Luk 9:31-62

³¹aŋɛ aŋc-nəŋk pəmot pa pəlel pa debeki da Kanu disrɛ mɔ. Ŋac-loku Yesu kəkɔ kɔn nkɛ kəŋkɔyi Yerusalɛm mɔ.

³²Tɛtəŋnɛ Piyɛr k’asol ɔn ŋac-dirɛ pəpɔŋ; ntɛ ŋantimɛ mɔ, kɔ ŋanəŋk Yesu pəmot pa debeki da Kanu disrɛ, kɔ afum mɛrəŋ akɔ ŋanacəmɛ kɔ nkɔn mɔ.

³³Tɛm ntɛ afum akakɔ mɛrəŋ ŋaŋc-gbɛyɛnɛ kɔ Yesu mɔ, kɔ Piyɛr oloku kɔ: «Wətəksɛ pəntesɛ su kiyi ka nnɔ. Səcəmbər cəbal cəcɛpɛ-cɛpɛ maas, ŋin ŋam, ŋin ŋa Musa, kɔ ŋin ŋa Eliya.» Piyɛr ɛnacərɛ fɛ ntɛ oŋc-loku mɔ.

³⁴Ntɛ oŋc-loku tatɔkɔ mɔ, kɔ kəp kənder kəgbəpərnɛ ŋa kɔ kənesɛ kəsumpər acɛpsɛ a Yesu darəŋ ntɛ ŋananəŋk kəp kaŋkɔ kəc-der kəgbəpərnɛ ŋa mɔ.

³⁵Kɔ dim dowur kəp kaŋkɔ disrɛ, doc-loku: «Wəkawɛ ɔyɔnɛ wan kem, nkɔn iyɛk-yɛk: Nəcəŋkəl kɔ!»

³⁶Ntɛ ane dim dadɔkɔ mɔ, k’anəŋk Yesu pəcəmɛ sona. K’acɛpsɛ a Yesu darəŋ ŋaŋcaŋk ali fum ɛnaloku fɛ sɔ wəkos tɔlɔma ntɛ ɛnəŋk mɔ mata mamɔkɔ.

³⁷Dɔckɔsɔk ntɛ ŋantor kəyɛfɛ dətɔrɔ mɔ, kɔ afum alarəm ŋander kədefaynɛ Yesu.

³⁸Kɔ fum wəlɔma oŋkulərnɛ kənay kaŋkɔ dacɔ: «Wətəksɛ ilɛtsɛn’am məmɔmən wan kem, bawo wəkin wəkawɛ gboŋ iyɔ.

³⁹Ŋɔŋk ŋɛlɛc ŋɔlɔma ŋɛmbɛrɛ kɔ, kɔ ŋɔsɔŋɛ kɔ kəkulɛ-kulɛ gbəŋcana babɔkɔ, kɔ ŋeyikəc kɔ pəpɔŋ, kɔ ŋɔsɔŋɛ kɔ kəfoc kəwur kɔ dəkusu; kɔ ŋɔlɔləs kɔ dis, a kɔ ŋendesak kɔ.

⁴⁰Ilɛtsɛnɛ acɛpsɛ-am darəŋ kəbɛləs ka ŋi, mba ŋantam fɛ ti.»

⁴¹Kɔ Yesu oŋkulərnɛ: «Nəna afum alɛc a tɛm tantɛ, atɔlaŋ Kanu, tɛm cəke tɔ pəmar sɔ iyi kɔ nəna-ɛ? Tɛm cəke tɔ pəmar sɔ itɔmpər te tonu-ɛ? Məkɛrɛ wan kam nnɔ.»

⁴²Ntɛ wan wəkakɔ ɔŋc-lɔtərnɛ Yesu mɔ, kɔ ŋɔŋk ŋɛŋgbal kɔ dəntɔf kɔ ŋeyikəc kɔ pəpɔŋ. Mba kɔ Yesu ɛŋgbəŋ-gbəŋər ŋɔŋk ŋɛlɛc ŋaŋɔkɔ, k’ɛntaməs wan wəkakɔ, k’ɔsɔŋ kɔ kas.

⁴³Kɔ cusu cəwos afum fəp kənəŋk ka fənɔntər fəpɔŋ fa Kanu. Ntɛ mes mamɔkɔ Yesu ɔŋc-yɔ mɔ mec-ciyɛnɛ afum mɔ, k’oloku acɛpsɛ ɔn darəŋ:

⁴⁴«Nəna nəsu ləŋəs, nəcəŋkəl bel-bel moloku mamɛ: Kəbɛr k’ander Wan ka fum afum dəwaca.

