Text copied!
CopyCompare
Arli Luka - Luka

Luka 19

Help us?
Click on verse(s) to share them!
1O Isus đerdinđa ani diz Jerihon. I sar ine nakhela maškari diz,
2alo nesavo manuš palo anav Zakej te dikhel le. O Zakej inele šerutno e carinikonengoro ani diz hem inele barvalo.
3Ov ćerela ine nesar te dikhel koi adava o Isus, ali našti ine taro narodo adalese so inele pretičkoro.
4Adalese prastandilo po anglal hem uklinđa upro kaš te šaj dikhel e Isuse adalese so džanđa da valjani te nakhel adathar.
5A ked o Isus reslo adari, dikhlja upre hem phenđa lese: “Zakej, hulji sigate! Avdive valjani te ovav ano to čher.”
6I o Zakej huljilo sigate hem anđa le čhere kora peste radosno.
7Sa o manuša kola dikhle adava vaćerde e Isusestar so na valjanđa te džal te bešel e grešnikoja lese ano čher.
8A o Zakej terdino hem phenđa e Gospodese: “Ače, Gospode, ekvaš oto barvalipe mlo ka dav e čororenđe, a te nekas prevarinđum, ka irinav lese štar puti više.”
9A ko adava, o Isus phenđa lese: “Avdive alo o spasenje ano akava čher, adalese soi hem o Zakej potomko e Avraamesoro.
10Me, o Čhavo e Manušesoro, aljum te rodav hem te spasinav e našalden!”
11But manuša šunena ine adava so o Isus vaćerđa. I sar o Isus inele paše uzalo Jerusalim, o manuša mislinde da o carstvo e Devlesoro otojekhvar ka mothoj pe. Adalese o Isus phenđa lenđe pana jekh paramiz:
12“Inele jekh ugledno manuš kova spremisalo te džal ki durutni phuv koro jekh baro vladari kova ka čhivel le zako caro upri lesiri phuv, a palo adava te irini pe čhere.
13I vičinđa ple deše slugen, dinđa len po ekvaš kilo srebro hem phenđa lenđe: 'Ćeren buti adaleja đikote na avava.' I dželo ko drom.
14A o manuša oti lesiri phuv mrzinde le i bičhalde pumare manušen koro baro vladari vaćerindoj: 'Na mangaja akale te ovel amaro caro.'
15Ked o ugledno manuš irinđa pe sar caro, terinđa te vičinen koro leste okole slugen, kolenđe dinđa love, te dikhel kobor zaradinde.
16O prvo sluga alo vaćerindoj: 'Gospodarona, oto love save dinđan man, ćerđum deš puti edobor.'
17I ov phenđa lese: 'But šukar. Tu injan šukar sluga! Adalese so injanle maje verno ko najxari, dava tut te vladine upro deš dizja!'
18O dujto sluga alo vaćerindoj: 'Gospodarona, oto love save dinđan man, ćerđum pandž puti edobor.'

19I lese phenđa: 'Dava tut te vladine upro pandž dizja!'
20Aver sluga alo bizi zarada vaćerindoj: 'Gospodarona, ače te love save dinđan man. Garavđum len ano jekh kotor e šejengoro.
21Ćerđum ađahar adalese so darandiljum tutar so injan strogo manuš. Leja so nane klo hem čedeja so avera manuša sejinđe.'
22A ov phenđa lese: 'Tu na injan šukar sluga! Palo kle lafija ka sudinav tut. Te džanđan so injum strogo manuš, da lava so nane mlo hem čedava so avera sejinđe,
23sose onda na dinđan mle love ki kamata? Đi akana ka ovel man ine zarada savi ka lav ine avindoj čhere.'
24Tegani phenđa okolenđe kola terdine uzalo leste: 'Len akale slugastar o love hem den la okolese kas isi deš puti edobor!'
25A on inele protiv hem phende: 'Ali, gospodarona, ole već isi pandž kilja srebro.'
26O caro phenđa: 'Vaćerava tumenđe da đijekhe kas isi, ka del pe lese pana, a okole kas nane ka lel pe lestar hem okova xari so isi le.
27A okolen mle dušmanjen, so na mangle te ovav lengoro caro, anen akari hem čhinen len angla mande!'”
28I ked vaćerđa lenđe adava, o Isus dželo nakoro Jerusalim phirindoj anglo ple učenici.
29Ked alo paše uzalo gava Vitfaga hem Vitanija, uzali gora vičimi E maslinakiri, bičhalđa duje učenikonen
30vaćerindoj: “Džan ko adava gav savoi angla tumende. I ked ka đerdinen, ka arakhen phandle terne xere upro koleste pana nijekh manuš na beštino. Phraven le hem anen le akari.
31Te neko pučlja tumen: 'Sose phravena le?', vaćeren lese: 'E Gospodese valjani.'”
32On džele hem arakhle ađahar sar so phenđa lenđe o Isus.
33I sar phravena ine e terne xere, o manuša, kasoro inele o terno xer, pučle len: “Sose phravena e terne xere?”
34A on phende: “E Gospodese valjani.”
35I ande e xere anglo Isus. Čhivde pumare fostanja upro xer hem pomožinde e Isusese te uštel upro leste.
36I sar džala ine anglal bešindoj upro xer, o manuša dinde le čast ađahar so buljarena ine pumare fostanja upro drom anglo leste.

37A ked alo paše uzali nizbrdica E maslinakere goratar, sa o učenici so inele adari lelje radosno hem oto sa o glaso te slavinen e Devle zako sa o čudesija save dikhle:
38“Blagoslovime o Caro kova avela ano anav e Gospodesoro! Nek ovel mir ano nebo hem slava e Devlese ko učipe!”
39Tegani nesave fariseja, kola inele maškaro lende, phende e Isusese: “Učitelju, phen kle učenikonenđe te na vaćeren adava.”
40A o Isus phenđa lenđe: “Te trainde on, o bara ka vičinen slavindoj!”
41I ked o Isus alo paše uzalo Jerusalim, dikhindoj i diz, runđa laće
42vaćerindoj: “Oh, so bi mangava hem tu avdive te džane so ka anel će mir! Ali akanai garavdo te jaćhendar.
43Ka aven o dive ked te dušmanja ka čhivel će barikade, ka opkolinen tut hem taro sa o strane ka pritiskinen tut.
44Ka uništinen hem tut hem te dizutnen. Na ka ačhaven ni jekh bar ko lesoro than adalese so na pendžarđan o vreme ked o Devel alo te spasini tut.”
45Ked o Isus alo ano Jerusalim, đerdinđa ano Hram hem lelja te ispudini adathar okolen so biknena.
46Phenđa lenđe: “Pisimei ko Sveto lil: 'O čher mlo ka ovel than kote o manuša ka molinen pe', a tumen ćerđen lestar 'than kote čedena pe o čora!'”
47I oto dive ko dive, o Isus sikavđa e manušen ano Hram. A o šerutne sveštenici hem o učitelja e Mojsijasere zakonestar zajedno e narodosere starešinencar rodena ine sar te ćeren o Isus te ovel mudardo,
48ali na arakhle so te ćeren adalese so sa manuša pažljivo šunena ine lesoro sikaviba.