LUUKA 9:31-62

³¹Uni gun pikin mo e monyca mo dhali uni ki ṯor gwo mo gom yam piti jin mina a’di ya mo, a’di jin mina a’di ithim mo e Pa Urushaliim mo.

³²Buṯerus dhali uni gwansan kun nyaḵki ’ko ki a’di mo tani uni ’ce’da e is mo hili uni ’kokin mo mmorash e mer mo dhali uni p̱arki monycam piti e mo dhali ’kwani su/ gwansan kun doshkin mo nyaḵki a’di mo be.

³³Dhali ki ’kwani su/ iikin mo ’peni a’di mo tani Buṯerus o’da Yesus gwo mo ki: Tap̱a, a’di ’boro’d gom aman mmo’kona aman mmahan mo be. Dhalki aman nyaŋa um c̱iŋa/ ikwara mo ma, ’de/ gom /e mo dhali ’de/ goma Musa mo, dhali jaŋ kamu/ ’de/ gom Iliyya mo, haali/ a’di mol gwo jin ona a’di mo.

³⁴Dhali ki a’di o gwo yansan mo tani araḵ p̱u’dki’d mo dhali ’kam uni is ka la mo. Dhali uni ’kokin mo mmoḵo/ is mo me’d jin cic̱kina uni e bwam ma raḵ mo.

³⁵Dhali ’twa/ p̱u’dki’d mo ka pije/ ’peni bwam ma raḵ mo mmo/o gwo mo ki: Yan ta Ya/m pem mo, jim pem jin kwanyka/ mo. Ciḵi a’di gwo mo ma.

³⁶Dhali ki ’twa/ okunu gwo mo tani Yesus gamkunu a’di ’de/ mo. Dhali uni ’kon ki shwam mo dhali ṯor wathiŋ kamu/ ’de/ gwo mo ka cim gwansan yisa ma e to jin p̱arkina uni e mo.

³⁷Dhali ka cim jiŋ ’ko’d mo tani ki uni thulkin ka ’cesh ’peni wosha turga/ mo tani awaambuhany ’kwani caaca kagahara mo gamki a’di ’kup̱ mo be.

³⁸Dhali hili mo mo ma, wathiŋ kamu/ ’peni bwam ma waambuhany ’kwani a’di cuuki’d mo ki: Manṯor Gwo, aha/ yuḵa /e mo mmohila hil ap̱o/ ya/m pem mo. Haali/ a’di ta ya/m pem jin di’d ṯal ’deŋ gana/ mo.

³⁹Dhali hili ma, arum thus bu’thki a’di mo dhali a’di ise/ ki cuu kagahara mo dhali a’di ki p̱esh mo ntagi a’di mii’da gabusha mo dhali a’di mompola is ki mombol mo dhali a’di diṯa mii mo mmodhal a’di ’pen mo.

⁴⁰Dhali aha/ yuḵkina imanciḵ /e gwo mo mmo/ur a’di ka pije/ mo tani hili uni mol a’di mii mo be.

⁴¹Yesus thoḵ a’di gwo mo ki: Ayy um ’kwani kun aṯẖa moŋgam gwo is ki aṯẖ mo dhali kun c̱aca/ ii ki c̱aca/ mo eya nyaḵum yil bum mo tani aha/ mina di ka cim ekata mo e um mo dhali ’dim ’kup̱ e um mo? Susi ya/m pini mmahan mo ma.

⁴²Ki a’di di’d mmoyayu/ mo tani aruma ’cesh ki mombol a’di is mo dhali p̱esh a’di mo. Hila Yesus ki ḵucura rum thus jin nyo/o’d ki gwo mo dhali a’di ki wac̱a ’ci mo dhali a’di ki c̱i a’di ka nyaŋ’ko’d e com mo.

⁴³Dhali aris ’kwani ’baar mo ’kokin mo mmomer mo gom mo/eḵ ma Arumgimis mo be. Hili ki uni ’kokin mo mmomer mo goma ris to ’baar mo jin miikina a’di mo tani a’di ki o imanciḵ a’di gwo gwo mo ki:

⁴⁴Dhalki gwo gwansan hur bwany’cem bum mo ma, haali/ Ya/ gi ’Kwani minu c̱i mo e me’d gi ’kwaniny’cesh mo.

⁴⁵Hili uni ’koki mish gwo yansan ’ban mo jin okina a’di mo dhali gwo yan a’di bagkunu mo ’peni uni mo ki uni mini ’koki nyiṯẖ a’di mo dhali uni ḵo/ a’di mo mmodoṯ a’di gwo mo gom gwo yansan mo be.

