لُكِ 9:31-62

³¹عٍ مِنِ نْرّ شُنفبٍ نَن كُي، عٍ نُ وْيّنقٍ عِسَ بّ عَ شَ قَشّ شَ قٍ مَ، نَشَن نُ قَقٍ كَمَلِدٍ دَرِ سَلَمُ.

³²شِ شْلِ نُ بَرَ نْ ثِيّرِ نُن عَ بٌورٍيٍ رَ، كْنْ عٍ تٌ شُنُ، عٍ نَشَ عِسَ شَ نْرّ تٌ، عَ نُن نَ شّمّ قِرِن نَشٍيٍ نُ نَ عَ قّ مَ.

³³نَ شّمّ قِرِنيِيٍ تٌ نُ كٍلِقٍ عِسَ شُن، ثِيّرِ نَشَ عَ قَلَ عَ بّ، «مَرِفِ، قٍ قَنيِ نَ عَ رَ مُشُ تٌ نَ بٍ يِ كِ. مُشُ شَ لِنفِرَ سَشَن يَءِلَن، كٍرٍن عِ فبٍ، كٍرٍن عَننَبِ مُنسَ فبٍ، كٍرٍن عَننَبِ عٍلِيَ فبٍ.» ثِيّرِ مُ نُ عَ كٌلٌنشِ عَ نُ سٍسٍ نَشَن قَلَقٍ.

³⁴عَ تٌ نُ نَ وْيّنقٍ، نُشُي نَشَ فٌرٌ عٍ مَ. ثِيّرِ نُن عَ بٌورٍيٍ نَشَ فَاشُ عٍ تٌ عَ تٌ نُشُي بَرَ دِن عٍ مَ.

³⁵شُي ندٍ نَشَ مِنِ نُشُي كُي، عَ عَ مَسٍن، «ﭑ مَ دِ نَن يَ، ﭑ مَ مِشِ سُفَندِشِ. وٌ وٌ تُلِ مَتِ عَ رَ.»

³⁶نَ شُي تٌ فّ وْيّندٍ، عٍ نَشَ عِسَ تٌ عَ كٍرٍن. عَ قْشِرَبِرّيٍ قٍ نَشَن تٌشِ عٍ يَ رَ، عٍ نَشَ دُندُ عَ قٍ مَ، عٍ مُ عَ قَلَ مِشِ يٌ بّ نَ وَشَتِ.

³⁷نَ كُيٍ عِبَ، عِسَ نُن عَ قْشِرَبِرّيٍ نَشَ فٌرٌ فٍيَ قَرِ، حَمَ فبٍفبٍ نَشَ قَ عَ رَلَندٍ.

³⁸نَ تّمُي، شّمّ ندٍ نَشَ عَ شُي عِتٍ حَمَ تَفِ عِسَ مَيَندِقٍ رَ، «كَرَ مْشْ، يَندِ، قَ ﭑ مَ دِ شّمّ مَتٌ، بَرِ مَ يِ دِ كٍرٍنيِ نَن نَ ﭑ بّ!

³⁹عَ مَتٌ، حِننّ نَن نَ عَ قْشْ رَ. عَ نَ كٍلِ عَ رَ، عَ سْنشْمَ نّ، عَ عَ رَكٍتُن عَ رَ، ﭑ مَ دِ دّشُنقّ نُ قَ مِنِ. عَ مُ عَ بّحِنمَ مَقُرٍن، قٌ عَ فّ عَ رَهَلَكِدٍ.

⁴⁰ﭑ بَرَ عِ قْشِرَبِرّيٍ مَيَندِ عٍ شَ يِ حِننّ كٍرِ عَ قْشْ رَ، كْنْ عٍ مُ نْشِ.»

⁴¹عِسَ نَشَ عٍ يَابِ، «وٌ تَن بْنسْي دَنشَنِيَتَرٍ، وٌ كٌبِ. ﭑ شَ لُ وٌ سّيتِ مَ هَن مُن تّمُي؟ ﭑ شَ تِ وٌ بُن مَ هَن مُن لْشْي؟ وٌ قَ نَ دِ رَ ﭑ شْن.»

⁴²عَ حَن مُ نُ عِسَ يِرٍ لِ سِندٍن، حِننّ نَشَ دِ رَبِرَ بْشِ مَ، عَ عَ رَكٍتُن عَ رَ. كْنْ عِسَ تٌ حِننّ يَمَرِ، دِ نَشَ يَلَن، عِسَ قَ عَ رَفبِلٍن عَ بَبَ مَ.

⁴³حَمَ بِرِن نَشَ كَابَ عَلَ شَ سّنبّ مَ. بِرِن تٌ نُ كَابَشِ عِسَ وَلِ قْشِ بِرِن مَ، عَ نَشَ عَ قَلَ عَ قْشِرَبِرّيٍ بّ،

⁴⁴«وٌ تَن شَ يِ مَسٍنيِ نَن نَمّ عَ قَنيِ رَ؛ عَدَ مَ شَ دِ سَمَ نّ مِشِيٍ بّلّشّ.»

⁴⁵كْنْ عٍ مُ نَ وْيّنيِ قَهَامُ، بَرِ مَ عَ نُ بَرَ نْشُن عٍ مَ عَلَكٌ عٍ نَشَ عَ كٌلٌن. عٍ مَن مُ سُو سَ عِسَ مَشْرِندٍ عَ مَ.

