SAN LUCAS 9:31-62

³¹Loꞌo juaꞌa̱ tyucui ñaꞌa̱ su ndu̱ nguꞌ ntyijiꞌi̱ sca xee nu lye tsa ñaꞌa̱. Nchcuiꞌ nguꞌ loꞌo Jesús jiꞌi̱ lcaa ñaꞌa̱ cña nu cua nda ycuiꞌ Ndyosi Sti yu chaꞌ cuaꞌni yu nde loo la xi, nu loꞌo cajaa yu nde quichi̱ Jerusalén.

³²Masi ndyuꞌu tsa xcalá Pedro loꞌo xaꞌ tyaꞌa ndiꞌi̱ yu ca jua, pana tya tii nguꞌ; biꞌ chaꞌ naꞌa̱ nguꞌ biꞌ lcaa chaꞌ tsoꞌo jiꞌi̱ Jesús, loꞌo jiꞌi̱ tyucuaa nguꞌ jyoꞌo nu ngaꞌa̱ slo yu.

³³Nu loꞌo cua tyaa ti tyucuaa nguꞌ biꞌ, liꞌ nacui̱ Pedro jiꞌi̱ Jesús: ―Xuꞌna ―nacui̱―, tsoꞌo tsa chaꞌ ndiꞌi̱ ya nde. Cuiñá ya sna tyaꞌa chcuaꞌya: tsaca laca su tyiꞌi̱ ycuiꞌ nuꞌu̱, chaca su tyiꞌi̱ La Moisés, loꞌo chaca su tyiꞌi̱ La Elías ―nacui̱. Pana nu Pedro biꞌ ni, ná ngua cuayáꞌ tiꞌ yu ñiꞌya̱ ndyuꞌu chaꞌ nu nchcuiꞌ ycuiꞌ ca yu.

³⁴Tya nchcuiꞌ yu, loꞌo liꞌ ñaa sca coo nu ngüixi̱i̱ hichu̱ꞌ nguꞌ. Lye tsa ndyutsi̱i̱ nguꞌ su ntsuꞌu nguꞌ neꞌ coo biꞌ, chaꞌ lye tsa ñaꞌa̱ coo biꞌ.

³⁵Liꞌ nguañi xtyiꞌi sca ñati̱, pana hora ti ngua cuayáꞌ tiꞌ nguꞌ chaꞌ nchcuiꞌ ycuiꞌ Ndyosi laja coo biꞌ. ―La cuiꞌ yu re laca Sñiꞌ naꞌ; tyacaꞌa tsa yu ꞌna ―nacui̱ Ni―. Cuaꞌa̱ jyaca̱ ma̱ jiꞌi̱ chaꞌ nu chcuiꞌ yu re loꞌo ma̱ ―nacui̱ Ni.

³⁶Loꞌo cua ndyuna nguꞌ ñaꞌa̱ chaꞌ nu nchcuiꞌ ycuiꞌ Ndyosi jiꞌi̱ Jesús, liꞌ naꞌa̱ nguꞌ chaꞌ sca ti Jesús ndu̱ biꞌ. Cuaana tya ndyaa tiꞌi̱ nguꞌ; ni sca chaꞌ ngaꞌaa nchcuiꞌ nguꞌ loꞌo xaꞌ ñati̱, ñiꞌya̱ ngua chaꞌ nu naꞌa̱ nguꞌ siiꞌ caꞌya biꞌ.

³⁷Ca chaca tsa̱ nu loꞌo nguaꞌya nguꞌ siiꞌ caꞌya biꞌ, tyu̱u̱ tsa tyaꞌa nguꞌ ndyaa nguꞌ ndyacua tyaꞌa nguꞌ loꞌo Jesús.

³⁸Ndiꞌi̱ sca nu quiꞌyu laja ñati̱ quiñaꞌa̱ biꞌ nu cui̱i̱ nchcuiꞌ loꞌo Jesús: ―Mstru ―nacui̱ yu jiꞌi̱―, cuaꞌni chaꞌ tsoꞌo ñaꞌa̱ nuꞌu̱ xi jiꞌi̱ sñiꞌ naꞌ, chaꞌ sca ti biꞌ laca sñiꞌ naꞌ nu ntsuꞌu ꞌna.

³⁹Ntsuꞌu tsa̱ nxalú cuiꞌi̱ jiꞌi̱ yu, nduꞌni biꞌ chaꞌ cui̱i̱ nxiꞌya yu liꞌ; nxasu nu cuiꞌi̱ biꞌ jiꞌi̱ yu ñaꞌa̱ cuayáꞌ ndyuꞌu ngoꞌ tuꞌba yu. Cuxi tsa nduꞌni cuiꞌi̱ biꞌ loꞌo yu, chaꞌ ná ntajaꞌa̱ biꞌ culaá jiꞌi̱ yu.

