Luuka 9:31-62

³¹Ɓe ɓanngidi e teddeengal, eɓe kaala haala laawol makko tabitoyoowol Urusaliima ngol.

³²Piyeer e wondiiɓe mum ɓee yo ɗaaninooɓe ɗoyngol teddungol, ɓe pini, ɓe njii teddeengal makko, ɓe njii worɓe ɗiɗon wonduɓe e makko ɓee.

³³Nde yimɓe ɗiɗon ɓee ngari faa ceerta e Iisaa ndee, Piyeer wii mo: —Moobbo, gonal amen ɗoo ana moƴƴi. Ɗal min ndarna ɗoo buguuji tati: aan wooturu, Muusaa wooturu, Iliyaasa wooturu. Kanko e hoore makko, o anndaano ko o haalannoo.

³⁴O tilaaki haalde, faa luurde wari, suddi ɓe. Taalibaaɓe ɓee kuli sanne nde luurde ndee suddi ɓe ndee.

³⁵Daande iwri e ley luurde ndee, wii: —Oo ɗoo yo Ɓiyam mo cuɓii-mi. Kettindee mo!

³⁶Ko daande ndee nanaa koo, Iisaa kaɲum tan gooto tawaa ton. Taalibaaɓe ɓee cuuɗi kabaaru oo. E ley ɗeen ɲalaaɗe, ɓe kaalanaali fay gooto ko ɓe njii koo.

³⁷Janngo mum, ko ɓe njippii waamnde haayre ndee koo, higgere jamaa jaɓɓii mo.

³⁸E ley jamaa oo, gorko gooto eewnii, wii: —Moobbo, miɗo ɲaage, tiinna ƴeewanam ɓiyam gorko, sabi kanko tan njogii-mi.

³⁹Ladde ana nannga mo, o wulla, o siɲɲa faa hunduko makko ƴufa ngufo. Nde yoppataa mo so wanaa calɗi makko fuu taƴa.

⁴⁰Mi ɲaagike taalibaaɓe maa ɓee ndibba nde, kaa ɓe ndonkii.

⁴¹Iisaa jaabii, wii: —Hey yimɓe jamaanu bonɗo ɓe nganaa goonɗinɓe. Faa mande tilotoo-mi e mon? Faa mande keddotoo-mi muɲande on? Ɓattin ɓiya oo ɗoo!

⁴²Nde suka oo ɓadinoo Iisaa ndee, ladde ndee liɓi ɗum e leydi, hedde ana dimmba ɗum. Nii Iisaa jahii e ladde ndee, sellini suka oo, totti ɗum baaba mum.

⁴³Yimɓe fuu kaaynaa saabe baawɗe Laamɗo mawɗe ɗee. E ley ko jamaa oo fuu haaynaa e golleeji Iisaa ɗii koo, o wii taalibaaɓe makko ɓee:

⁴⁴—Onon, piɗɗee noppi mon, nanon ko kaalan-mi: Ɓii Neɗɗo oo waɗete e juuɗe yimɓe.

⁴⁵Kaa ɓe paamaali haala kaa, maanaa makka ana suuɗanii ɓe, faa ɓe mbaasi annditinde ka. Ɓe kulii lamnditaade mo duu.

⁴⁶Non taalibaaɓe ɓee ndarii ana njeddondira ɓurɗo teddude hakkunde mum'en.

⁴⁷Nde wonnoo omo anndi ko woni e ɓerɗe maɓɓe, o nanngi junngo cukalel, o darni ngel bannge makko,

⁴⁸o wii ɓe: —Neɗɗo fuu jaɓɓiiɗo ngel cukalel e innde am, miin jaati o jaɓɓii. Kasen duu, jaɓɓiiɗo kam, jaɓɓike nelɗo kam oo. Sabi ɓurɗo lo'ude hakkunde mon fuu, kaɲum woni tedduɗo.

⁴⁹Yuhanna haali, wii: —Moobbo, min njii gorko gooto ana ribbira seyɗaani'en innde maa, min kaɗii mo, sabi o waldaa e men.

⁵⁰Iisaa wii mo: —Pati kaɗee mo ɗum, sabi mo honnaaki on fuu, e mon wondi.

⁵¹Nde wakkati mo Laamɗo ŋabbintinta Iisaa dow kammu ɓadinoo, Iisaa e hoore mum fellisi yahan Urusaliima,

⁵²neli nelaaɓe ardoo ɗum. Ɓeen nelaaɓe naati e ngeenndi Samariyankooɓe ngootiri faa ndaartana mo jippunde.

⁵³Kaa ndiin ngeenndi jaɓɓaaki mo, sabi Urusaliima o fa'i.

⁵⁴Nde Yaakuuba e Yuhanna njiinoo ɗum ndee, mbii: —Kalfaaɗo, aɗa yiɗi min njamira yiite iwa dow kammu duppa ɓe naa?

⁵⁵Nii o yeeccitii ɓe, o ɲiŋi ɓe.

⁵⁶Caggal mum, ɓe njehi ngeenndi ngonndi.

⁵⁷E ley yaadu maɓɓe nduu, neɗɗo gooto wii mo: —Mi jokkete to njahataa fuu.

⁵⁸Iisaa wii mo: —Doldolɗe ana njogii gayɗe, pooli duu ana njogii cuuɗi, kaa Ɓii Neɗɗo oo walaa fay ɗo soppinoo sako faa lelna hoore mum fowtinoo.

⁵⁹O wii neɗɗo goɗɗo: —Jokkam! Oon jaabii mo, wii: —Accu mi iroya baabam tafon.

⁶⁰Iisaa wii mo: —Ɗal maayɓe ira maayɓe mum'en. Aan kaa, waajoya haala Laamu Laamɗo oo.

⁶¹Goɗɗo kasen wii mo: —Mi jokkan e maa, Moobbo, kaa accu mi waynoyoo galle am tafon.

⁶²Iisaa jaabii mo, wii: —Neɗɗo fuu nannguɗo jalo sari nde yeeƴii, walaa ko nafata e Laamu Laamɗo oo.