San Lucas 9:31-62

³¹Me xi cuacun vëhë ne, camatsejen me cojo ngu hasen ndajyihi, tivisiajmi xu me tsëhë cjuaveya xi hatuxa tjin rë xi cuechútáha Jesús ngajan Jerusalén.

³²Peru Pedru cojo jo sa me xi yahnga jan ne, ha siufë me, tsëhë xi jercu nijñá rë me. Peru xi cavascandaja xu rë me ne, cavëë me hacutjin jercu setí camahani tsejen hiscan secun Jesús, hacuaha cavëë xu me jo me jan hinchacuntangun me cojo Jesús.

³³Hya xi camá ne, hora xi tivetjuxin me xi cuacun vë tsëhë Jesús ne, sehe cachja xu Pedru cojo Jesús cuitjin: ―‍Tatá. Tu ma rë xi nguehe nechin ne, nihñi jyan puestu; ngu cuma tsujun ne, ngu cuma tsëhë Moisés, hane cojo ngu cuma tsëhë Elías. ―‍Cuatjin xu cachja Pedru, peru hisca hvíin me mé xi chja me.

³⁴Hane hora xi tichja xu Pedru cuatjin ne, canduva ngu yufí casahmi tjahnguen rë tsëhë me. Hane jemu catsacjun me camá xi caxinchavasen me tsëhë yufí jan.

³⁵Hya xi camá ne, canuhya xu rë ngujo cjua xi cavetju ngajñi yufí jan xi cachja cuitjin: ―‍Cha vihi xi Quihndi naha cha, cha xi ngahan cavejñá cácun xi tsingátju. Tinuhyun cjua xi chja cha. ―‍Cuatjin xu cachja cjua jan.

³⁶Hane xi cavatju cachja cjua jan ne, Jesús ne, camasuvá sa me secun me. Hya xi camá xu ne, jyan xuta ladu rë Jesús jan ne, tu caviyujujyuu ni me. Hane nixtin hya ne, cachjaain camaha xu ni me cojo hisca ngu tsëhë xcusun xi cavëë me.

³⁷Cuitjin camá nga xu camá nchujun hya xi canduvajne Jesús tsëhë ndetjún cojo jyan xuta ladu rë me jan. Tjercu cjín camahani xuta canduvatjengui xu rë me ndiya.

³⁸Hane ngajñi rë xutacjín jan ne, cavetjujñi ngu xihin xi jercu cajindaya xu cachja cojo Jesús cuitjin: ―‍Maestro, nihñu favor ne, nduvun chutsujun cha lihndi naha ta ngu tutu má cha vi xi tacun ná cha.

³⁹Hane cuitjin sahmi ngu xitsehen cojo rë cha: faha rë cha, hane tu ñahñu jindaya, sehe vitsuneya rë cha, ña vetju natyaxu hntsua cha, hane hisca hya xi ndiya cjuë cha ne, sehe vetjuxin tsëhë cha.

⁴⁰Xuta ladu nuju, caféhya rë me favor xi cuaxëxin me, peru camaji cavaxëxin me. ―‍Cuatjin xu cachja xihin jan cojo Jesús.

⁴¹Sehe ngajan xi Jesús ne, cuitjin xu cafayangui me: ―‍Ngayujun ni ne, xuta xi macjaain rë ngayun hacuaha xuta xi cavetjuxin tsëhë ndiya ndajyihi ngayun. ¿Jani hisca hya xi tjin ná xi cuitejña cojo nuju? ¿Jani hisca hya xi tjin ná xi scaa ná cojo nuju? Nduvuncujun quihndi nuju nguehe. ―‍Cuatjin xu cafayangui me.

⁴²Hane hora xi tijima tiña xu cha lihndi jan tsëhë Jesús ne, xitsehen ne, catsiticja rë cha, hacuaha vitsuneya rë cha. Hya xi camá ne, cavatëcja Jesús tsëhë xitsehen, hane casahmi me xi camandaja xu cha lihndi jan. Sehe casua me cha cojo nahmi rë cha.

⁴³Hane yëjë ni xuta jan ne, jemu quijircun camaha xu ni rë me xi cuatjin jyë hnga Nina cojo Hasen rë me. Hane jinguyëjë rë xi cuatjin tifircun rë xutacjín jan tsëhë yëjë ni xcusun xi sahmi Jesús ne, cachja xu me cojo xuta ladu rë me cuitjin:

⁴⁴―‍Ndaja tetuhunrcun cjua xi tichjá cojo nuju vi: Ngahan xi Quihndi rë Xuta Jain ngahan ne, hatuxa tjin xi cuma ngahan entregadu tsja xuta. ―‍Cuatjin xu cachja me.

⁴⁵Peru xuta ladu rë Jesús jan ne, cavijnii rcu me mé vijne cjua jan ta, tsëhë xi casetsa xu rë cjuatacun rë me, cojo sa xi cuijnii rcu me. Hacuaha tsacjun xu me xi cjuinenguise me Jesús mé vijne cjua vëhë.

⁴⁶Ngu nixtin jan ne, cavetsihin sacuaha xi meje scaanya xu xuta ladu rë Jesús ngajñi rë me yo xi hitsë sa matitjun.

