Text copied!
CopyCompare
Kâte Bible - Binaŋ Qâhâc I

Binaŋ Qâhâc I 14

Help us?
Click on verse(s) to share them!
1Eme Tiro ŋicwofuŋ Hiramzi Dawidirao kiŋaŋŋic sorec‐jopawec. Ehuc jâmâzâc jâc wiac râecnewec. Erâ qânâzi fic bapa ŋic â kamunda râec‐jopame jaŋe rarâ Dawidire fic moc bambiŋ.
2Iŋuc epie Dawidizi ʒiŋuc mana tarawec: Israe ŋic jaŋere ŋicwofuŋ jupemurâ Wofuŋzi hume keteŋ enarewec â Israe ŋicfâc‐ticne jaŋere erâ uucmaŋ‐nane bafaharewec.
3Eme Dawidi e Jerusalem haeo ŋonâŋfâc‐ticne mocwâc ʒuhuckerâ rocjopawec. Rocjopame naru motecfâc‐ticne gâcne ʒuhuckerâ fuambiŋ.
4Eme naru motec Jerusalem haeo fuambiŋ jaŋere ʒâŋe ʒiŋuc: Samua, Sobabe, Nataŋ â Salomo,
5Ibiha, Elisua â Elipaleti,
6Noga, Nefege â Jafia,
7Elisama, Beliada â Elifele.
8Israe ŋic jaŋe Dawidi wokemaŋ ruacnerâ ŋicwofuŋ‐jeŋic âkendâŋnembiŋ. Filisa ŋic jaŋe biŋe iŋuc manarâ e bâfuarâ qaniŋte fisimbiŋ. Eme Dawidi e biŋe‐jeŋic manarâ jopaocte rawec.
9Ehame Filisa ŋic jaŋe Refaim wâneŋko râsi ututuŋ fisimbiŋ.
10Eme Dawidi e Wofuŋ wiocnehuc muwec, “No Filisa ŋic râsi sâcne fisi‐jarepemu me? Go nore meo sâcne râec‐jopacmu?” Iŋuc wiome Wofuŋzi ʒiŋuc âzâcnewec: “Sâcne fec, eme no Filisa ŋic gore meo râec‐jopa‐jâmbâŋkepemu.”
11Iŋuc muhuc âzâcneme Dawidi e mâreŋ ŋondeŋ moc, ʒâŋene Baali‐Perazim, ira ferâ Filisa ŋic bawahac‐jopawec. Ehuc muwec: “Anutuzi bânie‐narehuc opâ rumi iŋucne erâ menaneonec kisâfâc‐nane âke rârâec‐jopawec.” Irec hâcne mâreŋ ŋondeŋ irec ʒâŋe Baali‐Perazim mukicne.
12Eme Filisa ŋic jaŋe nemuɋâŋ wiac‐jeŋic ijaha hetararâ wisepie Dawidizi ŋic ejareme rikembiŋ.
13Eme Filisa ŋic jaŋe Refaim wâneŋko mocwâc râsi fisimbiŋ.
14Eme Dawidi e Anutu mocwâc mu wioc ecneme Anutuzi ʒiŋuc âzâcnewec: “Go ferâ izia mi jopazemec. Go getâc‐jopahuc rarâ râpe‐jeŋicko binawec jâc domakackopec fisi‐jarezemec.
15Erâ kike fânâŋ‐jeŋiczi sawao fotâcneme manarâ izia ʒika fuŋkezemec. Anutu no bânie‐garehuc Filisa momori ŋic jopapemu hâcne.”
16Eme Dawidi e Anutuzi mutâcnecnewec irec sâcko ewec. Ehuc Filisa ŋic Gibeoŋ haeonec jopa jopa raku Geʒera haeo fisiwec.
17Eme Dawidire ʒâŋe biŋezi mâreŋ sâc rafârewec. Ehame Wofuŋzi ŋic gurune gurune ejareme e araŋ bacnembiŋ.