Hiobe 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Eme juku Hiobe e fuŋkerâ mu huacbuc ehuc fufua dameŋ‐ticne sâweckewec.

²Ehuc dâŋ kecʒiŋuc muwec:

³“Fufua dameŋ‐nane i sâwecte biŋe ezejec, â neŋgoc‐nanezi fuŋkerâ kiwecnuwec ŋafe i wâc iŋuc jaha.

⁴O Anutu, go mutec ʒoaŋ i dapâc ezejec, ehuc ʒoaŋ irec mocwâc mi manasuzemec, â tatamacge sakarecnezemec.

⁵Go mutec ʒoaŋ i ŋaferâ dapâc siŋsiŋ ezejec, ehame karoraczi fuarâ ʒoaŋ sâockezejec.

⁶Go mutec ŋafe ira dapâc qisiric fuazejec, erâ ŋafe i ʒoaŋ gie bapa birionec bârâriezemec, ehame mosare birio wâc omaezejec.

⁷Ŋafe ira ɋâric mocwâc mi fuapie ʒeri fânâŋ tâmiric fohuc juzejec.

⁸Qaŋgec bapa mujaretec ʒoaŋ i sâweckenʒepieŋ, oâ sâko ʒâŋene Lewiataŋ suruckepie momori eekac jaŋe iŋuc hâcne enʒepieŋ.

⁹Go mutec bâpiŋ sâkozi mocwâc mi tamaezejec, ehame ŋafe ira hae mocwâc mi furezejec.

¹⁰Ŋafe izi neŋgoc‐nanere bumaŋkonec fuapemurâ aka mi hehuc ʒâic busâqoc maŋko râecnuwecte sâweckezo wâc.

¹¹“No wemocte neŋgoc bumaŋko mi hâmopo, me fuarâ izia wemocte mi omaepo?

¹²Neŋgoc‐nanezi wemocte qicnuwec, â wemocte moŋ gumecnuwec?

¹³No dameŋ ira hâmozapo muzac ʒiŋuczia ʒâŋeruŋko fomanazapo.

¹⁴Ŋicwofuŋ â babaficfâc‐jeŋic hae sesuc heɋârehuc bâpiaŋkembiŋ jaŋehec fozapo hâcne.

¹⁵Me ŋic fekicne ficjeŋic gol â siliwazi hefusembiŋ jaŋe iŋucne fozapo.

¹⁶Me naru motec hâmocne fuaeŋgopieŋ jaŋere sâc wemocte mi fuapo?

¹⁷Ŋic sindaŋne jaŋe ʒâŋe ʒâŋeruŋko hâcne gie‐jeŋic hetaraeŋgopieŋ, â betaŋkeeŋgopieŋ jaŋe ira fomanaeŋgopieŋ.

¹⁸Kâpâcwâru ŋic jaŋe ira hâcne âke mâteŋ‐jopaekac, ehame soŋaŋfâc‐jeŋic jaŋere owa fânâŋ mocwâc mi manaeŋgopieŋ.

¹⁹Ira hâcne kâcɋene mecne piticne mecne mâmâc fomanaeŋgopieŋ, â kiŋaŋ qaqa jaŋe bomboŋfâc‐jeŋic jaŋere meo mocwâc mi jueŋgopieŋ.

²⁰“Kihuhuŋ‐jopaekac jaŋe Anutuzi wemocte tatamac bâfua‐jareekac, a busâqoc manahuc jueŋgopieŋ jaŋe wemocte juju tahac‐jopaekac?

²¹Jaŋe hâmocte woŋec juipieeŋgopieŋ, ehuc moneŋ mafare mâcne, ʒâŋeruŋte manapie fefene eekac,

²²Jaŋe ʒâŋeruŋko huniŋte boc ejareekac, eme ira fohuctecne ʒeri sâko bâfuaeŋgopieŋ.

²³Anutu e wemocte ʒâhec juju‐jeŋicte fuŋne hesoŋke‐jarehuc hata‐jeŋic sasawa hebâzicke‐jareekac?

²⁴Mu huacbuc‐nane izi nânâ‐nane eekac, â kio huse ee‐nanezi ine opâ sâro iŋucne wahaekac.

²⁵Hâhâwic bâfua‐nareekac wiac sasawa izi fai‐naneo fefâreekac.

²⁶No wama faio mâcne, sisi hâhâŋ faio juekopac, ehame ʒârâ hâriŋ wiaczi moc mi behecnuekac.”