⁴⁵Mba acɛpsɛ ɔn darəŋ ŋanacərɛ fɛ tedisrɛ ta toloku tatɔkɔ oŋc-loku mɔ; tɛnagbɔpnɛ ŋa, ntɛ tɔŋsɔŋɛ ta ŋaŋcərɛ ti mɔ. Kɔ ŋanesɛ kəyifət kɔ tedisrɛ ta toloku tatɔkɔ.

⁴⁶K’acɛpsɛ ɔn darəŋ ŋayɛfɛ kəyifətɛnɛ ntɛ tɔŋsɔŋɛ ŋacərɛ nwɛ eŋcepər ŋa dəkəcəmɛ mɔ.

⁴⁷Yesu nwɛ ɛnacərɛ mɛcɛm-cɛmnɛ mmɛ meyi ŋa dəcor mɔ, ɛlɛk wan wəfɛt wəkin, k’ɛŋcəmbərərnɛ kɔ.

⁴⁸Kɔ Yesu oloku ŋa: «Nwɛ o nwɛ ɛbaŋ wan wəkawɛ kəbaŋ kətɔt tetem, ɛmbaŋ’im ina sərka pətɔt; nwɛ o nwɛ ɛbaŋ’im, ɛmbaŋ wəkɔ osom’im mɔ. Bawo fum wəkɔ ɛŋcəmbərnɛ dəkəcəmɛ dɛfɛt mɔ, ɔyɔnɛ wəkɔ eŋcepər nu fəp.»

⁴⁹Kɔ Saŋ ɛlɛk moloku k’oloku: «Wətəksɛ sənanəŋk fum wəlɔma pəc-bɛləsɛ yɔŋk yɛlɛc tewe tam; kɔ səfaŋ kəmɔnɛ kɔ, bawo wəkayi ɛŋcəmɛ f’am darəŋ pəmɔ səna.»

⁵⁰Kɔ Yesu oloku kɔ: «Ta nəmɔnɛ kɔ ti; bawo fum nwɛ ɔntɔc’am mɔ, ɛfaŋ’əm.»

⁵¹Ntɛ dɔsɔk dɛlɛk da Yesu doru dɔŋc-lɔtəs mɔ, k’olokunɛ a mɛnɛ pəkɔ Yerusalɛm gbəs.

⁵²K’osom afum alɔma ŋayi kɔ kiriŋ. Kɔ akakɔ ŋayi kiriŋ kɔ ŋaŋkɔ ŋabəp dare da Samari dɔlɔma, ntɛ tɔŋsɔŋɛ ŋalompəsnɛnɛ kɔ mɔ.

⁵³Mba kɔ aka dare dadɔkɔ ŋafati kəbaŋ kɔ, bawo Yerusalɛm ŋaŋc-kɔ.

⁵⁴Ntɛ afum aŋɛ ŋanəŋk ti mɔ, acɛpsɛ a Yesu darəŋ, Saŋ kɔ Sak ŋaloku: «Wətəksɛ, məfaŋ səloku nɛŋc dotor kəyɛfɛ dəkɔm dɛləsər ŋa?»

⁵⁵Kɔ Yesu ɛŋkafəlɛ k’ɛntɛfərnɛ ŋa, k’ɛgbəŋ-gbəŋər ŋa.

⁵⁶Kɔ ŋayɛfɛ kɔ ŋaŋkɔ dare dɔlɔma.

⁵⁷Ntɛ ŋanayi dɔpɔ kəkɔ mɔ, kɔ fum wəlɔma oloku kɔ: «Iŋcəm’am darəŋ nnɔ o nnɔ məŋkɔ mɔ.»

⁵⁸Kɔ Yesu oloku kɔ: «Yeterer yɔyɔ bi kɔ bɛmp yɔyɔ wɔlɔ wa yi; mba Wan ka fum ɔyɔ fɛ nnɔ ɛntam kəboc domp mɔ.»

⁵⁹Kɔ Yesu oloku fum wəlɔma: «Məcəm’em darəŋ.» Kɔ fum wəkakɔ oloku kɔ: «Wətəksɛ, məwos’em kərɛsna ikɔ iwup papa kem.»

⁶⁰Kɔ Yesu oloku fum wəkakɔ: «Məsak afi ŋawup afi; kɔ məna, məkɔ mədəŋk dɛbɛ da Kanu.»

⁶¹Kɔ fum wəlɔma oloku: «Kəcəm’am k’inder darəŋ Wəbɛ, mba məkar ikɔ kərɛsna ilembərnɛ aka kəlɔ kem disrɛ.»

⁶²Kɔ Yesu oloku kɔ: «Nwɛ o nwɛ edebiftɛ cəna a wəkayi pəc-mɔmən tadarəŋ, entesɛ fɛ kədəŋk ka dɛbɛ da Kanu.»