Luka 9:31-62

³¹Tec agêc seoc tauŋ lasê toŋawasigeŋ mêŋsêsôm ênê lêŋ, taŋ oc ênac dabiŋ aŋga Jerusalemŋa naŋ, lasê gêdêŋ eŋ.

³²Petere to nê ŋac luagêc, taŋ sêwiŋ eŋ naŋ, sêc bêc sêc e mateŋ gêlac, go sêlic Jesunê ŋawasi, ma ŋaclagêc tonaŋ sêkô sêwiŋ eŋ.

³³Agêc dêdi sêmoa gebe sêwi Jesu siŋ, go Petere kêsôm gêdêŋ Jesu gebe “Mêtêmôkê, ŋajam gebe tamoa tonec. Aêac anam bec têlêac acgom, aômnêm teŋ ma Mosenê teŋ ma Elianê teŋ.” Petere gêjam kauc biŋ, taŋ tau kêsôm naŋ.

³⁴Kêsôm biŋ tonaŋ gêmoa ma tao teŋ mêŋgêjam ajuŋ êsêac e kêkôm êsêac auc ma ŋacseŋomi têtêc tauŋ ŋanô.

³⁵Go awa teŋ kêsa aŋga tao tonaŋ gêmêŋ gebe “Aêŋoc Latuc tecenec, tec kajaliŋ eŋ sa naŋ akêŋ taŋem eŋ.”

³⁶Awa tonaŋ kêsa gêmêŋ ma sêlic Jesu taugeŋ kêkô. Sêlic gêŋ tonaŋ e sêjam tauŋ tôŋgeŋ, tec gêdêŋ ŋasawa tonaŋ sêjac miŋ biŋ, taŋ sêlic naŋ, ŋawae gêdêŋ lau teŋ atom.

³⁷Ŋabêbêc sêsêp aŋga lôc sêmêŋ e dêdac lau taêsam.

³⁸Ma ŋac teŋ aŋga lau tonaŋ nêŋ gêmôêc gebe “Mêtêmôkê, aê jateŋ aôm gebe ôlic ŋoc latuc acgom, gebe ŋoc gêŋ tageŋanô.

³⁹Ŋalau sec teŋ kêkam eŋ e kêwakic sec ma kêjamuŋ eŋ e awaôpic kêsa, ma êwi eŋ siŋ atom e ŋasawa ec baliŋ.

⁴⁰Tec aê kateŋ nêm ŋacseŋomi gebe têtiŋ ŋalau tau e sêgôm jageo.”

⁴¹Ma Jesu gêjô eŋ awa gebe “Ojae, amac akêŋ-gêwiŋ-atom ma amac lau-kesowaga, aê jamoa jawiŋ amac e êndêŋ ondoc ma jaôc amacnêm biŋ e êndêŋ ondocgeŋ. Ôkôc latôm êmêŋ tonec acgom.”

⁴²Ŋapalê kêsêlêŋ gêmoa ma ŋalau tau kêmônaŋ to kêjamuŋ eŋ. Tec Jesu gec biŋ ŋalau sec ma gêgôm ŋapalê ŋajam kêsa, go kêkêŋ eŋ gêdêŋ tama gêmu gêja.

⁴³Ma êsêac lau samob têtakê ŋanô kêtu Anôtônê ŋaclai kapôêŋŋa. Lau samob sêŋac lemeŋ kêtu ênê gêŋ samob, taŋ gêgôm naŋŋa, sêmoa ma Jesu kêsôm gêdêŋ nê ŋacseŋomi gebe

⁴⁴“Akêŋ taŋem biŋ tecenec ŋapep, gebe sêkêŋ Ŋamalacnê Latu êndêŋ ŋamalac lemeŋ êna.”

⁴⁵Mago êsêacnêŋ kauc kêsa kêpi biŋ tonaŋ atom, ma biŋ tau kêsiŋ tau gêdêŋ êsêac e sêjala ŋam atom. Ma têtêc tauŋ tec têtu kênac eŋ kêtu biŋ tauŋa atom.

⁴⁶Ŋasawa teŋ êsêac taêŋ gêjam jakêsa-jakêsa gebe nêŋ asa kêtu ŋac towae kêlêlêc êsêac ŋagêdô su.

