Lukas 9:31-62

³¹Ätekei ra pwä lon ling seni läng o kapas ngeni Jesus usun an epwe apwönüetä än Kot we akot ren an mäla lon Jerusalem.

³²Petrus me chienan kewe ra fokun möür, nge ra nenela o küna än Jesus ling me ekewe ruoman mwän mi nom ren.

³³Lupwen ekewe ruoman mwän ra feil seni Jesus, Petrus a üreni, “Sounemenem, a fokun öch ach nonom ikei. Aipwe aüetä ülüngat imw mangaku, eu fän itom, eu fän iten Moses nge pwal eu fän iten Elias.” (Petrus esap wesewesen weweiti met i a kapas usun.)

³⁴Lupwen a chüen kakapas, eu kuchu a pwä o nürün a pwölürela. Iwe, ekewe chon kaiö ra niuokus, lupwen ewe kuchu a feitiu wor.

³⁵Iwe, eu möngüngü a möngüngüwu me lon ewe kuchu, “Iei i nei üa filätä, oupwe aüselinga.”

³⁶Iwe, lupwen ewe möngüngü a köüla, ra küna pwe Jesus chök a nom. Nge ekewe chon kaiö ra amwöchü ekei mettoch, nge resap üreni eman met ra küna lon ena rän.

³⁷Iwe, sorotän ewe rän, lupwen Jesus me ekewe ülüman chon kaiö ra feitiu seni won ewe chuk, eu mwichen aramas mi chomong ra souni.

³⁸Iwe, eman mwän me lon ewe mwich a kötä, “Sense, üa tüngor ngonuk, kose mochen kopwe alisi nei we ät, pun ina i chök nei.

³⁹Eman ngün a tötä won, pwe a müttir puchörütä, a achecha tori a puropurowu me lon awan. A chök akafeiengaua, nge esap mochen likitala.

⁴⁰Üa tüngor ngeni noumw kewe chon kaiö pwe repwe asüela, nge resap tongeni.”

⁴¹Iwe, Jesus a pölüeni, “Ämi eu täppin aramas mi lükümang o tipesosor. Ifa langatamen fansoun ai üpwe nonom remi o engila ngenikemi?” Mürin a üreni ewe mwän, “Kopwe uwato noumw we ikei.”

⁴²Lupwen ewe ät a feito, ewe ngününgau a aturätiu lepwül o achecha. Nge Jesus a allük ngeni ewe ngününgau pwe epwe towu seni. Iwe, ewe ät a pöchökületä. Mürin Jesus a aliwini ewe ät ngeni saman.

⁴³Iwe, ekewe aramas meinisin ra mairü ren än Kot manaman mi pöchökül. 9.43b-45 Iwe, lupwen ekewe aramas ra chüen mwar ren ekewe mettoch meinisin Jesus a föri, a üreni nöün kewe chon kaiö,

⁴⁴“Ousap manlükala met ei üpwe le ürenikemi. Nöün Aramas epwe tolong lepöün aramas.”

⁴⁵Nge ekewe chon kaiö resap weweiti ekei kapas. A monomon seniir, pwe resap tongeni weweiti, nge ra niuokus ar repwe kapas ais ngeni usun.

⁴⁶Iwe, a fis eu aninifengen lefilen ekewe chon kaiö won iö epwe lap me leir meinisin.

⁴⁷Nge Jesus a silei met ra eäni ekiek, iei mine a angei eman semirit o aütai lepekin.

⁴⁸Iwe, a üreniir, “Iö a etiwa ei semirit fän itei, a etiwaei. Nge iö a etiwaei a pwal etiwa ewe eman a tiniei. Pun iö a kis me leimi meinisin, ina i ätewe a lap mwemi meinisin.”

⁴⁹Iwe, Johannes a üreni Jesus, “Sounemenem, äm aia küna eman mwän a asüela anün rochopwak fän itom, nge äm aia üreni pwe epwe ükütiu, pun i esap chiechiach.”

⁵⁰Iwe, Jesus a üreni Johannes me nöün kewe chon kaiö, “Ousap pinei an angang. Pun eman esap ü ngenikemi, a fitikemi.”

⁵¹Iwe, lupwen a arap ewe fansoun än Jesus epwe le feitä läng, a nom lon letipan an epwe feila Jerusalem.

⁵²Iwe, a tinala chon kaiö pwe repwe akomwola mwan. Ra feila o tolong lon eu sopw lon Samaria, pwe repwe amolätä mettoch meinisin fän itan.

⁵³Nge ekewe aramas lon ewe leni resap mochen etiwa, pun ra silei pwe a nom won an sai ngeni Jerusalem.

⁵⁴Iwe, lupwen ekewe chon kaiö James me Johannes ra küna ei, ra üra, “Ka mochen pwe äm aipwe köratiu ekkei seni läng, pwe epwe kenala ekei aramas?”

⁵⁵Nge Jesus a sap ngeniir o apwüngüür.

⁵⁶Mürin Jesus me nöün kewe chon kaiö ra feila lon pwal eu sopw.

⁵⁷Iwe, lupwen ra fefetal won al, eman a üreni Jesus, “Ngang üpwe etuk ekis meinisin ia kopwe feila ie.”

⁵⁸Jesus a üreni, “Ekewe foks a wor pwanger, ekewe machang a wor faser, nge Nöün Aramas esap wor eu leni ia epwe konola ie o asösö.”

⁵⁹Iwe, Jesus a üreni pwal eman mwän, “Kopwe etiei.” Ewe mwän a üreni, “Ai samol, kose mochen kopwe akom mwüt ngeniei ai üpwe feila lon leniei o peiaseni semei.”

⁶⁰Nge Jesus a pölüeni, “Kopwe likiti ngeni ekewe mi mäla repwe püsin peiaseni ar kewe somä. Nge en kopwe feila o arongafeili ewe Mwün Kot.”

⁶¹Pwal eman mwän a üra, “Ai samol, üpwe etuk. Nge kopwe akom mwüt ngeniei pwe üpwe feila o kapongen amwirimwir ngeni chon ai famili.”

⁶²Jesus a pölüeni, “Eman mi popuetä le tuw pwül nge a nenesefäl, esap fich ngeni ewe angangen Mwün Kot.”