1. Kronika 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

¹Iwe, Hairam ewe kingen Tirus a tinala chon künö ren Tafit, a pwal tinala irä setar, chon ses fau me taikü, pwe repwe aüetä eu imw fän iten Tafit.

²Iei mine Tafit a mefi, pwe ewe Samol mi Lapalap a anüküchara lon wisan wisen king lon Israel, a pwal fokun afefeitä mwün fän iten nöün aramasen Israel.

³Iwe, Tafit a pwal angei ekoch pwülüan me lon Jerusalem, a pwal wor nöün ät me nengin me wor.

⁴Ikkei iten nöün kewe a nöüniir me lon Jerusalem: Samua, Sopap, Natan, Salomon,

⁵Ipar, Elisua, Elpelet,

⁶Noka, Nefek, Jafia,

⁷Elisama, Peliata me Elifelet.

⁸Iwe, lupwen ekewe chon Filistia ra rong pwe Tafit a seikitä king won unusen Israel, ra feila meinisin pwe repwe aoi Tafit. Nge lupwen Tafit a rong usun, a feila pwe epwe maun ngeniir.

⁹Iwe, ekewe chon Filistia ra feito lon ewe lemolun Refaim o angei liaper.

¹⁰Nge Tafit a aisini Kot, “Ifa usun, üpwe feila maun ngeni ekewe chon Filistia? Ifa usun, kopwe awinnaei?” Iwe, ewe Samol mi Lapalap a üreni Tafit, “Kopwe feila maun ngeniir, nge üpwe awinnok.”

¹¹Iei mine Tafit a feila Pal-perasim o akufu ekewe chon Filistia me ikenan. Iwe, a apasa, “Kot a nöünöü ngang pwe üpwe küütalong ekewe tettelin sounfiu mi oputaei, usun puun eu chanpupu a pwangenalong ewe fanü ünükün.” Iei mine ewe leni a iteni Pal-perasim .

¹²Lupwen ekewe chon Filistia ra sü, ra likitala ar kewe uluulun anümwäl ikenan. Nge Tafit a allük pwe repwe kenirela.

¹³Mürin, ekewe chon Filistia ra feitosefäl pwe repwe angei liaper me lon ewe lemol.

¹⁴Nge lupwen Tafit a aissefäl ngeni Kot, Kot a üreni, “Kosap fetal wenewen ngeniir, nge kopwe pwelila lükisökürür o maun ngeniir seni akawenewenen ekewe irä pwokus.

¹⁵Iwe, lupwen kopwe rongorong mwataten peche le ülün ekewe irä pwokus, lon ena otun kopwe popuetä le maun ngeniir, pun ngang üpwe akomwowu mwom, pwe üpwe niela ekewe sounfiun Filistia.”

¹⁶Tafit a föri usun mine Kot a allük ngeni. Iwe, ra niela ekewe sounfiun Filistia seni Kipeon tori Keser.

¹⁷Iwe, iteüöchün Tafit a chöfetal lon ekewe fanü meinisin, nge ewe Samol mi Lapalap a föri pwe chon ekewe mwü meinisin ra niuokusiti Tafit.