Duku 17

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Kɛ̀ Yesu nɑ́kɛ́ o tɑ́ncɔ́ùmbɛ̀ kɛ dɔ̀: Dɛ̀ɛ̀ bo nte kòo nìtìi dɔɔ̀ mɛyɛi ndɛ̀ í yóó pɑɑ̀, wèè nɛ́ bo nte kòo tɔù dɔɔ̀ mɛyɛi ndɛ yiɛ̀ mbo yɑ̀.

²Kɛ̀ bɛ̀ ò dùú nditɑ̃́rì diɛrì kɛ dootóo dɑ̀mɛ́ɛ̀rì miɛkɛ dɛ̀ ńtɔ̃ũnɛ̀ ò bo bɔmmɛ̀ bɛsɑ́m̀pɔ́bɛ̀ biɛ nkóò mɔù mɛyɛi mmiɛkɛ.

³Ndɑkɛnɛ̀! Kɑ̀ɑ kou cɑ̀ɑ̀rɛ̀ kɛ bɑntɛ́ o cɑɑ̀rìmɛ̀ ɑ ò cĩ̀ɛ̃́.

⁴Kòo dɑ cɑ̀ɑ̀rɛ̀ kucɛ mɛ̀yiekɛ̀ diyiè dimɑ́ɑ̀ miɛkɛ, kɛ kɔrìní kɛ dɑ mɔ́ú mɛcĩ́ɛ̃́mmɛ̀, ńcĩ́ɛ̃nko we.

⁵Kɛ̀ Yesu tɔ̃rɛ̀ɛ ò mɔɔ kɛ dɔ̀: Ti Yiɛ̀ nhɑ ti yíɛ́ mɛtɑ̃́kùmɛ̀.

⁶Kɛ̀ Yesu bɛ̀ nɑ̀kɛ́ kɛ dɔ̀: Kɛ̀ di do n tɑ̃́ bɑ́ kɛ̀ dɛ̀ mmɑnnɛ̀ fɛyoǹfɛ̀ di bo nɑ kɛ́nɑ́kɛ́ mutie muu nkɛ dɔ̀: Uutɛ́ ɑ mɛ̀ mborɛ̀ kɛ́do dɑ̀mɛ́ɛ̀rì miɛkɛ kɛ̀ mùu yie ndi yɛ̃ mmù.

⁷Di miɛkɛ kòò mɔù mɔ̀kɛ otɔ̃ntì kòò kùútí yoo ò cɛ̃mmù o wũɔ̃ kɛ konní kupɑku ò bo ò nɑ̀kɛ́ kɛ dɔ̀: Yɑ̀ɑ kɑri kɛ́diɑ̀?

⁸Ò bɑ́ɑ́ ò nɑ́kɛ́ kɛ yĩ́: Bénnɛ́ kɛ́deè kɛ́ceetɛ ɑ yɑ̀ɑ̀tì kɛ́tɔnní kɛ́ n duɔ́ nkɛ̀ n di kɛ́deè kɑ̀ɑ nɛ́ nɑ kɛ́diɑ̀?

⁹Ò bo sɑ̃ntɛ otɔ̃ntì wenwe ò pĩ́ mɛ̀ɛ̀ kpɛ́í mmutɔ̃mmú ò yɛ̃ nwèe pĩ́mmɑ̀ɑ̀? Ɔ́ɔ̀!

¹⁰Di kpɛrɛ mɛ ndò nkɛ̀ di pĩ mbɛ̀ di duɔ́ mmùù tɔ̃mmú kɛ dèè di dɔ̀: Ti tú bɛtɔ̃mbɛ̀ mbɛ cɛ̃́nkɛ kɛ pĩ́ mmutɔ̃mmú ti do dò nkɛ́pĩ́ mmù.

