1Ko jekh savato o Isus nakhino maškaro njive. A lesere učenici čedinde e đivesoro klaso, morde le vastencar hem xale.
2Tegani nesave fariseja phende: “Sose ćerena so na tromal pe ko savato palo e Mojsijasoro zakoni?”
3O Isus phenđa lenđe: “Sar na čitinđen ano Sveto Lil adava o David so ćerđa ked inele bokhalo hem okola da so inele oleja?
4Đerdinđa ano čher e Devlesoro, lelja o posvetime maro, savo nikase na inele muklo te xan sem e sveštenikonenđe, i xalja hem dinđa okolenđe so inele oleja.”
5I phenđa lenđe: “Me, o Čhavo e Manušesoro injum gospodari e savatesoro.”
6Ko aver savato, o Isus đerdinđa ki sinagoga hem sikavđa. Adari inele jekh manuš kasoro desno vas inele šuko.
7Tegani o učitelja e Mojsijasere zakonestar hem o fariseja posmatrinena le ine te dikhen na li ko savato ka sasljari, sar te šaj tužinen le.
8A ov džanđa lengere mislija hem phenđa e manušese kas inele šuko vas: “Ušti hem terđov ko maškar!” I ov uštino hem terdino.
9A o Isus phenđa lenđe: “Te pučav tumen: soi muklo te ćerel pe ko savato: šukaripe ili bišukaripe? Te spasini pe ili te uništini pe o dživdipe?”
10I dikhindoj sarijen, phenđa lese: “Pružin to vas!” I ov ćerđa ađahar hem lesoro vas ulo sasto.
11A o fariseja hem o učitelja e Mojsijasere zakonestar pherdile bari xoli hem vaćerde maškara pumende so te ćeren e Isusese.
12Adala dive, o Isus dželo ki gora te molini pe. I nakhavđa sa i rat ani molitva e Devlese.
13Ked dislilo, vičinđa kora peste ple učenikonen i birinđa olendar dešudujen. Olen vičinđa ''apostolja'':
14e Simone kole vičinđa Petar, hem lesere phrale e Andreja, e Jakove hem e Jovane, e Filipe hem e Vartolomeje,
15e Mateje hem e Toma, e Jakove e Alfejesere čhave hem e Simone kovai vičime Zilot,
16e Juda e Jakovesere čhave, hem e Juda tari diz Iskariot, kova ulo izdajniko.
17I o Isus huljindoj e Dešudujencar, terdino ko ravno than. A adari inele pherdo lesere učenici hem but džene taro sa o thana e judejakere hem tari diz Jerusalim, taro e tiresere hem e sidonesere pašutne thana savei uzalo more.
18Ale te šunen le hem te oven sasljarde oto pumare nambormipa. I saslile okola so inele mučime oto melale duhija.
19I sa o manuša rodinde te pipinen le adalese so baro zoralipe ikljola ine olestar hem sasljari sarijen.
20I o Isus dikhlja ano ple učenici, i lelja te vaćeri: “Bahtale injen tumen o čorore, adalese soi o carstvo e Devlesoro tumaro!
21Bahtalei okola kolai akana bokhale, adalese so ka oven čaljarde! Bahtalei okola kola akana rovena, adalese so ka asan!
22Bahtale injen ked o manuša mrzinena tumen, ked odbacinena tumen, uvredinena tumen hem lađarena tumen da injen bišukar adalese so verujinena ana mande, ano Čhavo e Manušesoro!
23Tegani radujinen tumen hem ripinen oti radost, adalese so adžićeri tumen bari nagrada ko nebo! Adalese so ađahar ćerena ine lengere pradada e prorokonencar ano lengoro vreme!
24Ali jao tumenđe e barvalenđe, adalese so akana leljen tumari uteha!
25Jao tumenđe kola akana injen čaljarde, adalese so ka oven bokhale! Jao tumenđe kola akana asana, adalese so ka tugujinen hem ka roven!
26Jao tumenđe ked sa o manuša vaćerena šukar tumendar! Adalese so ađahar vaćerena ine lengere pradada e xovavne prorokonendar ano lengoro vreme!”
