SAN LUCAS 9:31-62

³¹Te luu ndíndēé de cáhīin de, te ni cacahān de jíín yá sɨquɨ̄ jeē ní cuyajni cuu yā ñuu Jerusalén.

³²Te Pedro jiín tée cáyūcu jíín de, yōhyo cájiī de māhná, te vēsú súcuan te tu ní cáquixī de. Te ni cajito de jeē lúu ndíndēe yá jiín ndɨndúú tée cáhīin jíín yá.

³³Te nuū ní cacujiyo tēe un núū yā, te ni cahān Pedro jiín yá: Maestro, nacā jeē váha jeē cáhīin ná yáha. Te na sáha ná únī vehe ramada, ɨɨn cuu máá ní, ɨnga cuu Moisés, te ɨnga cuu Elías, achí de. Te tu sáha de cuenta na vé cúu jeē cahán de.

³⁴Te níní cáhán de súcuan, te ni quee vicō nūhun ní jesɨ nuū de jíjnáhan de. Te ni cayūhú de jeē cáhīin de chīji vicō ún.

³⁵Te nuū vicó un ní cahān ɨɨn jnūhun: Yāha cúu Sēhe ri jeē maní ndasɨ́ rí jiín. Te na cúni nahín ró jnūhun cáhán yā, achí.

³⁶Te nuū ni jínu ni cahān jnūhun ún, te máá ɨɨn na Jesús íin ya nuū de. Te máá de tu ní cácahān cuɨtɨ de, te tāca quɨ́vɨ̄ ún tu ní cácachi de nuū ni ɨɨn jeē súcuan ni cajito de.

³⁷Te ɨnga quɨvɨ̄ un ní nanuu ya yucu jíín de. Te cuehē ñayuu ni jejnahan i ya.

³⁸Te mēhñu ñáyuu cuehē un ní cana jee ɨɨn tēe: Maestro, jícán tahú na núū ni jéē condēhe ní sēhe yɨɨ́ ná, chi máñúhún i nuū ná.

³⁹Te máni jeē sáha xeēn tachī jiín i, te cána cóhó i sáha, te jéhni yɨ̄hɨ́ i, te jée tiñū yuhu i. Te yōhyo stóho i, te yōhyo uhū siaá i.

⁴⁰Te ni cahān ndahú ná jiín tée cáscuáha jíín ní jeē na quénehen te tachī ún, te tu ní cúu sáha de, áchí de.

⁴¹Te ni cahān yā jiín de jíjnáhan de: Ñayuu yōhyo nīhni ni cácuu ró, chi tu cácandíje ró jéē cuu nduvāha i. ¿Nasaa ga quɨvɨ̄ condee rī jiín ró jeē cuándeyɨ́ ni rī jiín ró? Cuáquihin sēhe ró na quíji i, áchí yá.

⁴²Te níní véji i nuū yā, te ni cotúú i ni sáha tachī, te ni jehni yɨ̄hɨ́ i. Te Jesús ni cahān xeēn yā nuū tachí un, te ni nasávāha ya sūchí un, te ni nacuāha ya i nuū tatá i.

⁴³Te ndɨvii ñayuu nahán ní canaa ni i cájito i jeē yóhyo jéhnu jniñu sáha Yaā Dios. Te níní cánaa ni i cájito i tācá jniñu ni sáha Jesús, te ni cahān yā jiín tée cáscuáha jíín yá:

⁴⁴Chuhun vāha ni rō jnūhun cáhán rī yāhá, te ma náā ni rō, chi ruhū, Yaā ní nduu tēe, nastúu i ruhū quɨ̄vɨ ri ndaha tāca tée xeēn, achí yá.

⁴⁵Te tu ní cájecūhun ni de jnūhun cáhán yā, chi tu ní cúu cuɨtɨ jecūhun ni de. Te ni cayūhú de cajnūhún de ya sɨquɨ̄ jnúhun ni cahān yā.

⁴⁶Yūcuán na te tēe cáscuáha jíín yá ni caquejéé de cácahān de sɨquɨ̄ núu ndé ɨɨn de cújéhnu ga.

⁴⁷Te Jesús ni jini yā jeē súcuan cájeni ni de. Te ni jnɨɨ ya ndaha ɨɨn sūchi lúlí, te ni jeni ya i xiin ya.

