Duku 4

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Kɛ̀ Yesu nyɛ̀tìní kukó nSuditɛ̃ɛ̃ kɛ̀ Muyɑɑ́nsɑ̀ɑ̀mù ò pìɛ́kɛ́ kóò tɑnnɛ́ dikpɑ́ɑ̀ miɛkɛ.

²Kòò dɔ̀ yɛwe sipísìnɑ̀ɑ̀ kɛ̀ dibɔɔ̀ ò beú. Dɛ kó yɛwe miɛkɛ ò do í yo ndɛ̀mɑrɛ̀ kɛ̀ dikònnìi ò pĩ.

³Kɛ̀ dibɔɔ̀ ò nɑ̀kɛ́ kɛ dɔ̀: Kɑ̀ɑ tu Kuyie mBirɛ ndɛ, duɔ́ nkɛ̀ ditɑ̃́rì dii nnɑɑ́ mmudiì.

⁴Kɛ̀ Yesu dì tɛ̃̀ńnɛ́ kɛ dɔ̀: Tì wɑ̃̀rimu kɛ tú: Onìtì í fòùnɛ̀ mudiì mɑ́ɑ̀.

⁵Kɛ̀ dibɔɔ̀ ò dèkɛnɛ̀ ditɑ̃rì diɛrì ĩ́nkɛ̀ kóò bɛnkɛ dimɔ̀nnì dimɑ́ɑ̀ kɛtenkɛ̀ kó yɛkpɑ̀ɑ̀tìyɔ yɛmɔu,

⁶kóò nɑ̀kɛ́ kɛ dɔ̀: N yóó dɑ duɔ́mmu yɛ nkpɑ̀ɑ̀tìyɔ yɛmɔu nɛ̀ yɛ kpetì, kɛ yɛ̃́ míì dɛ̀ temɛ̀, kɛ dɛ̀ duɔ̀ n dɛ̀ dɔ́nɛ̀ wè.

⁷Dɛmɔu miɛ nfɔ̃́ɔ̃̀ yó ndɛ̀ te, kɛ̀ nsɑ̀ kɑ̀ɑ nìńkú n yììkɛ̀.

⁸Kɛ̀ Yesu dì tɛ̃̀ńnɛ́ kɛ dɔ̀: Ti wɑ̃̀rimu kɛ tú: Á mbɑ́ɑ́ nhɑ Yiɛ̀ nKuyie mmɑ́ɑ̀ kɛ́mpĩ́ nkuù tɔ̃mmú.

⁹Kɛ̀ dibɔɔ̀ ò kɔ̀tɛnɛ̀ Sedisɑdɛmmu kóò dèkɛnɛ̀ Kuyie ncĩ́ɛ̃̀tɛ̀ ĩ́nkɛ̀ kóò nɑ̀kɛ́ kɛ dɔ̀: Kɑ̀ɑ tú Kuyie mBirɛ ndɛ, puuo,

¹⁰kɛ yɛ̃́ tì wɑ̃̀rimɛ̀ kɛ tú: Kuyie mbo duɔ́ ndinùù ku tɔ̃rɛ̀ kɛ̀ yɛ̀ ndɑ bɑɑ,

¹¹kɛ́ dɑ cɔ́útɛ́ bɑ́ ɑ nɑɑ̀cɛ̀tɛ̀ bɑ́ɑ́ bétɛ́ ditɑ̃́rì mɑrì.

¹²Kɛ̀ Yesu dì tɛ̃̀ńnɛ́ kɛ dɔ̀: Ti wɑ̃̀rimu kɛ tú: Á bɑ́ɑ́ bennɛ́ ɑ Yiɛ̀ nKuyie.

¹³Kɛ̀ dibɔɔ̀ ò bennɛ́ mɛbennímɛ̀ mɛmɔu kɛ̀ mɛ̀ɛ deè kɛ̀ dìi ítɛ́ kɛ́mbɑɑ dimɔ̀nnì tɛrì.

¹⁴Kɛ̀ Yesu nwɛ̃ti Kɑdidee kó kutempɛ̃ nkɛ̀ Muyɑɑ́nsɑ̀ɑ̀mù ò pìɛ́kɛ́ nɛ̀ muwɛ̃rímú kɛ̀ bɛ̀ nnɑ́ɑ́ nho kpɛ́í ndɛ kó kutempɛ̃ nkumɔu miɛkɛ.

¹⁵Kòo ntiè mbɛnìtìbɛ̀ titííntouti miɛkɛ kɛ̀ bɛnìtìbɛ̀ bɛmɔu nhò sɑ̃ntí.

¹⁶Kɛ̀ Yesu kɔtɛ Nɑnsɑrɛti ò bìíkú dɛ̀, kɛ tó tɑ kutííntouku tɛom̀pùtɛ̀ yiè kɛ́ítɛ́ kɛ bo kɑɑ̀ ndipɑ́tíri.

