Kʋtɔɔsʋtʋ I 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

¹Ḿpʋ́ɣʋ́ Tiii wulɑʋ Hilɑm kʋsɑ yǝlɑɑ nɑ pɑ́ polo Tɑfiiti kɛ sɛɛʋ, nɑ ɩ́ hɑnɑ-ɩ kpeŋkpelɑsɩ kʋpɑŋsɩ nɑ pɛɛ sɑɑkǝlɑɑ, nɑ kɑɑfǝntɑnɑɑ, sɩ pɑ́ ŋmɑ-ɩ kɑwulɑɣɑ tǝyɑɣɑ.

²Ɩlɛnɑ Tɑfiiti cɛkǝnɑ sɩ Tɑcɑɑ mɑɣɑmɑɣɑ kpɑnɑ-ɩ Ɩsɛɣɛlɩ wulɑʋ. Nɑ ɩ kɑwulɑɣɑ toŋ tɔŋnɑ sɔɔsʋɣʋ kɛ Ɩsɔ yǝlɑɑ tɔɔ.

³Ḿpʋ́ɣʋ́ Tɑfiiti kpɑɣɑ ɑlɑɑ lɛlɑɑ kɛ Yosɑlɛm nɑ ɩ́ lʋlɩ ɑpɑlʋpiyɑ nɑ ɑlʋpiyɑ.

⁴Hɑlɩ ɩ pǝyɑlɑɑ mpɑ ɩ lʋlɑ tǝnɑ tɔ pɑ hǝlɑ ntɔ: Sɑmʋwɑ, nɑ Sopɑpɩ, nɑ Nɑtɑŋ, nɑ Sɑlʋmɔŋ,

⁵nɑ Ɩpɑɑ, nɑ Ɩlisuwɑ, nɑ Ɩlǝpelɛtɩ,

⁶nɑ Nokɑ, nɑ Nefɛkɩ, nɑ Yɑfiyɑ,

⁷nɑ Ɩlǝsɑmɑ, nɑ Peeliyɑtɑ, nɑ Ɩlǝfelɛtɩ.

⁸Filiisi nyǝ́mɑ nɩɩwɑ sɩ Tɑfiiti tɔɣɔ kɑwulɑɣɑ kɛ Ɩsɛɣɛlɩ tǝnɑ tɔɔ, ɩlɛnɑ pɑ́ polo-ɩ yoonɑʋ. Tɑfiiti nɑ́ nɩ́ɩ́ mpʋ, ɩlɛnɑ ɩ́ sǝŋ-wɛ.

⁹Ḿpʋ́ɣʋ́ Filiisi nyǝ́mɑ wɑtɑ Lefɑyi nyǝ́mɑ tɛtɛkǝlɛ.

¹⁰Ɩlɛnɑ Tɑfiiti pɔɔsɩ Ɩsɔ sɩ: Mɑ́ polo mɑ́ yoonɑ Filiisi nyǝ́mɑ nɑ? N kɑ́ tʋ-wɛɣɛ mɑ niŋ tɑɑ? Ntɛnɑ Tɑcɑɑ sɩ: Polo nɑ ń yoonɑ-wɛ. Mɑɑ tʋ-wɛɣɛ nyɑ́ niŋ tɑɑ.

¹¹Ḿpʋ́ɣʋ́ Filiisi nyǝ́mɑ tuusɑɑ nɑ pɑ́ tɑlɑ Pɑɑlɩ-Pelɑsim. Tǝnɑɣɑ Tɑfiiti kʋ-wɛ nɑ ɩ́ tɔ sɩ: Tɑcɑɑ hɛɛ mɑ kolontunɑɑ tɑɑ kɛ́ ɩkpɑtɛ nɑ mɑ niŋ. Ɩsɩɩ lɔɔʋ fɑkʋɣʋ hɑpǝlɛ tɔ. Pǝ tɔɔ kɛ́ pɑ hɑ tǝnɛ ɩnǝɣɩ hǝtɛ sɩ: Pɑɑlɩ-Pelɑsim. Pǝ nyʋɣʋ ntɛ́ sɩ ɑkpɑɑ hɛɛlʋ, nɑ pɑ tɛ tɑɑ.

¹²Filiisi nyǝ́mɑ seekɑɣɑ, ɩlɛnɑ pɑ́ yele pɑ lɛɛsǝŋ kʋlɑlɑɑŋ. Ḿpʋ́ɣʋ́ Tɑfiiti tɔmɑ sɩ pɑ́ sɔ lɛɛsǝŋ kʋlɑlɑɑŋ ɩnǝɣɩ kɔkɔ.

¹³Ḿpʋ́ɣʋ́ Filiisi nyǝ́mɑ tɑɣɑnɑ Lefɑyi tɛtɛkǝlɛ kɛ wɑ́tʋ́ɣʋ́.

¹⁴Ntɛnɑ Tɑfiiti tɑsɑ Tɑcɑɑ kɛ yɔɣɔtǝnɑʋ, nɑ Ɩsɔ cɔ-ɩ sɩ: Tɑɑ polo pɑ tɔɔ nɑ pɑ wɑɑlɩ tɔɔ. Amɑ cɛ-wɛ nɑ ń kpǝtǝnɑ-wɛɣɛ tɩɩŋ tɑɑlɛ hɔtʋɣʋ nɔɣɔ.

¹⁵Ye n nɩɩwɑ yǝlɑɑ nɔɔhɛɛ kɛ tɩɩŋ nyɔɔŋ tɑɑ, ɩlɛ n tii pɑ tɔɔ kɛ́ kpɑkpɑɑ. Mpi tɔ, wɑɑtʋ ɩnǝɣǝlɛ mɑ kɔmɑ sɩ mɑ yookinɑ Filiisi nyǝ́mɑ kɛ nyɑ́ nɔɣɔ tɔɔ.

¹⁶Mpʋɣʋlɛ Tɑfiiti lɑpɑ teitei ɩsɩɩ Tɑcɑɑ heeluɣu-ɩ tɔ, nɑ Ɩsɛɣɛlɩ nyǝ́mɑ yoonɑ Filiisi nyǝ́mɑ kɛ pǝ kpɑɣɑʋ Kɑpɑwɔŋ tɔ, hɑlǝnɑ Kesɛɛ.

¹⁷Pǝ kpɑɣɑʋ wɑɑtʋ ɩnɩ tɔɣɔ Tɑfiiti hǝtɛ yɑɑwɑ tɛtʋnɑɑ tǝnɑ tɑɑ, nɑ Tɑcɑɑ yele nɑ piitimnɑɑ tǝnɑ nyɑŋnɑ-ɩ.