1A ked o Isus završinđa plo vaćeriba anglo narodo, đerdinđa ki diz Kafarnaum.
2A jekhe rimljanengere kapetane ine sluga kova inele namborme, anglo meriba, a ceninđa le.
3I ked o kapetani šunđa e Isusese, bičhalđa koro leste e jevrejengere šerutnen te pučel le ako šaj te avel te sasljari lesere sluga.
4A ked ale koro Isus, šukar zamolinde le vaćerindoj: “Ov zaslužini te ćere lese adava
5adalese so mangela amare narodo, hem ov ćerđa amenđe sinagoga.”
6I o Isus dželo olencar. A ked inele paše uzalo čher, o kapetani bičhalđa lese ple amalen vaćerindoj: “Gospode, ma mučin tut, adalese so na injum dostojno te đerdine talo mlo krov.
7Adalese na dikhljum man dostojno te avav đi tute. Nego vaćer samo jekh lafi hem mlo manglo sluga ka ovel sasto.
8Adalese so hem me injum manuš talo autoritet, hem isi man vojnici teleder mande. I jekhese vaćerava: “Dža!”– i ov džala. A averese vaćerava: “Ava!”– i ov avela. A mle slugase vaćerava: “Ćer adava!”– i ov ćerela.”
9A o Isus ked šunđa adava olestar, iznenadinđa pe, irinđa pe nakoro narodo kova džala ine palo leste hem phenđa lenđe: “Vaćerava tumenđe, na arakhljum ni jekhe Jevrejco ano Izrael te ovel le esavki vera.”
10I ked okola kola inele bičhalde irinde pe čhere, arakhle e sluga saste.
11Na but palo adava, o Isus dželo ki diz savi vičime Nain. Oleja da džele lesere učenici hem pherdo narodo.
12A ked alo paše uzalo udar e dizjakoro, reslja e dizutnen sar legarena e mule čhave, kova inele jekhoro pe dajaće koja inele udovica. Pherdo dizutne džana ine e dajaja te parunen e čhave.
13I ked dikhlja la o Gospod, pelo lese žal olaće i phenđa laće: “Ma rov!”
14I alo paše hem dolinđa pe upro nosilja. Tegani okola so akharde terdine, a o Isus phenđa: “Terneja, tuće vaćerava, ušti!”
15I o mulo beštino hem lelja te vaćeri, i o Isus dinđa le lesere dajaće.
16Tegani sare darandile hem slavinde e Devle vaćerindoj: “Baro proroko iklilo maškar amende!” hem: “O Devel alo te pomožini ple narodose!”
17I adava šundilo ko sa o thana e judejakere hem ko sa o pašutne thana.
18I sa adava e Jovanese vaćerde lesere učenici. Tegani o Jovan vičinđa kora peste nesave dujen ple učenikonendar
19i bičhalđa len koro Gospod o Isus vaćerindoj: “Tu li injan adava kolese o Devel dinđa plo lafi da valjani te avel ili te adžićera avere?”
20I adala manuša ale koro Isus hem phende: “O Jovan o Krstitelj bičhalđa amen kora tute vaćerindoj: 'Tu li injan adava kolese o Devel dinđa plo lafi da valjani te avel ili te adžićera avere?'”
21Baš ko adava sati o Isus sasljarđa buten oto nambormipa, oto pharipa hem oto bišukar duhija, i bute kororenđe dinđa dikhiba.
22Tegani o Isus phenđa e Jovanesere učenikonenđe: “Džan hem vaćeren e Jovanese so dikhljen hem so šunđen: o korore dikhena, o bange phirena, o gubavci čistinena pe, o kašuke šunena, o mule uštena, okolenđe soi ani potreba vaćeri pe o Šukar lafi.
23I bahtaloi okova kova nane sablaznime zbog mande.”
24Ked e Jovanesere bičhalde manuša džele, o Isus lelja te vaćeri e narodose e Jovanestar: “So ikliljen ki pustinja te dikhen? I trska sava phudela i barval? Na!
