Lukaj 9:31-62

³¹Ira pwarado ni ara linan o mamajani duen a pan kamatala nan Ierujalem.

³²A Petruj o me ian i me toutouki mair. Ira lao pirida, re ap udial a linan o ol riamen kotikot impa.

³³Kadekadeo ira lao kotiwei jan re a, Petruj ap indan Iejuj: Main, meid mau atail kotikot met. Kit en kauada kijin im jilikij: Tanpaj ar, o en Mojej, o en Eliaj; a jaja me a kajokajoi.

³⁴Ni a kajokajoi mepukat, pali en dapok kadupal irail edi, irail ari majakadar ni ar tilon nan dapok o.

³⁵O nil eu peidido jan nan dapok o majani: Iet nai ol kompok, komail en ron i!

³⁶A nil wet lao wiauier, re ap diaradar Iejuj ta. Ir ari nenenlata; o ni ran oko re jota kaireki meamen duen me re kilaner.

³⁷A kadekadeo manda en ran o irail lao kotidido jan nana o, pokon kalaimun ap poto don i,

³⁸A kilan, ol amen nan pokon o nil laudeda potoan on: Jaunpadak, i poeki re ir, re kotin majani don ai tunol putak o, pwe iei ai ieroj.

³⁹Re kotin mani, nen o lao koledi i, a kin madan weriwer, a kin jenjeroki jili, a ap kin pudopud o meid apwal ni a kin koiei jan i.

⁴⁰Nai ari poeki ren japwilim ar tounpadak kan, ren kauje wei jan i, a re jota kak.

⁴¹A Iejuj kotin japen majani: O di wet meid jopojon o japun, ia arain ai pan mimi re omail? Ia arain ai pan kokoa komail? Wa don ia noum putak!

⁴²A ni a kokodo, tewil ap kapururada o jeroki jili i, a Iejuj kotin kidaueda nen jaut o, o kakelada putak o, ap kapure on i ren jam a.

⁴³A irail karoj puriamuiki manaman en Kot. A ni ar puriamuiki en Iejuj a wiawia kan ap kotin majani on japwilim a tounpadak kan:

⁴⁴Majan pukat en kaloledi nan jalon omail: Nain aramaj pan panala ni pa en aramaj.

⁴⁵A irail jota weweki majan wet, pwe a rir jan irail, i me irail jajaki. Irail ari majak kalelapok re a duen majan pot et.

⁴⁶Irail ap pil lamelame, ij me pan lapalap re ’rail?

⁴⁷A Iejuj lao kotin mani ar lamelam nan monion arail, ap ale jeri men, kida impa a,

⁴⁸O majani on irail: Meamen pan apwali kijin jeri men et ni ad ai, nan a kin apwali ia, a meamen pan apwali ia, nan a kin apwali, me kadar ia do; a me tikitik re omail, nan i me pan lapalapala.

⁴⁹Ioanej ap japen potoan on: Main, je kilaner amen, me kaujewei tewil akan ni mar ar. Kit ari inapwiedi, pwe a jota kin ian kit idedauen ir.

⁵⁰A Iejuj kotin majani on i: Eder inapiedi, pwe me jo kin palian komail, nan a kin ian komail.

⁵¹A kadekadeo a lao anjau, me a pan peukadala, a ap kotin jaupeilan kotilan inen won Ierujalem.

⁵²A kotin poronela men kadar akan, me pan tion mo a. Irail ari kokola lele don kijin kanim en Jamaria eu, pwen rapaki waja, me a pan pweiokidi ia.

⁵³A re jota kajamo i aki a kotin jaupeila kotilan inen won Ierujalem.

⁵⁴Japwilim a tounpadak kan Iakopuj o Ioanej lao kilaner mepukat, ap potoan on: Main, ma re kotin kupura, je pan poeki, kijiniai en moredi jan nanlan, kan irail la, duen Eliaj wiadar.

⁵⁵A i kotin jaupeido, kapun on ira majani: Koma jota aja ij Nen, me naina kin koma?

⁵⁶Irail ap daulul wei nan eu kijin kanim.

⁵⁷Kadekadeo ni arail kotikot kokodo amen ap potoan on i: Main i pan idedauen ir waja karoj me re pan kotila ia.

⁵⁸Iejuj kotin majani on i: Pokj akan por ar mia, o manpir en pan lan paj ar mia, a Nain aramaj jota waja en kaula wei mon a.

⁵⁹A kotin majani on amen: Idauen ia do! A i indada: Main, komui kotin mueid on ia maj, i en purela jarepedi jam ai.

⁶⁰A Iejuj kotin majani on i: Me melar akan en jarepedi ar melar akan, a koe kowei kalok jili wein Kot!

⁶¹Pil amen potoan: Main, i pan idedauen ir jili, a re kotin mueid on ia maj, i en kamurimuri on toun im ai.

⁶²A Iejuj kotin majani on i: Jota me pan koledi men weirada pwel, ap kilan muri, a jota koiok on wein Kot.