Luka 9:31-62

³¹isi se taumasaraha ma namanamarina, ia matena se ribaribaei, ia Ierusalema eai abo i hearo.

³²Na Petero, ma ana sasaguyao, matadi se enoeno: isi se siliata ena namanamari se ita, eo taudi labui wa maenayao se totoro, edi namanamari hinage se ita.

³³Taudi labui wa Iesu bena se laugabaei. Petero i ribalau Iesu arinai, i ene, “Tanuagagu e, i lolo inai mo ta mia: apa haiona ta abidi: esau enam, eo esau Mose enana, eo esau Elia enana:” na i ribariba gaibu.

³⁴Ma ribaribana eada esau i laoma i poitawaidi: isi se lulau eada wa boeana eai se matausi.

³⁵Na arina esau eada boeana eai i laoma, i ene, “Natuyogoyogoigu ede teina: ia au ataiei.”

³⁶Arina wa i lautom, Iesu se ita iabom ie mia. Isi se monomonouei, nei asubenadi eai ne ginauri se itadi wa nige tau esau se heriba.

³⁷Maraietom, oea tupina eai wa se letamao, tatao gamagaridi ia se laubagibagiei.

³⁸Tau esau, boeadi eai, i eogalau, i ene, “Tanuagagu e, ea awanorim ta, u italau natugu tau arinai, paana natueseesegagu mo.

³⁹Earua gama wa i toai, eo ma esega i eabayaba; eo tauna i abigogoi awana i gosagosapuro, eo i heamamna, i abigabaei, abo hinage i laubodauio.

⁴⁰Em heaheatayao ea awanoridi bena se aiduiei; isi nige abina se ata.”

⁴¹Iesu ia arinana i heuio, i ene, “Omi isi ta nige emi sunuma, eo ma awaeagaramiu, huia lohaloha eau maemiu, eo ea taubigaimiu wa? Hage natum wa u woeaima.”

⁴²Ia i laoma, ma launa, na demoni gama wa i helubiei, eo i abigogoi, Iesu earua biibiina wa i ribamataei, gama wa abo i hemauri, ia abo i moseuio tamana arinai.

⁴³Isi gamagaridi Eaubada ena gigibori lailai se noonooei. Ginauri gamagamagari Iesu i ginauridi wa, isi gamagaridi ma noonoodi, ie ribalau ena heaheata aridi eai, i ene,

⁴⁴“Teina ribadi ta taba se ludobi beamiu gudadi eai: paana Tau Natuna abo se moselaei tatao nimadi eai.”

⁴⁵Ena riba wa nige se nuatui, riba wa se ribayamui arinai nige se ita: riba wa hinage bena se oimuriei se matausi.

⁴⁶Haiawayagara esau ie tubu isi boeadi eai, si ene eai aridi eai abo i sae ariri.

⁴⁷Iesu edi nuatu i nuatulobai, merumeru gagirina ie abi, ia gegesina eai i hebawa.

⁴⁸Ie ribalau aridi eai, i ene, “Tau esau eo esau merumeru ta i oiami debagu eai ia i oiamigu hinage: tau esau eo esau i oiamigu tauhetamariguma hinage i oiami: paana ia gamagarimiu arimiu eai i gagiri konekone, ia abo i sae ariri ede.”

⁴⁹Ioane ia arinana i heuio, i ene, “Tanuagagu e, tau esau aie ita demoni i aiduiedi oa debam eai; ia ai ribanuahi paana ia nige i hemuriwataida.”

⁵⁰Iesu i ribalau ia arinai, i ene, “Ia tabu au ribanuahi: paana ede ia nige i hetataguduguduida ita enada meta.”

⁵¹Huiana i hanahanauma ia bena se abiisiniuioi, ia nuana esega mo bena i sae Ierusalema eai.

⁵²Ena tauwasa matana eai i hetamaridi: isi se lau abo se lulage Samaria tataodi edi eanua esau, ena abamia bena se abi nonohai.

⁵³Isi ia nige se oiami, paana ia nuana esega mo bena i sae Ierusalema eai.

⁵⁴Ena heaheata Iamesi eo Ioane teina se ita, si ene, “Guiau e, em nuatu saha, oeagi alaalasina abo ta lauhesom galewa eai i dobima tatao wa se alasiohi doha hinage Elia ena laulau wa?”

⁵⁵Ia abo i torobui, taudi labui i ribasuuidi, i ene, “Emi nuatu aniona nige au nuatui.

⁵⁶Paana Tau Natuna nige i laoma tatao bena i unuidi, na bena i hemauridi mo.” Isi abo se lau eanua esau.

⁵⁷Dobila eai ma laudi, tau esau i ribalau ia arinai, i ene, “Guiau e, em abalau gamagamagari eai abo ea hemuriwataim.”

⁵⁸Iesu i ribalau ia arinai, i ene, “Alope edi guda, eo malagaibu manudi edi noi; Tau Natuna uruna nige ena abaaiunuaena.”

⁵⁹I ribalau tau esau arinai, i ene, “U hemuriwataigu.” Ia mo i ene, “Guiau e, sora ea lau tamagu ea toretoretau baguna.”

⁶⁰Iesu i ribalau ia arinai, i ene, “Taumatemate enadi taumatemate abo se toretoretau: na oa mo u lau Eaubada ena basileia ribana u lauguguiaei.”

⁶¹Tau esau hinage i ene, “Guiau e, eau abo ea hemuriwataim; sora ea lau baguna egu numa tataodi ea lauaioniedi.”

⁶²Iesu i ribalau ia arinai, i ene, “Tau esau nimana i torelaei tano abagiagiarina gigina eai, eo taba i sinibui, Eaubada ena basileia taba nige i abi.”