Bɑndun Gɑri I 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

¹Sɔ̃ɔ teeru, Hirɑmu, Tirin sunɔ u Dɑfidi sɔmɔbu ɡɔriɑ kɑ dɑ̃ɑ ɡeɑ ye bɑ sokumɔ sɛduru kɑ dɑ̃ɑ dɑ̃kobu kɑ be bɑ rɑ kpenu dɑ̃ku, kpɑ bu nùn sinɑ kpɑɑru bɑniɑ.

²Dɑfidi u tubɑ mɑ Gusunɔwɑ u win bɑndun dɑm siremɔ. Wiyɑ u mɑɑ bɑn te wɔlle suɑmɔ win tɔmbu Isirelibɑn sɔ̃.

³Yen biru Dɑfidi u mɑɑ kurɔbu ɡɑbu suɑ Yerusɑlɛmuɔ. Mɑ bɑ nùn bii tɔn durɔbu kɑ tɔn kurɔbu mɑruɑ.

⁴Berɑ Sɑmuɑ kɑ Sobɑbu kɑ Nɑtɑni kɑ Sɑlomɔɔ

⁵kɑ Yibɑɑ kɑ Elisuɑ kɑ Elifelɛti

⁶kɑ Nɔɡɑ kɑ Nɛfɛɡi kɑ Yɑfiɑ

⁷kɑ Elisɑmɑ kɑ Beliɑdɑ kɑ sere Elifelɛti ɡoo.

⁸Ye Filisitibɑ bɑ nuɑ bɑ Dɑfidi ɡum tɑ̃re wirɔ u kuɑ Isirelibɑ kpuron sunɔ, yerɑ be kpuro bɑ seewɑ bɑ nùn wɔrim wee. Ye u nuɑ mɛ, yerɑ u sɑrɑ u dɑ u kɑ bu yinnɑ.

⁹Sɑɑ ye sɔɔrɑ Filisiti be, bɑ tunumɑ bɑ tɛriɑ Refɑn wɔwɑɔ.

¹⁰Mɑ Dɑfidi u Yinni Gusunɔ bikiɑ u nɛɛ, n doo n Filisiti be wɔri? Kɑɑ mɑn bu nɔmu bɛriɑ? Mɑ Yinni Gusunɔ u nùn wisɑ u nɛɛ, ɑ doo, kon nun bu nɔmu bɛriɑ.

¹¹Mɑ bɑ seewɑ bɑ dɑ Bɑɑli Perɑsimuɔ. Miyɑ Dɑfidi u Filisiti be ɡo ɡo. Mɑ u ɡeruɑ u nɛɛ, Yinni Gusunɔ u nɛn yibɛrɛbɑn wuuru ɡĩɑ nɡe mɛ nim torɑ yɑ rɑ ɡunɑ ɡĩɛ. Yen sɔ̃nɑ bɑ yɑm mi yĩsiru kɑ̃ Bɑɑli Perɑsimu.

¹²Yerɑ Filisiti be, bɑ duki suɑ bɑ ben bwɑ̃ɑrokunu deri mi. Mɑ Dɑfidi u win tɔmbu sɔ̃ɔwɑ bu nu ɡuro bu dɔ̃ɔ mɛni.

¹³Amɛn biru, Filisiti be, bɑ kpɑm nɑ bɑ tɛriɑ Refɑn wɔwɑ mi.

¹⁴Mɑ Dɑfidi u Yinni Gusunɔ bikiɑ u nɛɛ, n mɑɑ doo n bu wɔri? Mɑ Yinni Gusunɔ u nùn wisɑ u nɛɛ, oo. Adɑmɑ ɑ ku dɑ sɔru sɔrum mɛ. A besiro kpɑ ɑ dɑ ɑ n wɑ̃ɑ dɑ̃ɑ ye bɑ mɔ̀ miren sɔ̃ɔwɔ.

¹⁵Sɑnɑm mɛ ɑ nɑɑ dɑmu dɑmusu ɡɑsu nɔɔmɔ dɑ̃ɑ wɔllɔ, ɑ yɑrimɑ. Domi nɛ, Yinni Gusunɔwɑ nɑ nun ɡbiiye n kɑ ben sɑnsɑni ye wɔri.

¹⁶Mɑ Dɑfidi u kuɑ nɡe mɛ Yinni Gusunɔ u nùn sɔ̃ɔwɑ. U dɑ u Filisiti be ɡo ɡo sɑɑ Gɑbɑonin di n kɑ dɑ Gesɛɛɔ.

¹⁷Mɑ Dɑfidi u yĩsiru yɑrɑ tem bɑɑmɑ kpuro sɔɔ. Mɑ Yinni Gusunɔ u nùn dɑm wɛ̃ bwesenu kpuro sɔɔ.