⁴⁷Peru Jesús ne, xi ha vëë me hacutjin tsingataha cacun xuta ladu rë me jan ne, sehe cafaha me ngu lihndi cavisecun me ndaya rë me,

⁴⁸sehe cachja xu me cojo xuta ladu rë me jan cuitjin: ―‍Tu yo ni xi cjuahatsja rë lihndi vihi tsëhë xi ladu naha má ne, hacuaha hora vëhë cjuahatsja ná ngahan. Hacuaha xi cuatjin cjuahatsja ná ngahan ne, hacuaha cjuahatsja rë Nina xi catsingatju ná. Hane tu yo ni xi má nuju xi ma tjengui tsëhë ngajñi nuju ngayujun ni ne, vëhë xi matitjun xi má rë Nina. ―‍Cuatjin xu cachja Jesús.

⁴⁹Ngajan xi Juan ne, cachja xu me cojo Jesús cuitjin: ―‍Tatá, cahyin ngu me xi tivaxëxin xitsehen sacuaha xi suvun catuhun rë me xá. Hane canújin cojo rë me xi ha quihndë sahmii me cuatjin ta, tsëhë xi me vëhë ne, tsujyihintjenguiin me ngayun sacuatjin niji ngayin. ―‍Cuatjin xu cachja me.

⁵⁰Hane Jesús ne, cuitjin xu cafayangui me: ―‍Xicanujuun cojo rë me cuatjin ta, tsëhë xi xuta xi hacuiin condra naja má me ne, hatuxa favor naja fi me. ―‍Cuatjin xu cachja Jesús.

⁵¹Hya xi camá ne, xi tijima tiña xu nixtin xi cjueniji Jesús ngajan ngahnga ne, cavejñahñu me cjuatacun rë me xi cjue me ngajan Jerusalén.

⁵²Vëhë xi catsingatju titjun xu me jo xuta ladu rë me. Xi quiji me ne, cafehe me ngu nandya tsëhë xuta Samaria, xi cuanguise me cahndë́ xi cuejña Jesús cojo xuta ladu rë me.

⁵³Peru xuta jan ne, cafahatsjaain xu me Jesús ta, tsëhë xi Jesús ne, hatuxa tjin cacun me xi cjue me hisca Jerusalén.

⁵⁴Peru hya xi camachaya xu rë Jacobo cojo Juan, xuta ladu rë Jesús, cjua vëhë ne, cachja xu me cojo Jesús cuitjin: ―‍Tatá. ¿Há nihña sacuatjin casahmi profeta Elías hatsëë nixtin? ¿Há cuitexan xi cuinduva ndihi tsëhë ngahnga, tsicjë rë xuta xi cuicun vi? ―‍Cuatjin xu cachja me.

⁵⁵Ngajan xi Jesús ne, cavuya vutsejen me xuta ladu rë me jan ne, sehe cavatëcja xu me cjuatacun xi tsingataha cacun me xi cuacun jan, cuitjin cachja me: ―‍Ngayun ne, hyúun mé xcusun Hasen xi tsëhë nuju.

⁵⁶Ngahan xi Quihndi rë Xuta Jain ngahan ne, hacuiin canduvá xi tsicjë́ xuta ta xi canduvá ne, xi cuáxëtjë me. ―‍Cuatjin xu cachja Jesús. Sehe quiji xu me ngu nga nandya.

⁵⁷Hane ndiya cjui Jesús cojo xuta ladu rë me ne, cachja xu ngu me jan cojo rë me cuitjin: ―‍Tatá. Tu yani ni xi cuangun ne, cjuë́ cojo nuju. ―‍Cuatjin xu cachja me.

⁵⁸Sehe ngajan xi Jesús ne, cuitjin xu cachja me cojo xuta jan: ―‍Chu ninda ne, tjin nguijo hiscan viyuju chu, hane nisë xi vitjen chu ngahnga ne, tjin ndava chu, peru ngahan xi Quihndi rë Xuta Jain ngahan ne, hisca ndya naha tsajin. ―‍Cuatjin xu cachja me.

⁵⁹Cachja sa xu me cuitjin cojo ngu nga xuta jan: ―‍Nduvun, cuanguen cojo ná. ―‍Cuatjin xu cachja me. Peru xuta jan ne, cuitjin xu cachja me: ―‍Tatá. Tuhun ná cahndë́, titjun cjuë́ xi seyaniji nahmi naha. ―‍Cuatjin xu cachja ngu nga xuta jan.

⁶⁰Ngajan xi Jesús ne, cuitjin xu cachja me: ―‍Xuta xi sacuaha xi cahme cjuatacun rë me xi sahmicuendaain me Nina ne, me vëhë catinchaniji me nima rë me. Peru ngayun ne, tángun tuhun cumachaya rë xuta tsëhë gubiernu xi sahmi Nina. ―‍Cuatjin xu cachja me.

⁶¹Ngu nga xuta ne, cachja xu me cojo Jesús cuitjin: ―‍Tatá. Ngahan ne, hacuaha cjuë́ cojo nuju. Peru tuhun ná cahndë́, cjuë́ tsinguíjnetaha cjua cojo xuta naha. ―‍Cuatjin xu cachja xuta jan.

⁶²Peru Jesús ne, cuitjin xu cachja me cojo xuta jan: ―‍Ngu xuta xi ha cavejña cacun me xi cjuetjengui me ndiya rë Nina sehe cumangu cumajo cacun me ¿há cjue, há cjuiin me ne?, tangun me cojo ngu cha xi ha cafaha cha ndetsihin latu xi cuetsihin cuacjan cha nangui peru tivutsejen sa cha taha ngaxtun cha. Sacuatjin machjiriin cha vihi xi cuacjan cha nangui ne, hacuanitjin ni machjiriin me vëhë xi cuisecoo me Nina hiscan xi sahmi Nina gubiernu. ―‍Cuatjin xu cachja Jesús.