¹¹Kɛ̀ Yesu nkɔri Sedisɑdɛmmu, kɛ́pɛ̃ɛ̃tɛ́ Sɑmmɑrii nɛ̀ Kɑdidee dɛ tenkɛ̀ mɑ̀nku,

¹²kɛ́ntɑti dihɛì mɑrì kɛ̀ yɛkùɔ̀ ntɛpíítɛ̀ɛ kétɛ́ní kɛ́mɑɑ nkɛ́cómmú, kɛ́pĩɛ̃kɛ́ kɛ dɔ̀:

¹³Okótì Yesu, ti kuɔ́ mmɛsémmɛ̀!

¹⁴Kɛ̀ Yesu nyɛ̀ wùó, kɛ́ yɛ̀ nɑ̀kɛ́ kɛ dɔ̀: Kɔtɛnɛ̀ kɛ́bɛnkɛ dimɑ́ɑ̀ ikuɔ́ nìùbɛ̀. Kɛ̀ yɛ̀ nkérí kɛ́miɛtɛ́.

¹⁵Bɛ miɛkɛ kòo mɔù yɑ ò miɛtɛ́mɛ̀ kɛ́wɛ̃tɛ kɛ́poo nho nɑcɛ̀fɔ̃̀tɛ̀ kɛ́nwɛ̃tiní Yesu borɛ̀ kɛ́nsɑ̃ntí Kuyie,

¹⁶kɛ yɑ̀ɑ̀ nínkóo Yesu ììkɛ̀, kóò dɔunnɛ̀ mutɔ̃mmú. Sɑmmɑrii kó dihɛì kou do nwe.

¹⁷Kɛ̀ Yesu ò bekɛ kɛ dɔ̀: Dimɔu di í miɛtɑ́ɑ̀? Bɛtɔbɛ̀ bɛwɛi nɛ́ borɛ?

¹⁸Bɛ kóò mɔù í wɛ̃̀tɛní, fɔ̃́ nhopɔ̀ɔ̀, kɛ̀ fɔ̃́ɔ̃̀ mɑ́ɑ̀ wɛ̃̀tɛnɑ́ɑ̀?

¹⁹Kɛ́deè kóò nɑ̀kɛ́ kɛ dɔ̀: Ítɛ́ kɛ́kò, ɑ tɑ̃́kùmɛ̀ dɑ dɛɛtɛ́mu.

²⁰Kɛ̀ Fɑdisĩɛ̃bɛɛ bekɛ Yesu kɛ dɔ̀: Kuyie nkpɑ̀ɑ̀tìyuu yóó buotɛ́ ɔ̃mmɔ̀nnì? Kɛ̀ Yesu bɛ̀ tɛ̃̀ńnɛ́ kɛ dɔ̀: Kuyie nkpɑ̀ɑ̀tìyuu í yó nkéríní kɛ feí kɛ̀ bɛ̀ dì wúó.

²¹Bɛ̀ í yóó yĩ́ di bo diɛ nyoo ciɛ, Kuyie nkpɑ̀ɑ̀tìyuu bomu di cuokɛ̀.

²²Ò dèè mɛmmɛ kɛ́nɑ́kɛ́ o tɑncɔ́ùmbɛ̀ kɛ dɔ̀: Yɛwe kèrínímu di yóó wɑmmú yɛ̀ɛ̀ miɛkɛ di bo yɑ̀mɛ̀ Onìtìbirɛ bɑ́ diyiè dimɑ́ɑ̀ di mɛ mbɑ́ɑ́ dɛ̀ yɑ̀.

²³Kɛ̀ bɛ̀ di nɑ́ɑ́ nkɛ tú: Ò bo diɛ nyoo ciɛ. Di bɑ́ɑ́ kɛ̀ kɔ̀tɛ, di bɑ́ ndɛití dɛ bíɛ́kɛ̀.

²⁴Fɛtɑɑfɛ̀ ɔ̃ɔ̃ míítɛ́mɛ̀ kɛ̀ dɛ̀ɛ wenkoo ku nwɛtimɑ̀nku nɛ̀ kutɛkù Onìtìbirɛ kó diyiè dɛ̀ yó mmɛ ndò.