⁴⁰Biꞌ chaꞌ lye tsa ndijña naꞌ jiꞌi̱ nu nguꞌ nu ndyaca tsaꞌa̱ jinuꞌu̱ chaꞌ culo nguꞌ jiꞌi̱ cuiꞌi̱ cuxi nu ngusñi jiꞌi̱ sñiꞌ naꞌ, pana ná ngua jiꞌi̱ nguꞌ culo nguꞌ jiꞌi̱ tsiyaꞌ ti.

⁴¹Liꞌ nguxacui̱ Jesús chaꞌ jiꞌi̱ nguꞌ: ―Ná jlya tiꞌ ma̱ ꞌna tsiyaꞌ ti, cuꞌma̱ ñati̱ chalyuu ―nacui̱ Jesús―, chaꞌ cuxi tsa cresiya jiꞌi̱ ma̱. Ngaꞌaa tsoꞌo tyanu naꞌ slo ma̱, ngaꞌaa talo tyiquee naꞌ jiꞌi̱ ma̱ tsiyaꞌ ti ―nacui̱ Jesús jiꞌi̱ nguꞌ―. Ca̱a̱ loꞌo jiꞌi̱ sñiꞌ slo naꞌ ―nacui̱ Jesús jiꞌi̱ sti nu quicha biꞌ liꞌ.

⁴²Pana nu loꞌo ñaa nu quicha biꞌ cacua la, liꞌ nguxlyú cuiꞌi̱ cuxi biꞌ jiꞌi̱ yu quicha biꞌ nde lo yuu, loꞌo liꞌ lye tsa nguxalú cuiꞌi̱ jiꞌi̱ yu. Liꞌ ngulo Jesús cña jiꞌi̱ cuiꞌi̱ cuxi nu ntsuꞌu jiꞌi̱ yu chaꞌ tyuꞌu biꞌ tyaa, cua ndyaca tsoꞌo yu quicha biꞌ liꞌ. Cuati nacui̱ jiꞌi̱ sti yu chaꞌ ca̱a̱ quiꞌya jiꞌi̱ sñiꞌ, loꞌo liꞌ ndya Jesús jiꞌi̱ yu nu ngua quicha biꞌ jiꞌi̱ sti yu chaca quiyaꞌ.

⁴³Lcaa nguꞌ ndube tsa tiꞌ nguꞌ loꞌo ñaꞌa̱ nguꞌ chaꞌ tlyu nu ndyuꞌni ycuiꞌ Ndyosi. Lcaa nguꞌ ndiya tsa tiꞌ nguꞌ ñaꞌa̱ nguꞌ cña nu ndyuꞌni Jesús. Pana laja loꞌo ndube tiꞌ nguꞌ, liꞌ nacui̱ Jesús jiꞌi̱ nu nguꞌ nu ndyaꞌa̱ loꞌo yu:

⁴⁴―Cuaꞌa̱ jyaca̱ ma̱ jiꞌi̱ chaꞌ re, culacua xi tiꞌ ma̱ jiꞌi̱: Ntsuꞌu sca ñati̱ nu cujuiꞌ cresiya ꞌna jiꞌi̱ nguꞌ tisiya chaꞌ cuaꞌni cuxi nguꞌ loꞌo naꞌ, masi naꞌ nu cua nda Ni ꞌna lijya̱a̱ chaꞌ caca naꞌ ñati̱ ―nacui̱ Jesús.

⁴⁵Pana ná nda nu nguꞌ nu ndyaca tsaꞌa̱ jiꞌi̱ yu biꞌ cuentya, ná ngujui ñiꞌya̱ caca ca cuayáꞌ tiꞌ nguꞌ chaꞌ biꞌ; juaꞌa̱ ntsi̱i̱ tsa nguꞌ chaꞌ xcuane nguꞌ jiꞌi̱ ycuiꞌ Jesús ñiꞌya̱ tyuꞌu chaꞌ nu nchcuiꞌ yu loꞌo nguꞌ.

⁴⁶Loꞌo nu nguꞌ nu ndyaca tsaꞌa̱ biꞌ ni, lye tsa nchcuiꞌ tube nguꞌ ñiꞌya̱ nu tyaꞌa nguꞌ laca nu ndulo la chaꞌ jiꞌi̱.

⁴⁷Pana Jesús ni, hora ti ngua cuayáꞌ tiꞌ lcaa ñaꞌa̱ chaꞌ nu ntsuꞌu tyiquee nguꞌ. Liꞌ ngusñi yu yaꞌ sca nu piti, ngusta yu jiꞌi̱ nu piti cacua ti slo ycuiꞌ yu.

