Hiobe 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Ŋic ŋokackonec fuaeŋgopeneŋ nâŋâc juju dameŋ‐nâŋec bembeŋne â neneŋ gie‐ticnehec.

²Nâŋâc ʒariŋ ârizi fuarâ ŋeindaŋnehuc mocwâc mârâŋkeekac, erâ nâkumuczi ʒoraha hae ŋafeme biac omaeekac irec sâc eeŋgopeneŋ hâcne.

³Eme no irec sâc jaha juhape go honecnu‐bipiehuc dâŋgieo râecnuzo mukomec me?

⁴Ŋic wâwânâŋhec jaŋeraonec ŋic wâwânâŋ tâmiriczi sâcne fufuane me? Aric kereŋne jâmbâŋ!

⁵Go ŋic juju dameŋ‐nâŋecte ʒâfo bahuc mosa dameŋ‐nâŋec biac mupaŋkemeŋ, erâ i jâurunʒipeŋte aka henâremeŋ wâc.

⁶Irec go behecnurâ norao ʒâŋe mocwâc mi fizemec, eme no wama faio kiŋaŋ qaqa gie bahuc juju dameŋ‐nanere ʒeri bubiaŋ manazepac.

⁷“Jâc moc qapene mocwâc gitec hezo murâ heocmu mecne.

⁸Jâc tucne â gâtâne i mâreŋmaŋko hâmozo eha

⁹opâ ruacnepene mocwâc gitec herâ jâc ɋâricne iŋucne soka sanaŋ eocmu.

¹⁰Ŋiczi ine irec sâc aricne, e hâmome taraekac, e iŋuc me iŋuc mocwâc mi eocmu.

¹¹Dameŋ moc maickeocmu ira opâ jaŋe ʒicke‐fâreniŋmu â hâwec sâkozi wâc kereŋkeocmu.

¹²Hâmokicne jaŋe mocwâc mi fahareniŋmu, jaŋe qânikiŋzi fosanaŋkeha mocwâc mi ɋâre‐jâmbâŋkeniŋmu, aricne, jaŋe guŋsanaŋ fohapie moczi moc mi wiwic‐jopaocmu.

¹³Go hâmoc haeo ɋâricne soŋnucmurâ enarekac, eme no ira soŋkerâ juhape aaricge fâre wahazejec, ehame nore manasuhuc ʒâfo moc bacmu i maickezejec.

¹⁴Ŋic hâmoocmuzi mocwâc sâcne ɋârerâ risieocmu me? Iŋuc eene moc fome muzac no ʒârâ ʒâpâ dameŋ ʒi omaeme dameŋ biaŋne moc fua‐nareocte woŋec juzapo.

¹⁵Eme go dameŋ ira wira‐naretec dâŋ okacne bâtikie‐garezapo, ehame meqâreŋge no honecnucmurâ egarezac.

¹⁶Ehuc juju bapa‐nane mocwâc soŋaŋkehuc sâqocne‐nanere nikecguzac.

¹⁷Erâ go sâqocne‐nane bârârie‐narehuc bâtâmirenʒaŋ, ehuc hehesic‐nane sasawa i wâc bârârâŋnenʒaŋ.

¹⁸“Manakic, dameŋ moc maickeocmu ira tiki jaŋe fâuckerâ ʒaŋkeniŋmu, â haroŋaŋ jaŋe ŋerârieniŋmu.

¹⁹Opâzi qânâ âeckekume pitiwaekac, â hoe micsâkozi mâreŋ wokemaŋne jowa‐fâreekac irec sâc jaha goki ŋicte woworic qatec wahaekac.

²⁰Go ŋic tâpiri‐ticne bawaharâ behetec ratâmireekac â hawari‐ticne hetikiehuc maigaonec bârârie sanaŋkeekic.

²¹E mi manaha ŋokâfâcne jaŋe ʒâŋe biŋehec eeŋgopieŋ, erâ wâc mi manaha mocwâc omae‐jareekac.

²²E jahacne sahacte sawa ʒâic manaekac, ehuc e jahacnerea ki busâqoc eekac.”