¹⁷Kɛ̀ bɛ̀ɛ ò duɔ́ nKuyie mpɑ̃ɑ̃nɑ́ɑǹtì nɑ́ɑǹtò Esɑii kó dipɑ́tíri kòo pĩntɛ tì wɑ̃̀ri dìì bòrì kɛ tú:

¹⁸Ti Yiɛ̀ nKuyie nkó muyɑɑ́ mmuù bo n yĩ́nkɛ̀, kù n tɑ̃ɑ̃tɛ́mu kɛ còú n yuu mɛkùɔ̀ kɛ n tɔ̃, kɛ̀ m bo nɑ́kɛ́ Tinɑ́ɑǹsɑ̀ɑ̀tì bɛsénnìbɛ̀, kɛ́dɛɛtɛ́ tidɑɑtì, kɛ́wéi ntiyũ̀ɔ̃̀ntì, kɛ́dɛɛtɛ́ bɛ̀ fɛ̃́ũnko bɛ̀,

¹⁹kɛ́nɑ́kɛ́ Kuyie nkó mɛsɑ̀ɑ̀ mbenni tùɔ̀kɛmɛ̀.

²⁰Kòo deè kɛ́kpɛ́ú ndipɑ́tíri kɛ́duɔ́ nho tɔ̃ntì kɛ́kɑri kɛ̀ bɛ̀ɛ kó dimɑ̀ɑ̀ bo kutííntouku miɛkɛ kɛ̀ bɛ̀ nhò wùó.

²¹N kòo bɛ̀ nɑ̀kɛ́ kɛ dɔ̀: Di bo kɛ yo tìì nɑ́ɑǹtì yíe ntì dɔ̀ɔ̀mu.

²²Kɛ̀ dɛ̀ɛ bɛ̀ di bɛmɔu kɛ̀ bɛ̀ nhò sɑ̃ntí Tinɑ́ɑǹsɑ̀ɑ̀tì ò nɑ̀ɑ́ ntì kpɛ́í, kɛ́mbékú bɛmɑ́ɑ̀ kɛ tú: Dɛ̀ í dò nSosɛfu birɛ ndɛɑ̀?

²³Kɛ̀ Yesu bɛ̀ nɑ̀kɛ́ kɛ dɔ̀: N yɛ̃́mu kɛ dò ndi bo n nɑ́kɛ́ dinɑ́ɑǹhɑ̃ntírì dìì tu: Otɑ̀ntì tɑɑ̀ nhɑmɑ́ɑ̀. Kɛ n nɑ́kɛ́ kɛ dɔ̀: Ti kèè kɛ̀ bɛ̀ yɛ̃ nhɑ dɔ̀ɔ̀ dɛ̀ Kɑpɛnnɑummu, dɔɔ̀ dɛ diɛ nhɑ ɛì.

²⁴Kɛ̀ Yesu yíɛ́ kɛ́bɛ́i nkɛ dɔ̀: N di nɑ́ɑ́ mmɔ́mmuɔ nwe bɛ̀ ɔ̃ɔ̃ í mpɛ́nsìrì Kuyie mpɑ̃ɑ̃nɑ́ɑǹtì nɑ́ɑǹtò mɔù o ɛì.

²⁵Bɛkúpobɛ̀ do sũmu Isidɑyɛɛribɛ miɛkɛ, Edii kó dimɔ̀nnì, fɛtɑɑfɛ̀ do yiɛtí dìì mɔ̀nnì kɛ dɔ̀ yɛbie nyɛtɑ̃ɑ̃ti nɛ̀ dikéè, kɛ̀ dikònnì diɛrìi tɑnní dihɛì.

²⁶Kuyie mɛ nyí nduɔ́ nkɛ̀ Edii kɔtɛ bɛ kóò mɔù borɛ̀, kɛ́duɔ́ nkòo kɔtɛ okúpokù mɔù borɛ̀ ndɛ kòo ɑ̃ Sɑdɛputɑɑ, Sitɔ̃ɔ̃ kó kɛtenkɛ̀ miɛkɛ.

²⁷Yɛkùɔ̀ mmúnkɛ do sũmu Isidɑyɛɛribɛ miɛkɛ Kuyie mpɑ̃ɑ̃nɑ́ɑǹtì nɑ́ɑǹtò Edisee kó dimɔ̀nnì. Ò mɛ nyí mmiɛkùnnɛ yɛ kó dìmɑrì kɛ́miɛkùnnɛ Nɑɑmɑɑ Sidii kó kɛtenkɛ̀ kou nwe omɑ́ɑ̀.

²⁸Bɛ̀ kèè dìì mɔ̀nnì dɛ kó tinɑ́ɑǹtì kutííntouku miɛkɛɛ kɛ̀ bɛ̀ miɛkɛɛ pɛikɛ bɛmɔu.

²⁹Kɛ̀ bɛ̀ɛ ítɛ́ kóò pĩ nkɛ́dekɛnɛ̀ bɛ̀ do mɑɑ́ dìì tɑ̃rì ĩ́nkɛ̀, kɛ bo ò tèntɛní kudúókù miɛkɛ.

³⁰Kɛ̀ Yesu yɛ̀ bɛ cuokɛ̀ kɛ́pɛ̃ɛ̃tɛ́.