25Ili so ikliljen te dikhen? E manuše ano barvale šeja hurjavde? Na! Okola ano sjajna šeja hem so živinena ano luksuz, eče tane ko palate.
26Ili so ikliljen te dikhen? Proroko? Oja, vaćerava tumenđe, ovi po više oto proroko!
27Ovi okova kolestar o Devel phenđa ano Sveto Lil: 'Ače, bičhalava mle glasniko angla tute, kova ka ćerel će o drom angla tute.'
28Vaćerava tumenđe: maškar okolende kolai bijande nijekh nane po baro e Jovanestar, a o najtikoro e Devlese ano carstvo po baroi olestar.
29I sa o manuša hem o carinici kola šunde adava, pendžarde dai e Devlesoro sikajba čačikano. Oni adala so krstinde pe e Jovanesere krstibnaja.
30A o fariseja hem o učitelja e Mojsijasere zakonestar na mangle te len o plan e Devlesoro pumenđe. Oni adala so na mangle o Jovan te krstini len.
31O Isus phenđa: “Kasar akana te uporedinav e manušen soi akana dživde? Kasei slična?
32Sličnai e manušenđe kola bešena ko drom hem vaćerena jekh averese: 'Bašalđam tumenđe veselo, a na čhelđen! Đilabđam tužno, a na runđen!'
33Ađahar, alo o Jovan o Krstitelj. Ni na xalja maro ni na pilja mol, a phenena: 'O demoni ano leste!'
34Aljum me, o Čhavo e Manušesoro. Xava hem pijava, a phenena: 'Eče manuš xalano hem mato, amal e carinikonengoro hem e avere grešnikonegoro!'
35Ali i mudrost e Devlesiri mothovđa pe dai čačipe sa lakere čhavorendar.”
36Nesavo fariseji palo anav Simon vičinđa e Isuse te avel te xal koro leste. Ov đerdinđa e farisejese ko čher hem čhivđa pe uzalo astali.
37I eče, adari ali i đuvli kolaće džanđa pe dai grešnica ani diz, adalese so šunđa da o Isus inele uzalo astali e farisejese ko čher, i anđa skupo miris ko alabasterno čaro.
38I terdindoj palo lesere pre, runđa i lelja te sampaćeri lesere pre ple asvencar hem koslja len ple balencar. I tegani čumudinđa lesere pre hem makhlja len e miriseja.
39Ked adava dikhlja o fariseji kova vičinđa le, phenđa ana peste: “Tei čače dai akava manuš proroko, ka džanel ine koi hem savi akaja đuvli koja pipini le, adalese soi grešnica.”
40A o Isus phenđa lese: “Simone, isi man nešto te vaćerav će.” A ov phenđa: “Učitelju, vaćer!”
41“Duj džene inele dužnici nesave manušese kova dela love ko zajam. Jekh alo lese panšel e rimljanengere denarija, a o dujto pinda.
42Adalese so na ine len te irinen, ov oprostinđa o dugo sodujenđe. Adalese, ko olendar više ka mangel le?”
43O Simon phenđa: “Mislinava da okova kase oprostinđa više.” Tegani ov phenđa lese: “Oja, šukar phenđan.”
44Irinđa pe nakori đuvli, i phenđa e Simonese: “Dikheja li akala đuvlja? Đerdinđum tuće ko čher, pani mle prenđe na anđan, a oj sampaćerđa mle pre ple asvencar hem koslja len ple balencar.
45Na čumundinđan man ni jekhvar, a oj, sar đerdinđum na ačhavđa te čumudini mle pre.
46Na makhljan mlo šero e uljeja, a oj makhlja mle pre e miriseja.
47Adalese phenava će: “But manglipe mothovđa, adalese soi laće oprostime but greja; a xari manglipe mothoj okova kolesei oprostime xari greja.”
48A olaće phenđa: “Oprostimei će te greja.”
49A o manuša kola inele uzalo astali lelje ana peste te vaćeren: “Kovai akava so šaj hem o greja te oprostini?”
50Tegani o Isus phenđa e đuvljaće: “Ti vera spasinđa tut! Dža ano mir!”
