Duku 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Sesɑɑ Okusiti do tú dìì mɔ̀nnì okpɑ̀ɑ̀tì, kɛ́ɑ̃nnɛ́ mukɑ̀mmù ketimù o kó kɛtenkɛ̀ kɛmɔu miɛkɛ.

²Dɛ kó mukɑ̀mmù ketimù do ɑ̃nnɛ́ Kiriniisi tú dìì mɔ̀nnì ndi kùmɑ̀ndɑ́ɑ̀ Sidii kó kutempɛ̃ mmiɛkɛ.

³Kɛ̀ bɛnìtìbɛ̀ bɛmɔu nkɔrì bɑ́ wè o yɛmbɛ̀ ɛì kɛ̀ bɛ̀ wɑ̃̀ũ bɛ yètɛ̀.

⁴Kɛ̀ Sosɛfuu ítɛ́ Nɑnsɑrɛti Kɑdidee tempɛ̃, kɛ́kɔtɛ Dɑfiti kó dihɛì bɛ̀ tú dì Bɛtideɛmmu Sudee kó kutempɛ̃ mmiɛkɛ, kɛ yɛ̃́ ò tumɛ̀ Dɑfiti kó kunɑɑ̀mùnkù kou nwe,

⁵kɛ bo wɑ̃ri o yètìrì kɛ nɛínɛ̀ Mɑɑri o pokù kòò pùó.

⁶Kɛ̀ bɛ̀ mbo Bɛtideɛmmu kɛ̀ dɛ̀ yɑ̀ɑ tuɔkɛnɛ̀ Mɑɑri bo pɛitɛ́mɛ̀.

⁷Kòo pɛitɛ́ o kóò po, kóò pɔ̃ũ nkuyɑ̀ɑ̀kù kɛ dɔú nyiwũɔ̃ yonnɛ̀ kùù nɛnkù miɛkɛ, kɛ yɛ̃́ bɛmbɛ do í pɛ̀tɛ́mɛ̀ mɛfíè ntɛpɔ̀ɔ̀cĩ́ɛ̃̀tɛ̀ miɛkɛ.

⁸Kɛ sɔ̃́ mbɛpecɛ̃mbɛ mɑbɛ̀ bo Bɛtideɛmmu kó dɛpɑɑ nkɛyènkɛ̀, kɛ bɑɑ bɛ pe.

⁹Kɛ̀ Kuyie ntɔ̃nnìi kɔtoo bɛ borɛ̀, kɛ̀ Kuyie nkó kuwennikuu bɛ̀ fitɛ́ kɛ̀ kufɔ̃wɑɑ́ mbɛ̀ ɑutɛ́.

¹⁰Kɛ̀ Kuyie ntɔ̃nnìi bɛ̀ nɑ̀kɛ́ kɛ dɔ̀: Kufɔ̃wɑɑ́ mbɑ́ɑ́ di pĩ́, n di tɔní Tinɑ́ɑǹsɑ̀ɑ̀tì nti tìì yó ntú kubotí kumɔu kó kuyɛǹnɑɑtí.

¹¹Bɛ̀ di pɛitɛ́mu yíe Kirisi Odɛɛtíwè, ti Yiɛ̀ nDɑfiti kó dihɛì miɛkɛ.

¹²Ntɛnɛ̀ dɛ̀ɛ̀ yó nte kɛ̀ dí ò bɑntɛ́nɛ̀, di bo yɑ̀ dɛbirɛ kɛ̀ dɛ̀ pũɔ̃́ kuyɑ̀ɑ̀kù kɛ́duɔ́ iwũɔ̃ yonnɛ̀ kùù nɛnkù miɛkɛ.

¹³Dɛndɛ bɑ̀mbɑ̀ nkɛ̀ Kuyie nkó yɛtɔ̃rɛ̀ tɛyɛ̀ɛ cútɛ́ní kɛĩ́nkɛ̀ pɛ́u kɛ́wɛ̃nnɛ́nɛ̀ Kuyie ntɔ̃nnì kɛ̀ yɛ̀ nsɑ̃ntí Kuyie nkɛ tú:

¹⁴Kuyie nyètìrì ndɛu kɛĩ́nkɛ̀ miɛkɛ, kɛ̀ ku kó mɛsɑ̀ɑ̀ nní mbonɛ̀ bɛnìtìbɛ̀ ku dɔ́ bɛ̀ kɛtenkɛ̀ ĩ́nkɛ̀!