27“A vaćerava tumenđe so šunena: 'Mangen tumare dušmanjen! Ćeren šukaripe okolenđe so mrzinena tumen!
28Vaćeren šukaripe okolenđe so dena tumen armanja! Molinen e Devle okolenđe so ćerena tumenđe bišukaripe!
29Okolese kova khuvela tut ki čham, irin hem aver čham. Okolese kova lela to fostani, ma zabranin hem o gad.
30De đijekhese kova rodela tutar, hem ma rode palal okolestar kova lela tutar.
31I sar so mangena avera te ćeren tumenđe, ađahar ćeren tumen olenđe.
32Te mangljen samo okolen kola tumen mangena, ko ka vaćeri tumenđe hvala? Adalese so hem o grešnici mangena okolen kola olen mangena.
33Ađahar da, te ćerđen šukaripe okolenđe kola tumenđe ćerena šukaripe, ko ka vaćeri tumenđe hvala? Hem o grešnici ćerena ađahar.
34Te dinđen ko zajam love okolenđe kastar adžićerena te irinen tumenđe, ko ka vaćeri tumenđe hvala? Hem o grešnici dena ko zajam jekh averese te šaj irini pe lenđe edobor.
35Nego, mangen tumare dušmanjen, ćeren lenđe šukaripe hem den len ko zajam bizo nisavo adžićeriba te irini pe tumenđe adava! I o Devel ka vaćeri tumenđe bari hvala. I ka oven čhave e Najbaresere, adalese soi ov šukar hem premalo nezahvalna hem premalo okola kola nane šukar.
36Oven milosrdna sar soi milosrdno tumaro Dad kovai ano nebo!”
37Ma sudinen hem čače na ka sudini pe tumenđe! I ma osudinen hem čače na ka oven osudime! Oprostinen hem ka oprostini pe tumenđe!
38Den hem ka del pe tumenđe: mera šukar, pritiskime, tresime hem prepherdi ka čhivel pe tumenđe ki angali. Adalese so sava meraja merinena, esavkaja ka merini pe tumenđe.”
39I vaćerđa lenđe akaja uporedba: “Šaj li o kororo te legari e korore? Na li soduj ka peren ki rupa?
40Nane o učeniko upreder o učitelj. I đijekh kovai sikavdo sa, ka ovel sar plo učitelj.
41A sose dikheja i trunka ani jakh te phralesiri, a i greda ani ti jakh na primetineja?
42Sar šaj te phene te phralese: 'Phrala, aš te ikalavtar i trunka oti jakh', a korkoro na dikheja i greda ani ti jakh? Dujemujengereja, ikal angleder i greda oti ti jakh i tegani šukar ka dikhe te ikale i trunka oti jakh te phralesiri.
43Nane šukar kaš savo bijani bišukar bijandipe, sar so nane bišukar kaš savo bijani šukar bijandipe.
44Adalese so đijekh kaš pendžari pe palo lesoro bijandipe. Sar so džanen, o smokve na čedena pe oto kare ni o drakha na čedena pe oti kupina.
45E šukare manuše isi šukaripe ano vilo, i ađahar, ple vilestar ikali šukaripe, a o bišukar manuš ple vilestar ikali bišukaripe. Adalese so e manušesoro muj vaćeri adava saveja lesoro vilo pherdo.”
46“Sose vičinena man: 'Gospode, Gospode!', a na ćerena so vaćerava?
47Đijekh kova avela mande hem šunela mle lafija hem ćerela len, ka mothovav tumenđe upra kastei:
48Ovi upro manuš kova ćerindoj plo čher xandlja hem ćerđa xor, ćerđa o temelji upro bar hem vazdinđa o čher. I ked ale o panja, i len khuvđa ko adava čher, ali našti ine te potresini le adalese soi ćerdo šukar.
49A okova kova šunđa mle lafija, a na ćerđa len, ovi upro manuš kova ćerđa plo čher ki phuv bizo temelji, ko savo khuvđa i len hem otojekhvar peravđa le i oto čher uli bari ruševina.”