³¹Kɛ̀ Yesu kɔtɛ Kɑpɛnnɑummu Kɑdidee kó kutempɛ̃ mmiɛkɛ kɛ́ntiè mbɛnìtìbɛ̀ tɛom̀pùtɛ̀ yiè.

³²Kɛ̀ dɛ̀ɛ bɛ̀ di mɛdiɛ̀ nkɛ yɛ̃́ ò do bɛ̀ nɑ̀ɑ́nnɛ̀mɛ̀ muwɛ̃rímú mmu.

³³Kòo nìtì mɔù bo kutííntouku miɛkɛ, kɛ̀ dibɔɔ̀ ò tɑ, kòo kuɔ́nko mɛdiɛ̀ nkɛ dɔ̀:

³⁴Ti kpɛti dòmmɛ Yesu Nɑnsɑrɛti kou, ɑ kɔ̀tɛní kɛ bo ti kuɔmɑɑ̀? N yɛ̃́mu kɛ dò nhɑ tú Kuyie ntɔ̃nní wè, wèè kpɑ mɛyɛi.

³⁵Kɛ̀ Yesu pɛ́i ndibɔɔ̀ kɛ dɔ̀: Cĩ́ɛ̃́kɛ́ kɛ́yɛ̀ onìtì yie mmiɛkɛ! Kɛ̀ dìì ò bɔ mbɛnìtìbɛ̀ cuokɛ̀, kɛ́yɛ̀, bɑ́ dì í ò dɔ̀ɔ̀ mɛyɛi mmɑmɛ̀.

³⁶Kɛ̀ dɛ̀ɛ bɛ̀ di bɛmɔu kɛ̀ bɛ̀ mbékú bɛtɔbɛ̀ kɛ tú: Ɔ̃̀mmu wɛ̃rímú bo onìtì yie nnɑ́ɑǹtì miɛkɛ, kòo pɛ́inko yɛbɔkɛ̀ kɛ̀ yɛ̀ yìɛ̀?

³⁷Kɛ̀ bɛ̀ nnɑ́ɑ́ nYesu kpɛ́í dɛ kó kɛtenkɛ̀ kɛmɔu miɛkɛ.

³⁸Kɛ̀ Yesu yɛ̀ kutííntouku miɛkɛ kɛ́kɔtɛ Simɔɔ cĩ́ɛ̃̀tɛ̀ kɛ sɔ̃́ nho pokù yɔ̃ mɔ nkòo kɔ̃̀ntì tònnì mɛdiɛ̀, kɛ̀ bɛ̀ɛ bɑ́ntɛ̀ Yesu kɛ dɔ̀ wèe ò miɛkùnnɛ.

³⁹Kòo sĩ́nnɛ́ o ĩ́nkɛ̀ kɛ́pɛ́i mmumɔmmú kɛ̀ mùu deè, kòo pɑ̃̀nkɛɛ ítɛ́ kɛ́wɑɑ́ mbɛ̀ bo di mù.

⁴⁰Diyiè tɑ dìì mɔ̀nnì bɛ̀ɛ̀ kó bɛnìtìbɛ̀ do mɔ mmumɔmmú mubotí mubotí, kɛ̀ bɛ̀ mbɛ̀ kɔ̀rìnní Yesu borɛ̀ kòo bɛ̀ nɔnku o nɔu kɛ bɛ̀ miɛkùnko.

⁴¹Kɛ̀ yɛbɔkɛ̀ ńyìɛ̀ bɛnìtìbɛ̀ pɛ́u kɛ wékíí kɛ tú: Kuyie mBirɛ ndɛ! Kɛ̀ Yesu nyɛ̀ kpɑ̀nnɛ̀ kɛ tú yɛ̀ bɑ́ nnɑ́ɑ́ nkɛ yɛ̃́ yɛ̀ yɛ̃́mɛ̀mu kɛ dò nhò tú Kirisi.

⁴²Dɛ̀ wentɛ́ dìì mɔ̀nnì kɛ̀ Yesu yɛ̀ dihɛì kɛ́kɔtɛ omɑ́ɑ̀ borɛ̀ kɛ̀ bɛnìtìbɛ̀ pɛ́u nhò wɑnti, kóò yɑ̀ kɛ́ndɔ́ ò nkpɑɑ́ bɛ borɛ̀ kɛ̀ bɑ́ɑ́ ítɛ́.

⁴³Kɛ̀ Yesu bɛ̀ nɑ̀kɛ́ kɛ dɔ̀: N dò nkɛ́nɑ́kɛ́mu Tinɑ́ɑǹsɑ̀ɑ̀tì Kuyie nkpɑ̀ɑ̀tìyuu kpɛti yɛhɛkɛ̀ tɛyɛ̀ kɛ yɛ̃́ Kuyie nni ntɔ̃nnímɛ̀ dɛɛ̀ kpɛ́í.

⁴⁴Kòo kɔtɛ kɛ́nnɑ́ɑntɛ Kuyie nnɑ́ɑǹtì Kɑdidee kó titííntouti miɛkɛ.