¹⁵Kuyie ntɔ̃rɛ̀ wɛ̃̀tɛ dìì mɔ̀nnì kɛĩ́nkɛ̀ kɛ̀ bɛpecɛ̃mbɛɛ nɑ́kɛ́ bɛmɑ́ɑ̀ kɛ dɔ̀: Ti kɔtɛnɛ̀ Bɛtideɛmmu kɛ́yɑ̀ dɛ̀ɛ̀ dɔ̀ɔ̀, ti Yiɛ̀ ntì nɑ̀kɛ́ dɛ̀ɛ̀ kpɛ́í.

¹⁶Kɛ̀ bɛ̀ɛ ítɛ́ mɛcɑ̃ɑ̃ nkɛ́kɔtɛ kɛ́yɑ̀ Mɑɑri nɛ̀ Sosɛfu nɛ̀ dɛbirɛ kɛ̀ dɛ̀ duɔ́ iwũɔ̃ yonnɛ̀ kùù nɛnkù miɛkɛ.

¹⁷Bɛ̀ yɑ̀ dìì mɔ̀nnì dɛbirɛ kɛ́ bɛ̀ nɑ̀kɛ́ Kuyie ntɔ̃nnì do bɛ̀ nɑ̀kɛ́ tì dɛ kó dɛbirɛ ĩ́nkɛ̀.

¹⁸Kɛ̀ dɛ̀ɛ di bɛ̀ɛ̀ kó dimɑ̀ɑ̀ kèè bɛpecɛ̃mbɛ nɑ́ɑ́ ntì.

¹⁹Kɛ̀ Mɑɑri tì ɑ̃ɑ̃̀ o yɛ̀mmɛ̀ kɛ toti o yɛ̀mmɛ̀ ti ĩ́nkɛ̀.

²⁰Kɛ̀ bɛpecɛ̃mbɛ nwɛ̃ti kɛ sɑ̃ntí Kuyie nkɛ dɛ́úkùnko ku yètìrì bɛ̀ kèè tì kɛ tì yɑ̀ ti kpɛ́í, nkɛ yɛ̃́ dɛ̀ do dɔ̀ɔ̀mɛ̀ Kuyie ntɔ̃nnì bɛ̀ nɑ̀kɛ́ mɛ̀ɛ̀ botí nku.

²¹Kɛ̀ dɛ̀ɛ tuɔkɛ diyiè niínnì bɛ̀ yóó cɑ̃ntɛ́ dì dɛbirɛ, kɛ̀ bɛ̀ɛ dɛ̀ yú kɛ dɔ̀ Yesu, Kuyie ntɔ̃nnì do ò yu dì bɑ́ bɛ̀ mu nyí ò pùó.

²²Mɔyiisi do dɔú nyìì kuɔ́ tùɔ̀kɛ dìì mɔ̀nnì, Sosɛfu nɛ̀ Mɑɑri kɛ̀ bɛ̀ɛ kɔtɛnɛ̀ dɛbirɛ Sedisɑdɛmmu kɛ̀ bo dɛ̀ bɛnkɛ Kuyie kɛ́dɔɔ̀ ikuɔ́ mɛwénkùmɛ̀ kpɛyi,

²³tì wɑ̃̀rimɛ̀ ikuɔ́ miɛkɛ kɛ tú bɛ̀ níí duɔ́ bɛ̀ɛ̀ tu Mpo bɛ kó dimɑ̀ɑ̀ Kuyie.

²⁴Sosɛfu nɛ̀ Mɑɑri kɛ̀ bɛ̀ɛ kɔtɛ kɛ́dɔɔ̀ ikuɔ́ yɛ̃mmɛ̀, kɛ́kuɔ yɛkpɛtìnɔ́nkperɛ yɛ̀dɛ́ɛ̀ yoo sinɔ́nkpeé mɔ́mmɔnsi sìdɛ́sì.

²⁵Dɛ̀ do sɔ̃́ nhonìtì mɔù weè bo Sedisɑdɛmmu kòo yètìrì tú Simmɛɔ̃ɔ̃, kòo dɔ̀ɔ̀ri Kuyie ndɔ́ dɛ̀ kɛ dé Kuyie kɛ̀ Muyɑɑ́nsɑ̀ɑ̀mù ò pìɛ́kɛ́, kòo bɑ̀ɑ Isidɑyɛɛribɛ kóo dɛɛtíwè.

²⁶Kɛ yɛ̃́ Muyɑɑ́nsɑ̀ɑ̀mù do ò nɑ̀kɛ́mɛ̀ kɛ dɔ̀ ò bo yɑ̀ Kirisi Odɛɛtíwè, Kuyie ntɔ̃nní wè, kɛ nɛ́ nɑ kɛ́kú.

