Luka 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹O Isus ple učenikonenđe vaćerđa akaja paramiz: “Jekhe barvale manuše ine upravniko kole tužinde da xalja lesoro barvalipe.

²I o barvalo vičinđa le hem phenđa lese: 'So šunava tutar adava? Ana maje o spisko kote pisinđan mle lovendar adalese so našti više te ćere buti kora mande sar upravniko!'

³Tegani o upravniko phenđa ana peste: 'So ka ćerav ked mlo gospodari ka cidel man tari buti? Na injum kaderi te xanav, a lađava te prosinav.

⁴Džanav so te ćerav te šaj priminen man o manuša pumenđe ano čhera ked ka ovav cidime tari buti.'

⁵I vičinđa sa ple gospodaresere dužnikonen, i phenđa e prvonese: 'Kobor aveja mle gospodarese?'

⁶A ov phenđa: 'Šel burija uljeja.' Tegani o upravniko phenđa lese: 'Siđar le o lil klo hem čhiv da aveja lese pinda.'

⁷I pučlja avere: 'A tu kobor aveja mle gospodarese?' A ov phenđa: 'Šel burija điveja.' I olese da phenđa o upravniko: 'Le o lil klo hem čhiv da aveja lese oftovardeš.'

⁸I o gospodari pohvalinđa e nepoštenone upravniko so inele džando i so ađahar postupinđa. Akava mothoj dai o manuša oti akaja phuv po džande ko postupci premalo pumarende taro manuša oto svetlost.

⁹Vaćerava tumenđe: ćeren o manuša te oven tumare amala ađahar so ka pomožinen lenđe akale phuvjakere barvalipnaja, te šaj, ked na ka ovel tumenđe više korisno adava barvalipe, te oven primime ano večna čhera ano nebo.

¹⁰Kovai verno ano najtikore buća, ov ka ovel verno hem ano najbare; a kova nane pravedno ano najtikore buća, ov na ka ovel pravedno hem ano najbare.

¹¹Te na injen verna ano akala phuvjakoro barvalipe, ko ka mukel tumenđe ano vasta o čačimasoro barvalipe?

¹²Te na injenle verna ano averesoro barvalipe, ko ka del tumen tumaro?

¹³Nijekh sluga našti kandel duje gospodaren ko isto vreme. Ili ka mrzini jekhe, a ka volini e dujtone; ili jekhese ka ovel poslušno, a e dujtone na ka podnosini. Našti kanden hem e Devle hem o barvalipe ko isto vreme.”

¹⁴Sa adava, so vaćerđa o Isus, šunde o fariseja kola volinde barvalipe, i asandile lese.

¹⁵A o Isus phenđa lenđe: “Tumen injen adala so ćerena tumen pravedna anglo manuša, ali o Devel džanel dai tumare vile bišukar. Jer soi but vredno e manušenđe, adavai gadno e Devlese.

¹⁶O Zakoni e Mojsijasoro hem o Lila e purane prorokonengere sikavena ine e manušen đi o aviba e Jovanesoro, a od tegani vaćeraja o šukar lafi taro carstvo e Devlesoro hem terinaja sarijen te đerdinen ano leste.

¹⁷Ali angleder o nebo hem i phuv ka nakhen, negoli jekh crtica oto e Mojsijasoro zakoni te properel.

¹⁸Kova tumendar mukela pe romnja i lela avera, ćerela preljuba. Hem kova lela romnja kola o rom muklja, ćerela preljuba.”

¹⁹O Isus phenđa: “Inele nesavo barvalo manuš kova hurjela pe ine sa ano najšuže šeja hem taro dive ko dive xala ine najšukar xabinja.

²⁰Angli lesiri kapija sa ano čirevija pašljola ine nesavo čororo manuš palo anav Lazar.

²¹Ov but manglja te čaljari pe e troškendar save perena ine taro e barvalesoro astali. I ko sa adava, sar pašljola ine angli kapija, o diline đukle da avena ine hem ližinena lesere čirevija.

²²Ked mulo o čororo, o anđelja legarde le e Avraamese ani angali. I o barvalo da mulo hem inele parume.

²³I ano than e mulengoro, ano bare muke, o barvalo vazdinđa ple jaćha hem odural dikhlja e Avraame hem e Lazare lese ani angali.

²⁴Tegani vičinđa: 'Dade Avraame, smilujin tut maje hem bičhal e Lazare te čhivel plo upruno kotor e najestar ano pani hem te avel te šudrari mli čhib, adalese so but injum mučime ani akaja jag.'

²⁵A o Avraam phenđa: 'Mlo čhavo, setin tu da priminđan to šukaripe tuće ko dživdipe, a o Lazar plo bišukaripe. A akanai e Lazarese šukar akate, a tu mučineja tut.

²⁶Sem adava, isi bari provalija maškar amende hem tumende i te manglja neko te nakhel akatar kora tumende ili adathar kora amende, na ka šaj.'

²⁷A o barvalo phenđa: 'Onda molinava tut, dade Avraame, bičhal e Lazare mle dadese ko čher.

²⁸Adari isi man pandž phralja. Nek o Lazar vaćeri lenđe te obratinen pe te na aven hem on ko akava than e mukengoro.'

²⁹A o Avraam phenđa: 'Isi len e Mojsijasoro zakoni hem e prorokonengere lila! Nek šunen olen!'

³⁰A ov phenđa: 'Nane adava dovoljno, dade Avraame! Ali te alo lenđe neko taro mule, ka obratinen pe.'

³¹I o Avraam phenđa lese: 'Te na šunde adava so pisinđa o Mojsije hem o proroci, na ka šunen ni te uštino neko taro mule.'”