⁴⁶عِسَ قْشِرَبِرّيٍ نَشَ سٌ وْيّنيِ كُي، عٍ شَ عَ كٌلٌن نَشَن تِدٍ فبٌ عٍ يَ مَ.

⁴⁷كْنْ عِسَ تٌ نُ عٍ بْحّ مَ قٍ كٌلٌن، عَ نَشَ دِ مّدِ ندٍ تٌنفٌ، عَ عَ تِ عَ قّ مَ.

⁴⁸عَ نَشَ عَ مَسٍن عٍ بّ، «مِشِ يٌ نَشَن يِ دِ مّدِ مْولِ رَ سّنّمَ ﭑ شِلِ رَ، نَ كَنيِ بَرَ ﭑ تَن يّتّ يَتِ رَ سّنّ. مِشِ يٌ نَشَن ﭑ تَن نَسّنّ، نَ كَنيِ بَرَ ﭑ شّيمَ قَن نَسّنّ. نَشَن قِندِشِ مِشِ شُرِ رَ وٌ بِرِن يَ مَ، عَ تَن نَن تِدٍ فبٌ.»

⁴⁹يَيَ نَشَ عَ يَابِ، «كَرَ مْشْ، مُشُ بَرَ شّمّ ندٍ تٌ عَ حِننّ كٍرِ مَ مِشِ قْشْ رَ عِ شِلِ سَابُي رَ. مُشُ بَرَ كَتَ عَ شَ بَ نَ مَ، بَرِ مَ عَ مُ بِرَشِ وٌن قْشْ رَ.»

⁵⁰عِسَ نَشَ عٍ يَمَرِ، «وٌ نَشَ عَ رَتْن، بَرِ مَ شَ نَشَن مُ كٍلِشِ وٌ شِلِ مَ، نَ تَن نَ وٌ تَن نَ بّ.»

⁵¹وَشَتِ تٌ نُ بَرَ مَكْرّ عِسَ شَ تٍ كٌورٍ، عَ نَشَ نَتّ تٌنفٌ عَ شَ دَرِ سَلَمُ كِرَ سُشُ.

⁵²عَ نَشَ مِشِ ندٍيٍ شّي عَ يَ رَ. عٍ تٌ سِفَ، عٍ نَشَ سٌ سَمَرِ تَا ندٍ عٍ شَ سَ يِفِيَ ندٍ قٍن عَ بّ.

⁵³كْنْ نَاكَيٍ مُ تِن عَ رَ سّنّدٍ بَرِ مَ عَ نُ سِفَقٍ دَرِ سَلَمُ نّ.

⁵⁴عَ قْشِرَبِرّيٍ يَيَ نُن يَكِ تٌ نَ قٍ تٌ، عٍ نَشَ عَ قَلَ عَ بّ، «مَرِفِ، مُشُ شَ يَامَرِ قِ تّ شَ فٌرٌ كٍلِ كٌورٍ، عَ شَ عٍ رَتْن؟»

⁵⁵كْنْ عِسَ نَشَ عَ يَ رَقِندِ عٍ مَ، عَ وْيّن شْرْشْي قَلَ عٍ بّ.

⁵⁶نَ تّمُي، عٍ نَشَ سِفَ تَا فبّتّ.

⁵⁷عٍ تٌ نُ كِرَ شْن مَ، شّمّ ندٍ نَشَ قَ عَ قَلَ عِسَ بّ، «عِ سِفَ دّدّ، ﭑ نَ عِ قْشْ رَ.»

⁵⁸عِسَ نَشَ عَ يَابِ، «شُلُمَسٍ شِمَ يِلِ كُي. شْنِ شِمَ عَ تّي كُي. كْنْ دّدّ مُ نَ عَدَ مَ شَ دِ بّ عَ عَ شُنيِ سَمَ دّننَشّ.»

⁵⁹عِسَ مَن نَشَ عَ مَسٍن مِشِ فبّتّ ندٍ بّ، «بِرَ ﭑ قْشْ رَ.» كْنْ عَ كَنيِ نَشَ عَ يَابِ، «مَرِفِ، عَ لُ ﭑ شَ سِفَ، ﭑ شَ سَ ﭑ بَبَ رَفَتَ سِندٍن.»

⁶⁰عِسَ نَشَ عَ يَابِ، «عَ لُ قَشَمِشِيٍ نَن شَ عٍ شَ قَشَمِشِيٍ رَفَتَ. عِ تَن شَ سِفَ، عِ شَ سَ مِشِيٍ كَوَندِ عَلَ شَ مَنفّيَ نِينِ رَ.»

⁶¹مِشِ فبّتّ قَن نَشَ عَ قَلَ عَ بّ، «مَرِفِ، ﭑ بِرَ مَ نّ عِ قْشْ رَ، كْنْ عَ لُ ﭑ شَ سِفَ ﭑ شْنيِ، ﭑ شَ سَ ﭑ حُنفُ ﭑ مَ مِشِيٍ مَ.»

⁶²كْنْ عِسَ نَشَ عَ يَابِ، «مِشِ يٌ نَشَن سَارِ سُشُمَ عَ نُ قَ عَ شَنبِ مَتٌ، عَ كَنيِ مُ دَشَ عَ شَ وَلِ سُشُ عَلَ شَ مَنفّيَ نِينِ بّ.»