²⁵Onìtìbirɛ nɛ́ dò nkɛ́ketɛ́ kɛ́fɛ̃́ṹtɛ́mu mɛdiɛ̀ nkɛ̀ di mmɔ̀nnì kɔbɛɛ ò yetɛ.

²⁶Dɛ̀ do dɔ̀ɔ̀ mɛ̀ɛ̀ botí Nɔwee kó dimɔ̀nnì, dɛ̀ yóó mɛ ndɔɔ̀ Onìtìbirɛ bo nwɛ̃tiní dìì mɔ̀nnì.

²⁷Bɛnìtìbɛ̀ do yommu kɛ yɔ̃ nkɛ puokú, kɛ yenkú, kɛ̀ Nɔwee yɑ̀ɑ tɑnnɛ̀ bɑ̀tóò, kɛ̀ fɛtɑdiɛfɛ̀ɛ kɔtɛní, kɛ́ bɛ̀ kùɔ bɛmɔu.

²⁸Dɛ̀ do dɔ̀ɔ̀mɛ̀ Dɔti kó dimɔ̀nnì dɛ̀ yóó mɛ ndɔɔ̀. Bɛnìtìbɛ̀ do yommu kɛ yɔ̃, nkɛ do nkɛ fiiti, kɛ buɔtì, kɛ mɑɑ̀.

²⁹Dɔti nɛ́ yɛ̀ dìì mɔ̀nnì Sodɔmmu, kɛ̀ muhɑ̃ɑ̃́ nnɛ̀ muhɑ̃pòpùo kɛ̀ dɛ̀ɛ cútɛ́ní kɛĩ́nkɛ̀, kɛ́ bɛ̀ kùɔ bɛmɔu.

³⁰Dɛ̀ yóó mɛ ndɔɔ̀ Onìtìbirɛ bo nkéríní dìì yiè nɛ̀ dɛ kpetì.

³¹Dɛ yiè kɛ̀ dɛ̀ sɔ̃́ nwèè bo kudɑ̀nkù ò bɑ́ɑ́ yĩ́ ò bo cútɛ́ní kudieku kɛ túótɛ́ o kpɛrɛ. Kɛ̀ dɛ̀ sɔ̃́ nwèè bo kupɑku ò bɑ́ɑ́ kò ntɛcĩ́ɛ̃̀tɛ̀.

³²Di bɑ́ɑ́ yɛ̃̀ ntìì do tùɔ̀kɛní Dɔti pokù.

³³Wèè bo ndɔ́ kɛ́dɛɛtɛ́ o fòmmu ò bo mù fétìnnɛ, kɛ̀ wèè mù fétìnnɛ n kpɛ́í kòo mù dɛɛtɛ́.

³⁴N di nɑ́ɑ́mmu dɛ kó kɛyènkɛ̀ bɛnìtìbɛ̀ bɛ̀dɛ́bɛ̀ bo nduɔ́ didɔ́ù dimɑ́ɑ̀, kɛ̀ bɛ̀ɛ túótɛ́ omɑ́ɑ̀ kɛ yóu otɔù.

³⁵Bɛnitipòbɛ̀ bɛ̀dɛ́bɛ̀ bo nwɛ̃ nkɛ nɑɑ̀ nkɛ̀ bɛ̀ɛ túótɛ́ omɑ́ɑ̀ kɛ yóu otɔù.

³⁶Bɛnitidɑɑbɛ̀ bɛ̀dɛ́bɛ̀ bo nwɛ̃ nkɛ kúútí kɛ̀ bɛ̀ɛ túótɛ́ omɑ́ɑ̀ kɛ yóu otɔù.

³⁷Kɛ̀ Yesu tɑncɔ́ùmbɛ̀ɛ o bekɛ kɛ dɔ̀: Ti Yiɛ̀ ndɛ̀ yóó dɔɔ̀ ɔ̃̀ndɛ? Kòo bɛ̀ tɛ̃́nnɛ́ kɛ dɔ̀: Dɛcírɛ̀ duɔ́ dɛ̀, timɑncòntì yóó dɛ ntíí.