Text copied!
CopyCompare
Buka Hope - 1 Koronikolo

1 Koronikolo 14

Help us?
Click on verse(s) to share them!
1E Hiramu sa baṉara pa Taea si garunu la tie paleke inavoso koe Devita; poni nia dekuru huda sida sa si asa meke sari na kamada na tie peqo patu sa pude tavetia sa vetu baṉara.
2Gua asa ke gilania Devita sapu ele va turu va nabua e Zihova si asa pude na baṉara pa Izireli, meke tava ululu sa nana butubutu baṉara pa laedi rina nana tinoni pa Izireli.
3Vagi va soku barikaleqe pule se Devita pa Zerusalema, meke soku la tu sari tuna koreo meke tuna vineki.
4Hire sari na pozadi rina tuna Devita pu podo pa Zerusalema: ari Samua, Sobabu, Netani, Solomone,
5Ibaha, Elisua, Elipeleti,
6Noga, Nepeqi, Zapia,
7Elisama, Beliada, meke e Elipeleti.
8Ta tozi nia ri na tie Pilisitia sapu tava baṉara se Devita pa Izireli gua, ke topue sari na tie varipera pude la saputu vagia si asa gua. Sipu avoso nia Devita sapu gua asa, si gore la si asa pude razai.
9Ura sari tie Pilisitia si ele kamo la tu pa lolomo Repaemi meke zau vagi dia likakalae.
10Ke nanasa la koe Tamasa se Devita, “Vea, kaqu la rapati rau sari na tie Pilisitia hire? Vegua kaqu poni nau Goi sa minataqara?” gua. Meke olaṉa se Zihova, “Uve, la mamu rapati, sina kote ponini gamu Rau sa minataqara pude va kilasi sari na tinoni Pilisitia.”
11Ke la pa Beolo Perazimi se Devita meke vasina si va kilasi sa sari na tie Pilisitia. Zama si asa, “E Zihova si ele huara nuquru la i sari na qua kana guana naqe.” Gua asa ke ta pozae Beolo Perazimi sa vasina asa.
12Sipu govete sari na tie Pilisitia si veko pani rini sari dia beku, meke garuni Devita sari na nana tie pude sulu pani sari na beku.
13Lopu seunae si pule la tu pa lolomo Repaemi sari na tie Pilisitia meke zau pule vagi dia likakalae.
14Ke nanasa pule la koasa Tamasa se Devita meke olaṉa si Asa, “Mu lopu ene toṉoto la i, ba mamu ene likoho ni. Mamu rapata i pa mudidia, tata koari na hudahuda balasamu.
15Pana avosia gamu sa ene halabutu pa batu huda, si mamu tiqe rapata ni, sina Arau si kaqu ene va kenue koa gamu pude va kilasia sa qeto minate Pilisitia.”
16Lulia Devita gua sapu garunu nia sa Tamasa, meke hadu pule ni sa sari na tie Pilisitia podalae pa Qibione meke kamo la tu pa Qeza.
17Sa inavosona e Devita si ene beto koari doduru popoa, meke va matagutu betoi sa Tamasa sari doduru butubutu.