⁴⁷Tec Jesu kêjala biŋ, taŋ êsêac taêŋ gêjam gec nêŋ ŋalêlôm naŋ, ma kêkôc ŋapalê teŋ ketoc eŋ kêkô kêsi eŋŋa

⁴⁸ma kêsôm gêdêŋ êsêac gebe “Ŋac teŋ embe êkôc ŋapalê tonec sa êtu aêŋoc ŋaêŋa, naŋ êkôc aê sa. Ma ŋac teŋ embe êkôc aê sa, naŋ êkôc ŋac, taŋ kêsakiŋ aê naŋ sa. Amacnêm ŋac, taŋ alic eŋ ŋac sauŋ ec teŋ naŋ, eŋ ŋac kapôêŋ.”

⁴⁹Tec Joaŋ gêjô eŋ awa gebe “Mêtêmôkê, aêac alic ŋac teŋ kêtiŋ ŋalau sec su ŋa aôlmnêm ŋaê, tec ajac jao eŋ gebe eŋ kêdaguc aêac atom.”

⁵⁰Ma Jesu kêsôm gêdêŋ eŋ gebe “Anac jao eŋ atom, gebe ŋac, taŋ kêkêŋ kisa geseŋ amac atom naŋ, kêpuc amac tôŋ.” Lau Samaria sêkôc Jesu sa atom

⁵¹Ŋanoc taŋ Anôtô gebe êkôc Jesu saŋa naŋ kêdabiŋ, tec Jesu kêsêlêŋ kepeŋ Jerusalem gêja,

⁵²ma kêsakiŋ laujaeŋ sêmuŋ eŋ. Ma êsêac sêsô lau Samaria nêŋ malac teŋ sebe sêmansaŋ ênê gamêŋ kwanaŋgeŋ.

⁵³Mago lau tau sêkôc eŋ sa atom gebe eŋ kêsêlêŋ kepeŋ Jerusalemgeŋ.

⁵⁴Ŋacseŋomagêc Jakobo agêc Joaŋ sêlic ma sêsôm gebe “Apômtau, aôm gobe aêac asôm gebe ja êsêp aŋga undambê mêŋêniŋ êsêac su me masi.”

⁵⁵Tec Jesu kêkac tau ôkwi ma gec biŋ êsêagêc gebe “Asa ŋalau latu amagêc. Ŋamalacnê Latu gêmêŋ gebe enseŋ launêŋ katuŋ su atom, gêmêŋ gebe ênam sa.”

⁵⁶Ma ac sêc sêja malac teŋ.

⁵⁷Êsêac sêsêlêŋ sêmoa intêna ma ŋac teŋ kêsôm gêdêŋ eŋ gebe “Gamêŋ taŋ aôm gobe ôna naŋ, aê oc jandaŋguc aôm.”

⁵⁸Tec Jesu kêsôm gêdêŋ eŋ gebe “Mojaŋ sê ic ma moc, taŋ sêmoa umboŋ ŋalabu naŋ, sêjam sac. Mago Ŋamalacnê Latu nê gamêŋ teŋ gebe endeŋ kwalim ênêcŋa gêc atom.”

⁵⁹Go kêsôm gêdêŋ ŋac teŋ gebe “Ôndaŋguc aê.” Ma ŋac tonaŋ kêsôm gebe “Apômtau, ôlôc acgom gebe jana jansuŋ tamoc acgom.”

⁶⁰Tec Jesu kêsôm gêdêŋ eŋ gebe “Andec ŋacmatê sênsuŋ tauŋ nêŋ ŋacmatê ma aôm ôna ôsôm Anôtônê gamêŋ ŋawae lasêmaŋ.”

⁶¹Go ŋac teŋ kêsôm gebe “Apômtau, aê gabe jandaŋguc aôm. Tageŋ ôlôc êmuŋ êndêŋ aê gebe jana ma jakam ŋoc gôlôac lemeŋ acgom.”

⁶²Tec Jesu kêsôm gêdêŋ eŋ gebe “Ŋac taŋ lêma gêdêŋ waŋ ŋagôliŋ su ma mataanô geogeo naŋ, kêtôm Anôtônê gamêŋ atom.”