⁴⁸Liꞌ nchcuiꞌ yu loꞌo nguꞌ ndiꞌya̱: ―Loꞌo xtyucua ma̱ jiꞌi̱ cua ñaꞌa̱ ca ñati̱ cuentya jnaꞌ, masi ñati̱ ñiꞌya̱ laca nu piti re, la cuiꞌ juaꞌa̱ na nxtyucua ma̱ jnaꞌ laca ―nacui̱ Jesús―. Juaꞌa̱ nguꞌ nu tucuá cña jnaꞌ, loꞌo cña jiꞌi̱ ycuiꞌ Ndyosi tucuá nguꞌ biꞌ liꞌ, chaꞌ ycuiꞌ Ni laca nu nda jnaꞌ lijya̱a̱ ca slo cuꞌma̱. La cuiꞌ nu piti la jiꞌi̱ tyaꞌa ma̱, nu ná ndulo chaꞌ jiꞌi̱ biꞌ ntiꞌ ma̱, biꞌ laca nu ndulo la chaꞌ jiꞌi̱ cuentya jnaꞌ, ntiꞌ naꞌ.

⁴⁹Liꞌ nacui̱ Juan jiꞌi̱ Jesús: ―Mstru ―nacui̱―, cua naꞌa̱ ya chaꞌ ndu̱ chaca ñati̱ nu nclyo jiꞌi̱ cuiꞌi̱ cuxi nu ntsuꞌu jiꞌi̱ ñati̱ chacuayáꞌ jinuꞌu̱, nacui̱ yu. Biꞌ chaꞌ nguaꞌa ya jiꞌi̱ yu biꞌ, chaꞌ ngaꞌaa cuaꞌni yu juaꞌa̱, chaꞌ ná loꞌo yu biꞌ ndyaꞌa̱ yu ndyaca tsaꞌa̱ yu loꞌo ya.

⁵⁰Pana ndiꞌya̱ nacui̱ Jesús jiꞌi̱ liꞌ: ―Ná cuaꞌa ma̱ jiꞌi̱, chaꞌ sca ñati̱ nu ná nxu̱u̱ tyaꞌa loꞌo na, ná tyiqueeꞌ taca jiꞌi̱ biꞌ xtyucua jiꞌna.

⁵¹Nu loꞌo cua tyalaa ti tyempo chaꞌ tyaa Jesús nde cua̱, liꞌ ngüiñi tiꞌ yu chaꞌ tyaa yu nde Jerusalén.

⁵²Nda yu jiꞌi̱ nu nguꞌ nu ndyaca tsaꞌa̱ jiꞌi̱ yu chaꞌ tsaa nguꞌ tyucui̱i̱ nde loo la, chaꞌ chcuiꞌ nguꞌ loꞌo nguꞌ quichi̱ sube ti su tyeje tacui yu loꞌo nguꞌ. Liꞌ ndyaa nguꞌ biꞌ sca quichi̱ sube ti, sca quichi̱ tyi nguꞌ Samaria; ngulana nguꞌ su tyiꞌi̱ nguꞌ liꞌ.

⁵³Pana ná ntajaꞌa̱ nguꞌ quichi̱ sube biꞌ ta nguꞌ chacuayáꞌ chaꞌ tyanu nguꞌ biꞌ quichi̱, chaꞌ jlo tiꞌ nguꞌ quichi̱ biꞌ, chaꞌ nde quichi̱ Jerusalén tsaa nguꞌ.

⁵⁴Nu loꞌo ndyuna tyaꞌa ndyaꞌa̱ Jesús chaꞌ biꞌ, Jacobo loꞌo Juan naa nu nguꞌ biꞌ, liꞌ nacui̱ nguꞌ biꞌ jiꞌi̱ Jesús: ―Cusuꞌ ―nacui̱ nguꞌ biꞌ―, ¿ha ná ntiꞌ nuꞌu̱ chaꞌ jña ya quiiꞌ nde cua̱ chaꞌ tyalú nde lo yuu su ndiꞌi̱ nguꞌ jua? Cuaꞌni tye biꞌ tsiyaꞌ ti jiꞌi̱ nguꞌ jua, tyaqui̱ nguꞌ. Juaꞌa̱ nguaꞌni jyoꞌo cusuꞌ Elías saꞌni ―nacui̱ nguꞌ jiꞌi̱ Jesús.

⁵⁵Liꞌ ñaꞌa̱ tsa Jesús jiꞌi̱ nguꞌ biꞌ, nchcuiꞌ yu loꞌo nguꞌ biꞌ liꞌ: ―Ná nda ma̱ cuentya tsiyaꞌ ti ñiꞌya̱ ndyuꞌu chaꞌ nu nchcuiꞌ ma̱ ―nacui̱ Jesús―, siꞌi Xtyiꞌi ycuiꞌ Ndyosi laca nu nguluꞌu jiꞌi̱ ma̱ chaꞌ chcuiꞌ ma̱ chaꞌ cuxi juaꞌa̱; nu xñaꞌa̱ laca nu nguluꞌu jiꞌi̱ ma̱ chaꞌ chcuiꞌ ma̱ juaꞌa̱.

