Lucangundru 9:31-62

³¹Pudla pirnalali wondraterina wonti, ja mudana nunkani kaukaubana wonti, nina Nulu morlalu ngankananto Jerusalemini.

³²Petrus ja pudla nunkangunto jindina wonti; ngangnu tanali matja tepi ngamana, tanali pirnala nunkani najina wonti, ja kana mandru nunkangunto terkanani.

³³Ja jendranguta pudla nunkangundru kutinganani, Petrus Jesungu jatana wonti: “Kaparajai, ninkida ngaianangu ngumu nganai; ngaiani punga parkulu wotila nganai, jinkani kulno, Mosini kulno, ja Eliani kulno;” ja nau ko nganana wonti, mina nau jatai.

³⁴Nau jenia jatana, talara palku wokarana wonti ja tanana walpadakana wonti; ja tana japali pirna pantjina wonti, pudla talara paikuni wirinani.

³⁵Ja ngaiala kulno talara palkuudru pantjina wonti ja jatana wonti: “Naupini Ngatamura ngantjalu ngakani nganai; ninaia ngaraiatinimai!”

³⁶Ja nau ngaiala pantjinani, tanali Jesus kulnulu mankamankana wonti. Ja tana ngapu nganana wonti, ja wata kulnuni tanangupini ditjini kaukaubana wonti nunkangundru mina tanali matja najina.

³⁷Jendranguta ditji kulnuni, tana mardawonpandru matja ngarina, kana wolara nunkangu jurborina wonti.

³⁸Ja mai, kana kulno kana wolarandru maritjina wonti ja jatana wonti: “Ngujangujara jinkinietjajai, ngani jinkangu ngatjiai, ngatamura kunakulno ngakani najiau.

³⁹Ja mai, kutjieli nina patai, ja nurujeli nau maritjiai, ja nulu nina diadialkai, jeruja nau ngaltja wiltjiwiltjiriai, ja mankali nau nunkangundru kutingai ja nandrai.

⁴⁰Ja ngani milini jinkanani ngatjina warai, tanali nina dunkalkananto, ja tanaia ngandandarina warai.”

⁴¹Jesujeli kalabana wonti ja jatana wonti: “Jidni nguja gilbarinietja ja tjautjau, wintaranaia ngani jurangu jela nganai? Wintaranaia ngato jurana ngamalkala nganai? Ngatamura jinkani ninkidani padakanimai!”

⁴²Nau karakara wokaranani, kutjieli nina patana wonti, ja nina matala ngankana wonti; ja Jesujeli kutji murumuru dikidikibana wonti, ja nina kanku tepi ngankana wonti, ja nina ngaperani nunkanani nakaldra jinkina tikana wonti.

⁴³Pratjana Godaia pirnalandru ngaruparana wonti. Tana pratjana ngaruparanani pratjanandru, mina Jesujeli matja ngankana, Nau milini nunkanani jatana wonti:

⁴⁴“Tananapini jaura talpali patanimai; ngangau tanali Kanaia Ngatamura kana marani ngulkujeli jinkila nganai,”

⁴⁵Tanali ninapini jaura wata ngujamana wonti, ja jenia tanangu kurukuru nganana wonti, tanali jenia wata patananto; ja tana japali nganana wonti, nina jenia jaurandru jakalkala.

⁴⁶Ja tanali ngundrana wonti, worana morla pirna nganai tanagundru.

⁴⁷Jesujeli tanani ngarali ngundranani ngujamana, Nulu kupa waka kulno patana wonti, ja nina nunkangu karakara terkibana wonti.

⁴⁸Ja tanangu jatana wonti: “Warle ninapini kupa patai ngaani talandru, nulia ngana patai; ja warle ngana patai, nulia ninapini patai, Nulia ngana jinpanala. Ngangau worana jurangundru pratjanani waka nganai, nauja pirna nganala nganai.”

⁴⁹Joliannili kalabana wonti ja jatana wonti: “Kaparajai, ngaiani kulno najina paraia, nulu talani jinkanani kutji dunkalkanani, ja ngaiani nina daudauana paraia, ngangau nau wata ngaianingunto wapai.”

⁵⁰Ja Jesus nunkangu jatana wonti: “Wata daudauanau; ngangau worana wata tula ngaianani nganai, nau kamaneli ngaianani.”

⁵¹Jendranguta, ditji nunkani miririnani, nau puntina wonti, ja Nulu mudlamudla kurana wonti Jerusalemia palkala.

⁵²Ja Nulu mili jinpana wonti manununkaninkari, ja tana palkana wonti Samarita ngura wakaia, nunkani ngankingala.

⁵³Ja tanali nina wata patana wonti, ngangau Nulu mudlamudla kurana wonti Jerusalemia palkala.

⁵⁴Ja milieli nunkanali Jokabus ja Johannes jenia najina; pudla jatana wonti: “Kaparajai, jidni jertapaterinani, ngali jirijiribananto turu pariwilpandru godananto, tanana julkananto, worderu Eliali ngankana wonti?”

⁵⁵Jesujeli najina karitjina wonti ja pudlana daudauana wonti ja jatana wonti: “Judla wata milkila, mina Jaolaia kupa judla nganai.

⁵⁶Ngangau Kanaia Ngatamura wata wokarana warai kanaia tepi teribala, a-ai, kulkala,” Ja tana ngura kulnuja palkana wonti.

⁵⁷Jendranguta tana paltuni wapanani, kulno nunkangu jatana wonti: “Ngani jinkangu karipaterila nganai, woderi jidni paruparu wapanani, Kaparajai.”

⁵⁸Ja Jesus nunkangu jatana wonti: “Kintala jampali minka ngamalkai, ja paiali ngaranani kunjila ngamalkai, ja Kanaia Ngatamurajeli piri pani ngamalkai, wodajeri kukadi terkala.”

⁵⁹Nau kulnuni jatana wonti: “Ngakangu karipateriau!” Nau jatana wonti: “Kaparajai, ngakangu manuni kurau ngani ngopera wopananto ngaperi ngakani todila.”

⁶⁰Jesus nunkangu jatana wonti: “Narieli muntali nari tanani todinanto, jidni wapau, ja Godaia mililandru kaukaubau.”

⁶¹Bakana kulno jatana wonti: “Ngani jinkangu karipaterila nganai, Kaparajai, ngopera ngakangu manuni kurau, ngani ngakani nguralandru daninanto, tana ngakani pungani ngamai”

⁶²Jesus nunkangu jatana wonti: “Wata kulno, nulu mara nunkani mita bakuni potuni kurai, ja worakalina tikana najiai, talku nganai Godaia mililani.”