɛ̀ kpékíi, kɛ̀ Yesu pɛ́i ndibɔɔ̀ kɛ̀ dìi yɛ̀, kòo miɛkùnnɛ dɛbirɛ kɛ́ dɛ̀ duɔ́ ndɛ cicɛ.

⁴³Kɛ̀ dɛ̀ɛ di bɛnìtìbɛ̀ bɛmɔu, bɛ̀ yɑ̀mɛ̀ Kuyie nkpeńnìmɛ̀. Bɑ́ wè kòo nwúó nYesu dɔ̀ɔ̀ dɛ̀, kòo nɑ́kɛ́ o tɑncɔ́ùmbɛ̀ kɛ dɔ̀:

⁴⁴Mpĩ́nnɛ̀ mɛsɑ̀ɑ̀ n yóó mɛ̀ ndi nɑ́kɛ́ tìì nɑ́ɑǹtì: Bɛ̀ bo fítɛ́ Onìtìbirɛ.

⁴⁵Bɛ̀ mɛ nyí mbɑntɛ́ dɛ kó tinɑ́ɑǹtì tú mù, tì do sɔrimu kɛ̀ dɛɛ̀ nte kɛ̀ bɛ̀ í ntì bɑntɛ́, bɛ̀ mɛ nyí ndɑ̀ɑ́tí kɛ bekɛ́ Yesu.

⁴⁶Kɛ̀ Yesu tɑncɔ́ùmbɛ̀ɛ ítɛ́ tinɛìtì nɛ̀ bɛtɔbɛ̀ kɛ bo yɑ̀ bɛ miɛkɛ wèè dɛu.

⁴⁷Kɛ̀ Yesu bɑntɛ́ bɛ yɛ̀mmɛ̀ kɛ́dɛtɛní dɛbirɛ kɛ́cónnɛ́ o tɑkɛ́ kɛ́ bɛ̀ nɑ̀kɛ́ kɛ dɔ̀:

⁴⁸Wèè bo cɔutɛ́ dɛbirɛ diɛ n kpɛ́í, ò cɔutɛ́ mínwe, kɛ̀ wèè n cɔutɛ́, ò cɔutɛ́mu wèè n tɔ̃nní, kɛ yɛ̃́ wèè tu o sɑ́mpɔ́ù di cuokɛ̀ weè dɛu kɛ dì pɛ̃ɛ̃tɛ́.

⁴⁹Kɛ̀ Isɑ̃ɑ̃ nɑ́kɛ́ Yesu kɛ dɔ̀: Okótì ti yɑ̀ òmɔù nwe kòò bɛ̀tì yɛbɔkɛ̀ nɛ̀ ɑ yètìrì kɛ̀ ti ò bɑ̀ɑ, kɛ yɛ̃́ ò í ti wɛ̃ńnɛ̀mɛ̀.

⁵⁰Kɛ̀ Yesu ò tɛ̃̀ńnɛ́ kɛ dɔ̀: Di nɑ bɑ́ nhò bɑ̀ɑ kɛ yɛ̃́ wèè í yetɛ di kpɛti ò di wɛ̃ńnɛ̀mɛ̀mu.

⁵¹Dɛ̀ tɔ̀ɔ́tɛ́ dìì mɔ̀nnì Yesu bo dekɛmɛ̀ kɛĩ́nkɛ̀, kòo ítɛ́ nɛ̀ dikɔ̃m̀bùɔ̀ kɛ́nkɔri Sedisɑdɛmmu,

⁵²kɛ́tɔ̃ mbɛnìtìbɛ̀ kɛ̀ bɛ̀ɛ kɔtɛ Sɑmmɑrii kó dihɛì mɑrì kɛ bo tũntɛ ò yóó bɑ́tɛ́ dɛ̀.

⁵³Sɑmmɑrii kɔbɛ mɛ nyí nhò yie nhò kɔ̀ri mɛ̀ɛ̀ kpɛ́í Sedisɑdɛmmu.

⁵⁴Yesu tɑncɔ́ùmbɛ̀ Isɑku nɛ̀ Isɑ̃ɑ̃ bɛ̀ dɛ̀ yɑ̀ dìì mɔ̀nnì kɛ nɑ́kɛ́ Yesu kɛ dɔ̀: Ti Yiɛ̀ nhɑ dɔ́ kɛ̀ ti duɔ́ nkɛ̀ muhɑ̃ɑ̃́ ncútɛ́ní kɛĩ́nkɛ̀ kɛ́ bɛ̀ kùɔɑ̀?

⁵⁵Kɛ̀ Yesu wɛ̃ɛ̃tɛ kɛ́ bɛ̀ kpɑnnɛ̀ kɛ dɔ̀: Di í yɛ̃́ mɛyɛ̀mmɛ̀ mɛ̀ɛ̀ di tɔ kɛ̀ di nɑ́ɑ́ mmɛmmɛ.

⁵⁶Onìtìbirɛ í kɔ̀tɛní kɛ bo kuɔ bɛnìtìbɛ̀, dɛ̀ kɔ̀tɛní kɛ bo bɛ̀ dɛɛtɛ́mu. Ò bɛ̀ nɑ̀kɛ́ mɛmmɛ kɛ́deè kɛ̀ bɛ̀ɛ kɔtɛ dihɛì tɛrì.

⁵⁷Bɛ̀ kètɛ́ dìì mɔ̀nnì kòo mɔùu nɑ́kɛ́ Yesu kɛ dɔ̀: N yóó ndɑ tũmmu tipíìtì timɔu ɑ kɔri kɛ̀ɛ̀ bíɛ́kɛ̀.

⁵⁸Kɛ̀ Yesu ò tɛ̃̀ńnɛ́ kɛ dɔ̀: Ihɑ̃nkɛ́ mɔkɛmu i fɔ̃ti, kɛ̀ sinɔɔ mɔ̀kɛ tiyĩ́ɛ̃̀ntì, Onìtìbirɛ mɛ nyí mɔkɛ dɛ̀ bo duɔ́ dɛ̀ kɛ́om̀pɛ̀.

⁵⁹Kɛ nɑ́kɛ́ otɔù kɛ dɔ̀: N tũnnɛ̀. Kòo ò tɛ̃̀ńnɛ́ kɛ dɔ̀: Okótì, yóu kɛ̀ m mu nkɔtɛ kɛ́kũnnɛ́ n cicɛ kɛ́deè.

⁶⁰Kɛ̀ Yesu ò tɛ̃̀ńnɛ́ kɛ dɔ̀: Yóu kɛ̀ bɛcíríbɛ̀ɛ ńkũrì bɛcíríbɛ̀, kɛ̀ fɔ̃́ nkɔtɛ kɛ́nɑ́kɛ́ Kuyie nkpɑ̀ɑ̀tìyuu kpɛti.

⁶¹Kòo tɔù múnkɛɛ bɛ́i nkɛ dɔ̀: Okótì n yó ndɑ tũmmu nɛ́ yóu kɛ̀ n kò nkɛ́cɑu n cĩ́ɛ̃̀tɛ̀ kɔbɛ.

⁶²Kɛ̀ Yesu ò nɑ̀kɛ́ kɛ dɔ̀: Wèè dùɔ̀nɛ̀ dinɑɑkɑ̃ɑ̃̀ kɛ wɛ̃kɛ o fɔ̃nkúò dɛ yiɛ̀ mbɑ́ɑ́ nɑ kɛ́pĩ́ nKuyie nkpɑ̀ɑ̀tìyuu kó mutɔ̃mmú.