Luk 9:31-62

³¹Asakmararaŋ uruŋe asuhuba Jisösbuk keu kewö eraum mötket, “Anutunöŋ Jisös sihimbölö möta kömumapkö melaiiga eta zilaŋ Jerusalem sitinöŋ aniga areŋ miaŋön ölŋambuk ak teköma.”

³²Mewö eraum mötketmö, Pitönöŋ alayahötŋi yetpuk jeŋinan lömböriiga gaun ahöget. Ahögetmö, gaunöhök imbiŋini möta jeŋini uba Jisösgö asakmararaŋi aka azi yahöt yambuk kinohori, mi eŋgeket.

³³Eŋgeketka kinda Jisös mosötpitkö ahotka Pitönöŋ Jisösgöra jiyök, “Ketaŋamnini, neŋön kiaŋgöreŋ uru ölöwak mötzin. Miaŋgöra neŋön ölöp koum karöbut qebin: Göhö kun, Mosesgö kun aka Elaijagö kun.” Pitönöŋ mewö jiyökmö, nanŋi keuŋaŋgö könaŋi mi qahö möt kutuyök.

³⁴Mewö jiba kiniga unuŋunuŋ kunöŋ eta aumŋan esuhum eŋgiiga kousu uruŋe mala awöwöliba jönömŋini unduyök.

³⁵Jönömŋini undui kingetka kousu uruŋeyök qet kun kewö eriga mötket, “Azi ki mi nani nahöna. I ambazip amöt qem eŋgimamgöra möwölöhöm waŋgial. Mönö yaŋgö keuŋi möta malme.”

³⁶Qet miaŋön eri möta gwarek yeŋön miaŋgöreŋök uba Jisösnöŋ nanŋök kini eket. Kunduŋe yuai ekeri, miaŋgö buzupŋi mi nalö miaŋgöreŋ kude jiba keu bök malgetka kunŋan kun qahö mörök. Mewö.

³⁷Ahöba wahötketka Jisösnöŋ gwarekurupŋi karöbut yembuk kunduŋeyök eta sörökŋe ambazip kambulelembe eŋgeget.

³⁸Eŋgegetka ambazip kambunöhök azi kunŋan qeta kewö jiyök, “Böhi, nöŋgö nahöni mukmoröya akzawaŋgöra mönö kaba i ekŋan. Miaŋgöra köuluköm gihizal.

³⁹Mötnöŋ, öme kunöŋ i memba mendawöli miaŋgöreŋök qet gigilahöi utuköm waŋgii wölöhariiga numbuŋeyök qölqölsöutsöut erakza. Öme miaŋön öröm ureim waŋgiba nalö gwötpuk qahö mosörakza.

⁴⁰Mewö aiga göhö gwarekurupki öme mi wuataŋgömegö ulet eŋgizalmö, yeŋön mi osize.”

⁴¹Mewö jiiga Jisösnöŋ meleŋ waŋgiba jiyök, “Yei, gölmegö yaŋgiseŋ aka misimkaulup ambazip, nöŋön mönö nalö dawik embuk mala qatön eŋgubiga Anutu qahö möt narigetka sihimbölö mötmam? Nahöngi mönö waŋgita ki kanöŋ.”

⁴²Morö mi waŋgita kaiga nalö miaŋgöreŋ mewöyök ömenöŋ morö utuköba urepköm waŋgiiga wölöhariyök. Mewö ahökmö, Jisösnöŋ öme mi jim waŋgii mosöri morö mem ölöwaka iwiŋi waŋgiyök.

⁴³Anutugö kukösumŋi ketaŋan mewö asuhuiga körekŋan mi eka nemböŋini teköi welipköget. Mewö. Jisösnöŋ yuai pakpak mi meyöhi, miaŋgöra ambazip körekŋan welipkögetka Jisösnöŋ nalö miaŋgöreŋ gwarekurupŋi keu kötŋi kewö jii mötket,

⁴⁴“Keu ki mönö kezap ala mötme: Anutunöŋ Suep gölmegö azi ölŋi mi gölme ambazip yeŋgö böröŋine al waŋgii gema.”

⁴⁵Keu kötŋi mi jii mötketmö, mi qahö möt kutuget. Anutunöŋ mi köl turui tölapŋe ahöiga mi qahö möt asariget aka könaŋi denöwö, mi qesibingö kölköldömdöm aket. Mewö.

⁴⁶Gwarek neŋgöreŋök ‘Daŋön öŋgöŋgöŋi akza?’ jiba keu mi mötmöriget.

