Lucas 9:31-62

³¹Ne ngoo re yon zha xid thib xni thoz, ne mndediz re zha kwent chaan yalguth chaan Jesús, kuu rid Jesús yez Jerusalén.

³²Ne lee Pey, Santiag ne Juan ngwatin re zha mkaal, per mdatta zha, tsa mwii zha xni thoz chaan Jesús ne lo rop zha kuu mndo lo Jesús.

³³Per leettsa lee rop mbyiʼa ndya, tsa lee Pey nzhab lo Jesús: ―Maestr, ¡wen nzi nee nzhee! Nal taa nee tson ramad, thibe gak chaana, tedibe gak chaan Moisés ne tedibe gak chaan Lí. Per neeka net Pey naa kwan nzhab Pey.

³⁴Leettsa lee Pey bee ngenika lee thib xkow mla mtow re zha, ne kwathoz mzeb re zha ngoo zha xid xkowa.

³⁵Ne xid xkowa mroo thib bos kuu nzhab: ―Zha ree nak xgann na kuu mlin. Bin goo re kuu ne zha.

³⁶Bluz or ngwalo mni bosa, tsa mwii re zha thita Jesús ndo. Ne re wiza yent cho lo nzhab re zha kuu mwii zha.

³⁷Ne lee tedib wiz, leettsa ndyaad re zha ngwa zha yek yii, tsa kwathoz men ngwa lo Jesús.

³⁸Tsa lee thib mbyi kuu nzo xid re mena, nex nzhab: ―Maestr, blat leettsooʼa neʼa xgann na, tak thibka zha lon.

³⁹Ne nden thib mbi fyer zha, ne ntsow mbi mbetsyath zha, ne ntsow mbi nlen zha yizguthye, ne ntsow mbi ndroo btsiin roo zha. Kwathoz nakap ntsowno mbi zha ne nlaazt mbi laa mbi zha.

⁴⁰Ne nzhapa na lo re zha kuu ngeteed loʼa, tsa koo zha mbi fyer leettsoo xgann na, per ngogt gatsow zhay.

⁴¹Lee Jesús mkab ne nzhab: ―¡Men nad, kuu nyelaazt Diox! ¿Plal tyemp ndoblo ton lo goo ne xek leettsoon nen goo? Deno xganna nzhee.

⁴²Ne leettsa lee zha ngebig, tsa lee mbi fyer mlobi zha lo yu, ne oraaka mtsow mbi mlen zha yizguthye tedib welt. Per lee mbi fyer mkox lo Jesús, ne mtegwe Jesús zha, ne mndaa Jesús zha lo xut zha.

⁴³Ne reta men kuu nzi tya, kwathoz mzegey leettsoo zha mwii zha kuu thoz kuu mtsow Diox. Ne leettsa lee reta zha bee nzegey leettsoo mwii kuu ngok, tsa lee Jesús nzhab lo re zha kuu ngeteed lo Jesús:

⁴⁴―Wen wen kenza goo koree ne nithlaazt gooy, tak na, Kuu Mzin Ngok Men, taa zha na lo re men.

⁴⁵Per myent re zha kuu nzhab Jesús, tak mkow yek zha kona myent zha. Ne nzeb re zha naabdiz zha lo Jesús, naa kwan kuu nzhab Jesús lo re zha.

⁴⁶Tsa lee re zha kuu ngeteed lo Jesús mndelo zha mbyodiz zha naa cho nak zha kuu mas nataak lo re zha.

⁴⁷Per lee Jesús myeen naa kwan ntsow re zha xgab, tsa mdeez Jesús thib ndyeen lut, ne mto Jesús ndyeen lo re zha.

⁴⁸Tsa nzhab Jesús lo re zha: ―Loka zha kuu nkayaa thib ndyeen, na nkayaa zhaʼa, ne loka zha kuu nkayaa na, noga nkayaa zha, zha kuu mtaalʼn. Tak lee zha kuu mas nataagt lo re goo, zhaʼa nak zha kuu mas nataak.

⁴⁹Tsa lee Juan nzhab lo Jesús: ―Maestr, mwii nee lee thib zha ngoo mbi fyer kon yalnabee chaana, ne nzhab nee lo zha: “Tsowt zhay”, tak nagt zha, zhaʼaa.

⁵⁰Per lee Jesús nzhab lo re zha: ―Ndoblot gab goo lo zha: “Tsowt zhay”, tak lee zha kuu nayiit neʼaa, nzo zhaʼa faboraa.

⁵¹Leettsa ndetsin gaxa wiz kuu bretab Jesús yibaa, thib mloo Jesús yek Jesús ya Jesús Jerusalén.

⁵²Tsa mtaal Jesús chop tson zha mndenerga lo Jesús, ne lee re zhaʼa ngwa thib yez lut chaan zha Samaria, tsa kwaan zha pa kwet re zha.

⁵³Per lee re zha yeza mkayaat zha re zha, tak myeen re zha yeza lee re zha nda yez Jerusalén.

⁵⁴Or mbin Santiag ne Juan kona, tsa nzhab rop zha: ―Zha Nabee, ¿chu nlaaza nabee nee tsa roo ki yibaa, ne luuzhe re zha yez ree?

⁵⁵Tsa mwii Jesús lo Santiag ne lo Juan, ne mkox rop zha lo Jesús.

⁵⁶Tsaraa nda re zha tedib yez.

⁵⁷Leettsa ndo Jesús kon re zha net, thib re zha nzhab lo Jesús: ―Zha Nabee, nlazʼn teken ditsa loka pa ta yaʼa.

⁵⁸Tsa mkab Jesús lo zha, ne nzhab Jesús: ―Lee re mbeet nap maa kelyoo ta nyoo maa, ne lee re min nap maa lyaat maa; per lee na, Kuu Mzin Ngok Men napt lizʼn.

⁵⁹Tsa nzhab Jesús lo tedib zha: ―Bteke ditsʼn. Per lee zhaʼa mkab, ne nzhab: ―Zha Nabee, laa yelo kaatsʼn xutʼn.

⁶⁰Lee Jesús mkab lo zha, ne nzhab: ―Laa kaats re zha nguth zha nguth; per lee lu gwa gwataa kwent xkiiz Diox.

⁶¹Ne lee tedib zha nzhab lo Jesús: ―Zha Nabee, nlazʼn teken ditsa, per beeta laaʼa yalon diize lo re zha lizʼn.

⁶²Jesús mkab lo zha, ne nzhab: ―Loka zha kuu nden yaa arad ne ngwii zha par dits zha, lortsint zhaʼa par taa zha kwent chaan ta nabee Diox.