Hiobe 30

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Ŋic socɋâri jaŋe nore sâc mi eŋgopieŋzi gâwie‐nareŋgopieŋ. No mamacfâc‐jeŋic jaŋere manape jawa qaqane eha qâtofâc‐nane bafic‐jopahuc lamafâc‐nane soŋaŋ‐jopaniŋte mupie muzac mi mana‐jarezapo.

²Jaŋe ŋicguru rorokacnezi nore gie moc baniŋte tâpiri basanʒapiŋ.

³Jaŋe ŋic hapetacte nânâre hâmo sipiric ehuc kâteonec wâcwiac gâtâne unucke nâc ejumbieŋ.

⁴Jaŋe wawec â wifu hândâŋne nâjumbieŋ, â qaqanaczi nânâ‐jeŋic ejujec.

⁵Fiuc roro owackecnehuc jâpeeŋgopeneŋ irec sâc jaha owacke‐jarehuc jâpec‐jopa jumbieŋ.

⁶Eme opâwâcko â haroŋaŋ ŋoŋondeŋko soŋke jumbieŋ, erâ qânâuŋko â mâreŋ tucduŋko juju fofo ejumbieŋ.

⁷Jaŋe qowi iŋucne kâteo juhuc owacke jumbieŋ, ehuc jâcfuŋko heheâroŋ erâ ŋejumbieŋ.

⁸Jaŋe ŋicguru waha qaqane â ʒâŋe biŋe tâmiric, irec mâreŋ‐nâŋeckonec jâpec‐jopapie wise‐fârembiŋ.

⁹“Jaŋe dameŋ ʒiŋuczia ware mu gâgâwi enareŋgopieŋ, ehuc juju‐nanere qâqiŋ qahuc âke sisic enareŋgopieŋ.

¹⁰Erâ nore manapie mamakâcne eha dic banareŋgopieŋ, me ware honecnurâ tâfecnuniŋte acmeruŋ mi eŋgopieŋ.

¹¹Anutuzi bârokawecnuhuc tâpiri‐nane bawahawecte manabâc tâmiric râsi sanaŋ enareŋgopieŋ hâcne.

¹²Ŋicguru ʒororone keci jaŋe onʒoŋ jaha ro fâre enarehuc jâpecnuzo eŋgopieŋ, ehuc sipiricnuniŋte ʒawiehuc roroc eŋgopieŋ.

¹³Jaŋe wisezipore aka henarehuc imacnuzo eŋgopieŋ, ehame moczi moc mi hecke‐jarekac.

¹⁴Râsi jaŋe sac henʒaŋnerâ haeo fisieŋgopieŋ jaŋe irec sâc jaha fisi‐nareŋgopieŋ.

¹⁵Sisipiriczi maicnume bipic‐nane tarakac, ehame mâŋâŋzi rehac ficne sueme raekac irec sâc jaha ʒâŋe biŋe‐nane rârâŋnekac, erâ mâŋâŋzia karorac ficneme raekac irec sâc jaha jujuhâmo‐nane omaekac.

¹⁶“No ʒi hâmozo ekopac hâcne, ʒârâ hâriŋ‐nanezi moc mi afeckekac.

¹⁷Ŋafeo siec bibiric‐nane sasawa ʒâicnu‐fâreekac, ehame ʒâic serereŋ dameŋ‐nanezi moc mi behecnukac.

¹⁸Tâpiri sâko moczi sahac‐nane fiŋiŋiŋnume manape ŋaqi fâŋfâŋne rojukopac tinac ekac.

¹⁹Anutuzi tuŋnume sohoŋmaŋko hukopac, ehuc rufe â ʒafe iŋucne ekopac.

²⁰Erâ Anutu go wira wâwâsic egarepe micnaneo mi roekic, â numu‐garepe wâc mi mana‐nareekic.

²¹Go busâqoc moc mi mana‐narehuc râsi sanaŋ enareekic, ehuc tâpiri mesanaŋgezi nu jâpec enarehuc juekic.

²²Go mâŋâŋ sâko manacnehaŋ ficne suecnuekac, â mâŋâŋ ɋicwânʒâŋneheczi qâtuŋnuekac.

²³Jei, no manakopac, go hâmocte meo râecnuzo ekomec, hâmoc hae ŋic ʒeŋgoma nâŋere biŋe mukicne ira râecnukomec hâcne.

²⁴“Go wemocte sisipiriczi imacnuha baficnucmurâ wira wâwâsic egarehape qa bâʒâic enarekomec?

²⁵No ŋic ʒârâ hâriŋ faio jumbiŋ jaŋere erâ kio wâwâsic mi egare jupac me? Me qarâ suriŋne jaŋere busâqoc mi mana jupac me?

²⁶No jujuhâmo â tatamacte mamanac jupo, ehame ine ʒârâ hâriŋ â duŋdapâc izi fua‐narewec.

²⁷No ʒâic serereŋ manahuc bu ʒaʒamaŋ‐nane fâuckekac, ʒâic dameŋ‐nanezi sawa maicnurâ fokac.

²⁸Wiac moczi moc mi bâmiriŋnukacte busâqoc manahuc makuc bahuc jukopac, ehuc ŋic tutumaŋko faharerâ baficnuniŋte numu‐jareekopac.

²⁹Marac fânâŋ‐nane i kâte qâto jaŋe âgofâc‐jeŋic basac‐jopahuc qauu qaeŋgopieŋ, â qera jaŋe dâŋeeŋgopieŋ irec sâc ekac.

³⁰Sahac‐nane ʒocnehec efârehuc gâpârerâ iriweckekac.

³¹No mârâc jaha woŋgâŋ qahuc ʒeri bubiaŋ gae hejupac, â dameŋ ʒiŋuczia ine makuc bahuc busâqoc gae sawa heekopac.