²⁷Kɛ̀ Muyɑɑ́nsɑ̀ɑ̀mùu niitɛ́ Simmɛɔ̃ɔ̃ kòo tɑ Kuyie ncĩ́ɛ̃̀tɛ̀ Yesu yɛmbɛ̀ ò kɔ̀rinní dìì mɔ̀nnì kɛ bo dɔɔ̀ ikuɔ́.

²⁸Kɛ̀ Simmɛɔ̃ɔ̃ cɔutɛ́ dɛbirɛ kɛ́sɑ̃ntɛ Kuyie nkɛ dɔ̀:

²⁹N Yiɛ̀ nhɑ do nɑ̀kɛ́ tì dɔ̀ɔ̀mu, di mmɔ̀nnì yóu mí ɑ kóo tɔ̃ntì kɛ̀ n kú nɛ̀ diwɛ̀ì.

³⁰Kɛ yɛ̃́ n yɑ̀mɛ̀ nɛ̀ n nuɔ ɑ duɔnní wèè dɛɛtíwè,

³¹ibotí imɔu kpɛ́í nkɛ ɑ ò duɔnnímɛ̀,

³²weè tú kuwenniku kùù yóó míítɛ́ yɛbotɛ̀, kɛ́duɔ́ nyIsidɑyɛɛribɛ disɑ̃nni.

³³Kɛ̀ dɛ̀ɛ di dɛbirɛ cicɛ nɛ̀ dɛ yɔ̃ Simmɛɔ̃ɔ̃ nɑ̀ɑ́ tì dɛbirɛ kpɛ́í.

³⁴Kɛ̀ Simmɛɔ̃ɔ̃ mɔɔ Kuyie nkó mɛsɑ̀ɑ̀ mbɛ kpɛ́í nkɛ́deè kɛ́nɑ́kɛ́ Mɑɑri kɛ dɔ̀: Dɛbirɛ diɛ nkpɛ́í nkɛ Isidɑyɛɛribɛ pɛ́u yóó duómɛ̀ kɛ̀ pɛ́uu ítɛ́. Dɛ̀ yó ntú Kuyie nkó dibɛnkɛ̀rì ndi kɛ cé ntinɛìtì bɛsṹkùbɛ̀ cuokɛ̀.

³⁵Mɛyɛ̀mmɛ̀ mɛ̀ɛ̀ do sɔrì kɛ̀ mɛ̀ɛ feitɛ́. Kɛ̀ fɔ̃́ mMɑɑri, dɛmɔu mɛmmɛ dɛ̀ bo ndò ndisiè kɛ́kɔutɛ ɑ yɛ̀mmɛ̀.

³⁶Kɛ sɔ̃́ nKuyie mpɑ̃ɑ̃nɑ́ɑǹtì nɑ́ɑǹtò mɔù dɛ̀ bo kɛ̀ bɛ̀ ò tu Anni, Fɑnniyɛɛri kóo sɑpɑ̀ɑ̀, Asɛɛ kó kubotí kou kɛ kòtɛ́ mɛdiɛ̀, ò do yóó yenkɛ kɛ mu nyí yɛ̃́ onitidɔ̀ù kɛ̀ bɛ̀ mmɔkɛ yɛbie nyɛ̀yiekɛ̀ kòo dɔùu kú.

³⁷Kòo ntú okúpokù kɛ́tuɔkɛnɛ̀ yɛbie nsipísìni nɛ̀ yɛ̀nɑ̀ɑ̀ kɛ bɑ́ɑ́ nKuyie, Kuyie ncĩ́ɛ̃̀tɛ̀ miɛkɛ, kɛ bou dinùù.

³⁸Kòo múnkɛɛ tuɔkɛní dɛ mɔ̀nnì kɛ́sɑ̃ntɛ Kuyie nkɛ́nɑ́kɛ́ Yesu kpɛ́í Sedisɑdɛmmu kɔbɛ bɛ̀ɛ̀ do bɑɑ Odɛɛtíwè.

³⁹Mɑɑri nɛ̀ Sosɛfu bɛ̀ dɔ̀ɔ̀ dìì mɔ̀nnì Kuyie nkó ikuɔ́ kɛ́deè kɛ́wɛ̃tɛ kɛ́kònnɛ̀ dɛbirɛ Nɑnsɑrɛti Kɑdidee kó kutempɛ̃ mmiɛkɛ.

