Luke 9:31-62

³¹nra m’uggow ni be galgal ram’en dowrow ni bod rogorow u tharmiy, mu ur nonod Jesus ni yad be weliy murung’agen nge rogon ni dabi n’uw nap’an me mu’nag e tin ke finey Got ni nge ngongliy ni aram e nge yim’ u Jerusalem.

³²Peter nge fa gali cha’ ni yad e yad be mol, miyad od miyad guy ram’en Jesus ni be galgal nge fa gali cha’ ni yad ba sak’iy.

³³Ma nap’an ni be yan fa gali cha’ rok Jesus nga orel, me ga’ar Peter ngak Jesus, “Masta, rib manigil ni kadbad ngaray. Bay gu toyed dalip i tent, nreb e ngam par ngay, ma reb e nge par Moses ngay, ma reb e nge par Elijah ngay.” (Ni aram e ri der nangfan e pi thin nem ni be yog.)

³⁴Ma nap’an ni ka be welthin, me yib i m’ug bangi manileng nge tagalul’ nagrad, ma fa’ani yib fa gi manileng nga dakenrad me tamdag pi gachalpen.

³⁵Me non ba lam u fithik’ fa gi manileng ni ga’ar, “Ireray Fakag, ni ir e kug turguy — ere mu telmed ngak!”

³⁶Ma fa’ani tal fare lam, ma go’ ka Jesus e yad be guy. Me tay pi gachalpen e tin ni kar guyed ndar weliyed ta’a ban’en riy ngak be’ e ngiyal’nem.

³⁷Ma reb e rran riy me yan Jesus nge fa dalip i gachalpen ko fare burey nga but’, me yib e girdi’ ni pire’ ngak Jesus.”

³⁸Me tolul be’ nib mo’on u fithik’ fapi girdi’ ni ga’ar, “Tamchib! Wenig ngom, moy mu guy fakag ni kari maagirag rog!

³⁹Ma yib i ying ba mo’onyan’ ngak nge tolul me margeynag, ma be yib e wuth u l’ugun, ni yugu ma sul ngak ngi i maad’adnag ma der pag!

⁴⁰Ere kug wenig ngak pi gachalpem ni ngar tulufed nge chuw rok, machane de yag rorad.”

⁴¹Me fulweg Jesus ni ga’ar, “Ri gimed be oloboch, ya der mich Got u wun’med! Uw n’umngin nap’an nthingar gu par romed? Uw n’umngin nap’an ni nggu k’adan’ug romed?” Ma aram me ga’ar ngak fare mo’on, “Mfek fare pagel ni fakam i yib ngaray.”

⁴²Ma nap’an ni be yib fare pagel ngak, me rin’ fare mo’onyan’ ban’en ngak nge aw nga but’ me margeynag. Me non Jesus ngak fare mo’onyan’ ni nge chuw u fithik’ fa’anem, me golnag fare pagel, me pi’ ngak e chitamngin.

⁴³Ma urngin e girdi’ nra gin gad ngarogon feni gel gelngin Got. Ma nap’an ni ka be weliy e girdi’ murung’agen urngin ban’en ni rin’ Jesus ni kar gin gad ngay, me ga’ar ngak pi gachalpen,

⁴⁴“Dab mpaged talin e n’en nggog ngomed! En ni Fak e Girdi’ e bay ni pi’ nga pa’ e pi girdi’ ni yad be yog e thin.”

⁴⁵Machane dar nanged fan e re bugithin nem nike yog. Ya kan mithag fan rorad ni nge dab ra nanged fan, ma yad be tamdag ni ngar fithed fan e re bugithin nem ngak.

⁴⁶Me yib i lulu’ag pi gachalpen e thin ko mini’ e arorad ni ir e th’abi tolang u fithik’rad.

⁴⁷Ma manang Jesus e n’en ni yad be leamnag, me ere kol pa’ bochi tir, me sak’iynag nga to’oben,

⁴⁸me ga’ar ngorad, “En nra ayuweg e re tir ney ni bochag, e ke ayuwegneg; ma en nra ayuwegneg, e ke ayuweg e en ni ir e ke l’oegeg ku gub. Ya en ni ir e th’abi sobut’ u fithik’med ni gimed gubin, e ir e th’abi tolang.”

⁴⁹Me non John ni ga’ar, “Masta, kug guyed be’ nib mo’on ni be maruwel nga fithingam ngi i tuluf e mo’onyan’ ko girdi’, me ere ku gogned ngak ni nge dabki rin’, ya gathi ir be’ ko ba’ rodad e girdi’.”

⁵⁰Me ga’ar Jesus ngak nge fa tinem i gachalpen, “Dab mu guyed rogon ni ngam taleged, ya en nder togopluw ngomed e kabigmed.”

⁵¹Ma nap’an ni be chugur ko re ngiyal’ i n’en ni ba’aram ni ngan fek Jesus riy nga tharmiy, me turguy u wan’ ni nge yan nga Jerusalem, ma aram me yan.

⁵²Me l’oeg e mol’og rok ngar m’onod rok ngranod ngalan ba binaw rok e girdi’ nu Samaria ni ngar fal’eged rogon urngin ban’en ni fan ngak.

⁵³Machane girdi’ ko re binaw nem e daburad ni ngar ayuweged Jesus, ya ke yan i gagiyel ni nge yan nga Jerusalem.

⁵⁴Ma fa’ani guy James nge John ni gachalpen Jesus ni aram rogon me lungurow, “Somol, ga ba’adag ni nggu piningew e nifiy nge yib u tharmiy nga but’ nge li’rad?”

⁵⁵Me pigicheal Jesus nge puwan’ ngorow.

⁵⁶Ma aram miyad yan nga yugu reb e binaw.

⁵⁷Ma nap’an ni yad be yan, me yib be’ nib mo’on i ga’ar ngak Jesus, “Nggu un ngom ko yungi n’en ni ngam man ngay.”

⁵⁸Me ga’ar Jesus ngak, “Gamanman ni fox e bay e low ni taferad, ma arche’ e bay taferad ni kar toyed, machane en ni Fak e Girdi’ e dariy bang ni nge pag ir riy nga but’ nge toffan.”

⁵⁹Me ga’ar ngak yugu reb e mo’on, “Mu un ngog.” Machane me ga’ar, “Somol, mu son, nga’ag wan gu k’eyag e chitamag.”

⁶⁰Me fulweg Jesus ni ga’ar, “Mpag e pi’in yad ba yam’ ngar k’eyged e yam’ rorad. I gur e mman ngam machibnag ngak e girdi’ murung’agen e gagiyeg rok Got.”

⁶¹Ma yugu reb e mo’on e ga’ar, “Somol, gu ra un ngom; machane mu son nggu wan gu fingichiy girdi’en e tabinaw rog.”

⁶²Me ga’ar Jesus ngak, “En nra tabab i gi’ e but’ u milay’ mi i changar nga keru’ e dabi yib fan ko gagiyeg rok Got.”