⁵⁶Siꞌi chaꞌ cuaꞌni tye naꞌ chalyuu jiꞌi̱ ñati̱ nda ycuiꞌ Ndyosi Sti naꞌ ꞌna lijya̱a̱ chaꞌ caca naꞌ ñati̱; chaꞌ cuaꞌni lyaá Ni jiꞌi̱ ñati̱ chalyuu, biꞌ cña ntsuꞌu chaꞌ cuaꞌni naꞌ ―nacui̱ Jesús. Liꞌ nduꞌu nguꞌ ndyaa nguꞌ xaꞌ quichi̱ sube ti.

⁵⁷Toꞌ tyucui̱i̱ su ndyaa nguꞌ naꞌa̱ nguꞌ jiꞌi̱ sca nu quiꞌyu. ―Cusuꞌ ―nacui̱ yu―, loꞌo naꞌ ntiꞌ naꞌ tsaꞌa̱ loꞌo nuꞌu̱, macala su tsaa nuꞌu̱ tsaꞌa naꞌ loꞌo nuꞌu̱.

⁵⁸Liꞌ nguxacui̱ Jesús chaꞌ jiꞌi̱ nu quiꞌyu biꞌ: ―Nu naa cuatyaꞌ ni, neꞌ xtyú niꞌ ndyuꞌú niꞌ; loꞌo nu quiñi sube ni, neꞌ xlyati̱ ndyuꞌú niꞌ; loꞌo naꞌ ni, cua lijya̱ naꞌ chalyuu chaꞌ caca naꞌ ñati̱, pana ná ntsuꞌu su xtyii naꞌ cajaꞌ naꞌ, ná ntsuꞌu su chcaꞌa̱ cñaꞌ naꞌ.

⁵⁹Loꞌo liꞌ nacui̱ Jesús jiꞌi̱ chaca nu quiꞌyu: ―Ca̱a̱ tyaꞌa̱ nuꞌu̱ loꞌo naꞌ ―nacui̱. ―Cusuꞌ ―nacui̱ yu jiꞌi̱ Jesús liꞌ―, ta nuꞌu̱ xi tyempo jnaꞌ chaꞌ tyanu naꞌ loꞌo sti naꞌ ñaꞌa̱ cuayáꞌ nu cajaa sti naꞌ, chaꞌ ñaꞌa̱ naꞌ jiꞌi̱ tyatsiꞌ.

⁶⁰Liꞌ nacui̱ Jesús jiꞌi̱ yu: ―Tya ntsuꞌu xi xaꞌ la tyaꞌa ñati̱ ma̱ nu taca xatsiꞌ jiꞌi̱ nu cua ngujuii; pana nuꞌu̱ ni, ntsuꞌu chaꞌ tsaa nuꞌu̱ loꞌo naꞌ chaꞌ chcuiꞌ nuꞌu̱ chaꞌ tsoꞌo jiꞌi̱ ycuiꞌ Ndyosi loꞌo ñati̱.

⁶¹Liꞌ nacui̱ chaca nu quiꞌyu jiꞌi̱ Jesús: ―Cusuꞌ, loꞌo naꞌ nta̱ꞌ tsaꞌa̱ loꞌo nuꞌu̱ ―nacui̱ yu―, pana ta xi tyempo ꞌna chaꞌ tsaꞌa naꞌ salyaꞌ naꞌ loꞌo nguꞌ toniꞌi̱ ꞌna.

⁶²Liꞌ nguxacui̱ Jesús chaꞌ jiꞌi̱ nu quiꞌyu biꞌ: ―Sca ñati̱ nu nguxana sca cña ni, ná caca tyuꞌu scua cña biꞌ jiꞌi̱ yu si tyaꞌa̱chu̱ꞌ yu jiꞌi̱; ñiꞌya̱ ntiꞌ ñati̱ nu nclyaꞌa yuu, ná ca culaꞌa tsoꞌo yu yuu si ñaꞌa̱ yu nde chu̱ꞌ yu; la cuiꞌ juaꞌa̱ loꞌo caca ycuiꞌ Ndyosi loo neꞌ cresiya jiꞌi̱ cuꞌma̱ ñati̱ chalyuu ni, ná ta Ni cña cuaꞌni ma̱ cuentya jiꞌi̱ ycuiꞌ si ntiꞌ ma̱ tyaꞌa̱chu̱ꞌ ma̱ jiꞌi̱ Ni.