Lucas 9:31-62

³¹Pegpekità dan, minanyag dan heman. Migpebelaw-belaway se telo dan tepad te pegkematay i Jesus, so yan se tomanen din te eked kenamay doton te Jerusalem.

³²Ontò neketedogi si Pedro aw doma din. Meneng pegkeloka dan, kinità dan se anyag i Jesus aw sìyan dowa otaw doma din.

³³Dalem te pegkesayo i Moises aw si Elias lekat ki Jesus, minikagi si Pedro diyà ki Jesus, “Pengolo, mèpiya so dini kay. Ibeg day meg-inang kay den te telo balay amon doen ogpaan te teg sebad-sebad kenyo si Moises aw si Elias.” Pengkey yan se inikagi i Pedro, meneng wedà din kelebeti aw eden se inikagi din.

³⁴Telobo pa minikagi si Pedro, doen labon dimateng diyà kandan aw wedà dan ebey kità kandan. Pegkeselibeng te labon kandan, ontò nelemitan si Pedro aw doma din.

³⁵Penga niyan, dinineg dan se kagi te Timanem lekat te labon, “Seini se Batà ko, aw pinemallì ko sikandin amon tomanen din se ibeg ko. Keilangan sikandin se penenelanen niyo.”

³⁶Penga te pegdineg dan kenyan, kinità dan si Jesus olò sebad din. Wedà dan peg-indan diyà te doma otaw tepad te kinità dan kidoen lamig ontò nenamay.

³⁷Keeldawan niyan, timopang dan lekat te bontod aw nesongonan dan te ontò medita otaw.

³⁸Nayan, doen sebad otaw timawal ki Jesus, kagi din, “Sir, keidowi bag se batà ko, so sikandin se temisa batà ko.

³⁹Melikit sikandin egdetengan te bosaw, aw egpuypuy. Egpemekeseg iyan kandin, aw egbohak se bahà din. Ontò melima se pegpelowà te bosaw lekat kandin, so eked kesayo singed aw onà din peelegen se batà.

⁴⁰Nemoyò a diyà te menge tinoledaan no te ipelowà dan se bosaw lekat kandin, meneng wedà dan iyan kebatog.”

⁴¹Minikagi si Jesus, “Tay law, sikiyo menge otaw. Ontò kolang se aneng-aneng niyo, so wedà kaw pa salig diyà kanak. Eked den kenamay se pegdoma ko kenyo, meneng keilangan tomayod a pa pengkey eked kaw pemenal. Na, pedinihi se batà nikaw.”

⁴²Pegpesalo te batà doton ki Jesus, binadas sikandin te bosaw aw impekeseg din. Meneng sinagda i Jesus se bosaw aw impelowà din iyan lekat te batà. In-olì din se batà sìyan negolian diyà te amay din.

⁴³Ontò nepela se kedita te otaw kidoen, so netegahan dan te ontò melangkaw se Timanem. Dalem te nepela pa se kedita te otaw tandà te ininang i Jesus, minikagi sikandin diyà te menge tinoledaan din,

⁴⁴“Keilangan ontò kaw menenalan te kagi ko kenyo seini. Seini se metoman domateng diyà kanak Timanem Migpekeotaw. Metoman a itolok aw ibegay a diyà te belad te doma otaw.”

⁴⁵Meneng wedà dan ketegahi aw eden se kedegdagan te inikagi din sìyan, so wedà iyan keinang mebangal amon eked dan iyan kelebeti. Meneng wedad otaw mig-insà kandin tepad kenyan, so neyàyà dan.

⁴⁶Nayan, migpedindilay se menge tinoledaan i Jesus aw sinu se ontò melangkaw diyà kandan.

⁴⁷Meneng pegketaga-taga i Jesus aw eden se pigdindilan dan, tinawal din se sebad batà, aw impetindeg din iyan kidoen te tangkil din.

⁴⁸Penga niyan, minikagi si Jesus, “Aw megsagman se otaw te batà seini tandà te pegpesakop din kanak, pineokit kenyan segmanen a din heman. Aw megsagman se otaw kanak, segmanen din heman se Amay ko simogò kanak. Se otaw ontò megpedanà kidoen kenyo, yan se ontò melangkaw.”

⁴⁹Nayan, minikagi si Juan, “Pengolo, doen otaw kinità day migpelowà te bosaw lekat te menge otaw pineokit te ngadan nikaw. Meneng sinagda day sikandin so wedà pekeakop diyà kenitadon.”

⁵⁰Meneng minikagi si Jesus, “Ikà niyo egsagda kandin, so se otaw kenà poon niyo, meinang sikandin doma niyo.”

⁵¹Sagwa agpet den domateng se aldaw te pegkeengat i Jesus doton te langit, miglalang sikandin domoton te Jerusalem.

⁵²Doen menge otaw insogò din minonà diyà kandin. Nesayo dan aw dimoton dan te sebad lonsod sakop te Samarya amon megpetagad dan te ogpaan din aw mapit kidoen.

⁵³Kenà Judiyo se menge otaw eg-ogpà kidoen, aw yan se doun te wedà dan peepiti si Jesus, so netegahan dan te domeleg sikandin doton te Jerusalem.

⁵⁴Pegketaga-taga i Santiago aw si Juan te eked dan segmani te tege Samarya, minikagi dan, “Pengolo, meibeg ka lay aw ipedagdag day se apoy lekat te langit amon megelà dan?”

⁵⁵Meneng miniling si Jesus diyà kandan aw sinagda din dan.

⁵⁶Penga niyan, dimeleg dan doton te doma lonsod.

⁵⁷Dalem te peg-ipanaw dan, doen otaw minikagi diyà ki Jesus, “Pengkey kenan ka pesalo, gayed a tomaking kamno.”

⁵⁸Meneng minikagi si Jesus, “Mèpiya pa se menge menenanap te kebenesan, so doen ogpeanan dan. Mèpiya pa heman se menge manok, so doen heman embonganan dan. Meneng melima aw tomaking ka kanak Timanem Migpekeotaw, so wedad palos ibatan ko te delem.”

⁵⁹Minikagi si Jesus diyà te doma otaw kidoen, “Taking ka kanak.” Meneng timaba sikandin, “Pengolo, eked a taking kamno singed aw onà matay se amay ko aw ilebeng ko.”

⁶⁰Meneng minikagi si Jesus, “Mèpiya aw otaw wedad kaling pedowan se meglebeng te menge doma dan nematay. Meneng aw doen kaling pedowan no, keilangan megtoladà ka den te doma otaw tepad te peglowan te Timanem.”

⁶¹Doen heman doma otaw minikagi diyà ki Jesus, “Pengolo, tomaking a diyà kamno. Meneng molì a onà amon megpetaga-taga a te menge kedomaan ko.”

⁶²Minikagi si Jesus, “Ikà eg-iling te otaw megdaro gayed eglingì, so kolang se inangen din. Iling heman kenyan se otaw kenà melobos se pedowan din tomaking kanak, so eked kepakay aw megpesakop sikandin diyà te peglowan te Timanem.”