⁴⁶Dhali gwo jin wala uni cuki’d mo e bwam uni mo mmo/o gwo mo ki: Kaja a’di ica’d ki tiya i bwam uni mo?

⁴⁷Hili ka Yesus nyiṯẖki gwo kun kuluma uni eya dum buni mo tani a’di ki bu’th ara ’ci mo dhali kar a’di e ’ko’d gwar piti mo

⁴⁸dhali o uni gwo mo ki: A’diyin jin midi bu’th ara ’ci yansan ki gway pem mo tani a’di bu’thki aha/ mo be dhali a’diyin jin midi bu’th aha/ mo tani bu’thki a’di a’di jin hashi aha/ mo haali/ a’di jin midi p̱is mo mbwam umi ’baar mo tani a’di ta jan ṯal ’de/ jin caaca mo be.

⁴⁹Dhala Yohaan thoḵ a’di gwo mo ki: Tap̱a, am mishkina wathiŋ kamu/ urki’da ruma ’cesh ka pije/ ki gway pini mo dhali aman nonkina a’di mo haali/ a’di diki baṯẖ ana isho’k mo be.

⁵⁰Hila Yesus thoḵ a’di gwo mo ki: Dhalku/ a’di ki non mo ma, haali/ a’di c̱aan jin diki di ap̱o/ um mo tani a’di ita a’di gom um mo be.

⁵¹Ki mom piti ’dishkina ’twa/ mo jin minu bu’th a’di mo tani a’di ki kar jis/em piti mo mmoya bway Pa Urushaliim mo. Dhali a’di ki hash iman/ii nṯwa/a/ ki a’di mo.

⁵²Dhali uni iikin mo dhali cic̱ mo e Bampa/ gi Pan Saamira mmothoson to gom a’di mo be.

⁵³Hili ’kwani ’koki bu’th a’di mo haali/ jis/em piti karkina a’di mo ’kup̱ ki Pa Urushaliim mo be.

⁵⁴Dhali ki imanciḵ a’di gwo jin ta’da Yakuub dhala Yohaan p̱arki a’di e mo tani uni o a’di gwo mo ki: Tap̱a, /e ŋap̱i aman mo mmoḵan o’d gwo mo mmothulu/ ka ’cesh ’peni momis mo dhali shwa uni mo ’taa?

⁵⁵Hili a’di ṯu’kki’da bor mo dhali ḵucur uni ki gwo mo be.

⁵⁶Dhali uni iikin mo e bampaŋ kamu/ mo.

⁵⁷Me’d jin iikina uni e bway tur ki sule/ mo tani wathiŋ kamu/ ki o a’di gwo mo ki: Aha/ mina baṯẖ /e m’pen mo e mo ’baar mo jin mina /e iya mo be.

⁵⁸Dhala Yesus ki thoḵ a’di gwo mo ki: Amaḵ uni ta gi jis mo dhali ’dii kun p̱en e momis mo tani ta gi gu’b mo. Hili Ya/ gi ’Kwani a’di dar gi mo mo mmokar ’kup piti nycine/ mo be.

⁵⁹Dhali e wathiŋ kamu/ a’di ki o a’di gwo mo ki: Baṯẖi aha/ m’pen mo ma. Hili a’di ki o a’di gwo mo ki: Tap̱a, dhalki aha/ yana nṯwa/a/ mo dhali kan ababam pem mo.

⁶⁰Hili a’di ki o a’di gwo mo ki: Dhalki jwa uni kan c̱eny jwam buniŋ gana/ mo ma. Hili gom /e mo tani yayi mo dhali ṯor Bampa/ ma Arumgimis eya tente/ mo.

⁶¹Dhali jan ’deŋ kamu/ o a’di gwo mo si’da/ ki: Aha/ mina baṯẖ /e nsho’k mo Tap̱a. Hili dhalki aha/ ona gwo nṯwa/a/ mo mmotaḵ uni gwansan kun ’koni gu’b pem mo.

⁶²Yesus ki o a’di gwo mo ki: Jaŋ kamu/ yisa di’d ’deya jin karki me’d piti ap̱o/ to jin goru a’cesh mo dhali mmohil ka isaŋ’ko’d mo a’di jin midi ha me’d mmo’kosh jwa ki Bampa/ ma Arumgimis mo.