⁴⁸Te ni cahān yā jiín de: Na‑ni ñayuu núu jeē sɨquɨ́ ruhū jetáhú i sūchi lúlí yáha, te ruhū jetáhú i. Te ñayuu jetáhú rúhū, suni jétáhú i Yaā ní tají rúhū vēji ri. Te ñayuu núu ga mēhñu ró, máá i cújéhnu ga, achí yá.

⁴⁹Yūcuán na te ni cahān Juan: Maestro, ni cajito ná ɨɨn tēe jeē jiín sɨ́hvɨ́ ní quénehen de tachī ini ñayuu. Te ni cajesɨ na jéē sáha de, chi tu jíca de jíín yó, achí de.

⁵⁰Te ni cahān Jesús jiín de: Ma cásɨ rō jeē sáha de, chi tēe tu cáhán sɨquɨ̄ yō, íin de jíín yó, achí yá.

⁵¹Te ni cuyajni quɨvɨ̄ jeē quínuhun yā andɨvɨ́, te ni tee téyɨ́ ni yā jeē quihín yā ñuu Jerusalén.

⁵²Te ni tají yá sava tēe yósnúu de jíín jnúhun jeē jinú yā. Te cuangoo de ɨɨn ñuu Samaria návāha nducú de nuū ndóo ya.

⁵³Te ñayuu Samaria un tu ní cájēhe i vehe ndōo ya, chi ni cajini i jeē ndé Jerusalén quihīn yā.

⁵⁴Te Jacobo jiín Juan, tēe cáscuáha jíín yá, ni cajini de jeē súcuan cúu, te ni cacahān de jíín yá: ¿A cúní ni jéē ndácu yó jniñu quiji ñuhūn nde andɨvɨ́, nájnūhun ni sáha Elías, návāha naa ñayuu yáha? Achí de.

⁵⁵Yūcuán na te ni ndió cóto Jesús nuū de, te ni cahān yā nuū de: Tu cájini rō na nuū vēji jnūhun cácahān rō.

⁵⁶Chi ruhū, Yaā ní nduu tēe, tú vēji ri jeē snáā rī ñayuu, chi sa suhva jeē jnáma ri ñayuu, achí yá. Yūcuán na te cuahān yā jiín de ɨnga ñuu.

⁵⁷Te níní jíca ya ichi jíín de, te ni cahān ɨɨn tēe jíín yá: Condiquīn na níhín quíhīn yō ndé‑ni cúu‑ni nuū quihín ni, áchí de.

⁵⁸Te ni cahān Jesús jiín de: Tāca ñúcuii, íyó yáū cava cáñuhun tɨ. Te suni saa, iyó tácā tɨ̄. Te ruhū, Yaā ní nduu tēe, tú nuū cusú rī, achí yá.

⁵⁹Te ni cahān yā jiín ɨnga de: Condiquīn ruhū na quíhín yō. Te máá tée un ní cahān de: Condetu ní ndé na quíchindūji ná tátá na xíhna gā. Yūcuán na te condiquīn na níhín, áchí de.

⁶⁰Te ni cahān Jesús jiín de: Stóo tāca ndɨ́yɨ na chíndūji jnáhan ndɨ̄yɨ, chi ndɨ̄yɨ cácuu ñayuu tu cácandíje. Te róhó, cuáhán te nacani ró jnúhun ndese ndácu Yaā Dios jniñu, áchí yá.

⁶¹Yūcuán na te suni ni cahān ɨnga de: Cúní na condiquīn na níhín, te cuāha ní jnúhun jeē xíhna gā quicahān na jíín ñáyuu cáyūcú vehe ná, áchí de.

⁶²Te ni cahān Jesús jiín de: Núu na‑ni tēe quéjéé de condiquīn de ruhū, te núu máni jeē nácani cuíhyá ni de sɨquɨ̄ tāca jéē ni stóo de, núu súcuan te cúu de nájnūhun ɨɨn tēe jítu jíín yátá, te jícó cóto de ichi vehe de. Te ma cuajníñu de condiquīn de ruhū sɨquɨ̄ jníñu ndácu Yaā Dios, achí yá.