⁴⁰Kɛ̀ dɛbirɛ nkótírí kɛ kpénkú kɛ mɔkɛ mɛciì nkɛ̀ Kuyie nkó mɛsɑ̀ɑ̀ ndɛ̀ bonɛ̀.

⁴¹Yesu yɔ̃ nɛ̀ o cicɛ bɛ̀ do ɔ̃ɔ̃ kɔtɛmu bɑ́ dìì benni Sedisɑdɛmmu diyentɛ́bɑnni.

⁴²Yesu mɔkɛ dìì mɔ̀nnì yɛbie ntɛpíítɛ̀ nɛ̀ yɛ̀dɛ́ɛ̀ kɛ́nɛinɛ̀ o yɛmbɛ̀ kɛ̀ bɛ̀ɛ kɔtɛ, kɛ yɛ̃́ ò tùɔ̀kɛmɛ̀ o mɔ̀nnì.

⁴³Dibɑnni kó yɛwe dèè dìì mɔ̀nnì Mɑɑri nɛ̀ Sosɛfu kɛ̀ bɛ̀ nkũnti bɑ́ bɛ̀ í ndɑ̀ɑ̀tɛ kɛ dò nYesu í bɛ̀ nɛínɛ̀, kɛ̀ Yesu nkpɑɑ́ Sedisɑdɛmmu.

⁴⁴Kɛ̀ bɛ̀ dɔ̀ kucɛ diyiè dìmɑ́ɑ̀ kɛ yɛ̃́ kɛ tú Yesu nɛínɛ̀ bɛtɔbɛ̀, kóò mɔ̀ńtɛ́ kɛ́ketɛ́ o wɑmmù bɛ cɛ̃́ĩ kɔbɛ nɛ̀ bɛ nɛ́pobɛ̀ borɛ̀.

⁴⁵Bɑ́ bɛ̀ í nhò yɑ̀ kɛ́wɛ̃tɛ Sedisɑdɛmmu koò wɑnti,

⁴⁶kóò yɑ̀ diyiè tɑ̃ɑ̃́nnì yiè Kuyie ncĩ́ɛ̃̀tɛ̀ miɛkɛ kòo sokɛ́ ikuɔ́ nìùbɛ̀ cuokɛ̀ kɛ̀ bɛ̀ nɑ̀ɑ́ nkòò kèḿmú kɛ bɛ̀ bèkú tinɑ́ɑǹtì.

⁴⁷Kɛ̀ dɛ̀ɛ di bɛ̀ɛ̀ kó dimɑ̀ɑ̀ dɛ̀ bo mɛciì nhò mɔ̀kɛ mɛ̀ nɛ̀ ò bɛ̀ tɛ̃́nnìnko mɛ̀ɛ̀ botí.

⁴⁸O cicɛ nɛ̀ o yɔ̃ bɛ̀ ò yɑ̀ dìì mɔ̀nnì kɛ̀ dɛ̀ɛ bɛ̀ di mɛdiɛ̀ nkòo yɔ̃ ò bekɛ kɛ dɔ̀: M birɛ, dɛ̀ dòmmɛ kɑ̀ɑ ti dɔ̀ɔ̀ mɛmmɛ? Mí nnɛ̀ ɑ cicɛ ti dɑ wɑmmúmu kɛ̀ ti yɛ̀mmɛ̀ cɑ̀ɑ̀rɛ̀.

⁴⁹Kòo bɛ̀ tɛ̃̀ńnɛ́ kɛ dɔ̀: Di n wɑnti kɛ yɛ̃ mbɑ? Di í yɛ̃́ kɛ dɔ̀ n dò nkɛ́pĩ́ n cicɛ tɔ̃mmɑ́ɑ̀?

⁵⁰Bɛ̀ mɛ nyí mbɑntɛ́ ò dɔ́ kɛ́ bɛ̀ nɑ̀kɛ́ tì.

⁵¹Kɛ̀ Yesu bɛ̀ nɛinɛ̀ kɛ̀ bɛ̀ɛ wɛ̃tɛ kɛ́kò nNɑnsɑrɛti, kòò nyíé mbɛ kpɛti kòo yɔ̃ nhɑ̃ɑ̃̀ dɛ̀ɛ̀ kó dimɑ̀ɑ̀ dɔ̀ɔ̀ri o yɛ̀mmɛ̀ miɛkɛ.

⁵²Kɛ̀ Yesu nkótírí kòo ciì ndɛ̀úkú kòo dɔɔrìmɛ̀ nwenni Kuyie nnɛ̀ bɛnìtìbɛ̀.