⁴⁷Mi mötmörigetmö, Jisösnöŋ urumötmötŋini möt kutuba namande moröŋi kun memba qöhöröŋe ali kinök.

⁴⁸Kiniga kewö jii mötket, “Körek eŋgöreŋök kunŋan eretŋi kondökŋi akzawi, yaŋön mönö öŋgöŋgöŋi akza. Miaŋgöra kunŋan namande ki nöŋgö qetne miriŋe köl öröba köyan kölmawi, yaŋön mönö ni köl öröm niŋgima. Kunŋan ni köl öröm niŋgimawi, yaŋön melaim niŋgiyöhi, mönö i mewöyök köl öröm waŋgima.” Mewö.

⁴⁹Nalö miaŋgöreŋ Jonöŋ könahiba keu kewö jiyök, “Ketaŋamni, azi kunŋan göhö qetnöŋ öme közöl eŋgiiga ehin. Yaŋön nembuk qahö liliköba maljawaŋgöra nini i qetal waŋgiin.”

⁵⁰Mewö jiyökmö, Jisösnöŋ kewö jii mörök, “I kude qetal waŋgime. Kunŋan qahö qetal eŋgimakzawi, yaŋön mönö eŋgö areŋnöŋ malja. (Miaŋgöra iŋini mönö nöŋgö alaurupni tosatŋi mi qetala aŋgösirip mem eŋgibepuk.)” Mewö.

⁵¹Jisösnöŋ Suepnöŋ öŋgömamgö ahök. Miaŋgö nalöŋi törizawaŋgöra Jisösnöŋ kinda “Jerusalem sitinöŋ anmam,” jiba jim köhöiba könahiba könanöŋ anök.

⁵²Anda kolek qeljiŋe aliga mutuk anget. Könanöŋ anda mala Samaria prowinsgö miri kunöŋ aŋgota “Jisösgöra mözöqözözöm akingöra kazin,” jiget.

⁵³Jiba angetka anökmö, “Ni Judia prowinsnöŋ Jerusalem jike göröken anmam” jiiga miaŋgöra miri aŋgön köla yaizökzök qahö jiget.

⁵⁴Mewö aketka gwarekyahötŋi Jeims aka Jon yekŋön mi eka jiyohot, “O Kembu, Suepnöhök könöp eta eŋgohoi qahöwakeak, mewö köuluköbingö mötzan me qahö?”

⁵⁵Mewö jiyohotmö, Jisösnöŋ liliŋgöba tembula jim etkiyök.

⁵⁶Miaŋgöreŋök toroqeba miri kunöŋ anget. Mewö.

⁵⁷Könanöŋ angetka azi kunŋan kaba Jisösgöra jiyök, “Gi denike denike anmani, nöŋön mönö miaŋgöreŋ gi guataŋgöba kamam.”

⁵⁸Mi möta Jisösnöŋ kewö jii mörök, “Arökŋaŋgö kiam yeŋön köteŋine ahögetka könakemba nei yeŋön aipŋini memba malakzemö, Suep gölmegö azi ölŋan mönö denike anda nöröpŋi wani qömböŋnöŋ nariba luhut membawak.”

⁵⁹Jisösnöŋ azi kungöra jiyök, “Gi kaba ni nuataŋgöman.” Jiyökmö, kewö meleŋnök, “Kembu, mi ölöpmö, iwinan kömumamgö aiga mutuk jinöŋga anda galöm kölbi kömui löm kölbigun.”

⁶⁰Mewö jiyökmö, Jisösnöŋ meleŋda jiyök, “Mosötnöŋ! Köhömuŋi yeŋön qamötŋini köhömuŋi mi ölöp löm kölmemö, göŋön mönö anda Anutu bemtohoŋaŋgö könaŋi jim asarim eŋgiba malman.”

⁶¹Kunbuk azi kunŋan kaŋgota jiyök, “Kembu, nöŋön gi guataŋgömamgö sihimni mötzalmö, mötnöŋ, gi ölöp jinöŋga mutuk mire anda tinitosolomurupni yaizökzökŋini jibigun.”

⁶²Jiyökmö, Jisösnöŋ meleŋnök, “Kunöŋ gölme mesiŋmesiŋgö kinoŋ mi hos andöŋe jöhöba böröŋan kinoŋ supŋe memba kini aniga dumŋe liliŋgöba andöŋe uzawi, yaŋön mönö Anutugö bemtohoŋnöŋ aŋgota nupŋi memawaŋgö dop qahö akza.” Mewö.