1“No naru ʒeŋoŋ e me e hone sasec moc mi ecnepemurâ mupaŋkepo.
2No mumupaŋ i qâsuazapoo ine Anutu bapafâreraonec okacne weniŋucne fua‐narezac? Me eraonec furine biaŋne moc rozapo?
3E ŋic sindaŋne sipiric‐jopaekac â ŋic hehesicne imac‐jopaekac.
4Anutuzi wiac ebac eekopac sâc mana‐fâreekac, â hata raekopac sâc hone‐fâreekac wâc.
5“No wiac sindaŋne moc mi epo i musanaŋkekopac, erâ ŋic gâcne wâc moc mi eatuc‐jopapo.
6Me wiac iŋucne moc epoo ine Anutu e jahac ŋemâc bâbâfuare sâcko râecnuhuc fuŋne‐nane bataniŋkezejec, ehuc, bahac tâmiric jukopac i honezejec.
7No hata tiŋne râpeckerâ ʒâŋe‐nanezi wiac hehesicne honehuc maŋnanezi mana aŋac erâ menanezi wiac sâqocne moc bâuapoo
8ine gie wiac‐nane sipiricke‐fârezejec, â wiac he sarac ekopac i fua sokac eme ŋic gâcne jaŋe nânʒepieŋ.
9“No maŋnane ŋic mocte ŋokactao domaha ficticnere motâcko soŋkerâ ere woŋec moc jupoo
10ine no nahacne ŋonâŋ manacnepe ŋic mocte ʒegoc bahuc ehec fozejec.
11Erâ ine moc e wiac iŋucne bâfuaocmuzi sindaŋ hârindaŋ eocmu, eme irec okacne mumutara ŋic jaŋe hâmocko râeniŋmu.
12Wiac izi ʒoc ima‐ticnehec iŋucne erâ wiac sasawa fonarekac i ʒâseŋke‐fârezac.
13“Kiŋaŋ qaqafâc‐nane jaŋe nore manapie sâqoreme nazapie dâŋjeŋic mana jupac.
14No iŋuc mi ezapo muzac ine Anutuzi fua‐nareme wemocko ere maio domazapo, me dâŋnane mutiŋneocte fisime wemo dâŋ moc âzâcnezapo?
15No bâfuacnuwec Anutu ekizia kiŋaŋ qaqafâc‐nane wâc bâfuac‐jopawec.
16“No ŋic hapetac bafic‐jopapemurâ moc mi takicnu jujec, â hozec jaŋe batac qatac ehuc juhapie hone bafic ejare jupac.
17Me bekâ mâsiŋ jaŋe nânâre hâmo sipiric ehapie nânâ wiac mi sakare‐jare jupac.
18No ɋie‐jeŋickonecteaŋ mamac ejare jupac, â neŋgoc bumaŋkonec fuambiŋ dameŋ ira hâcne fuŋkerâ hone maiŋ ejare warehuc jupo.
19Me ŋic jaŋe ŋaqi qoruc tâmiric jumbiŋ â hapetac jaŋe bilaŋke basahuc juhapie
20honec‐joparâ no nahacne lamafâc jaŋere kanʒaŋzi ŋaqi qoruc bakicne i jarehuc jupo.
21No dâŋgieo râecnupie sanaŋkepemu iŋuc muhuc bekâ mâsiŋ jopa sipiric moc mi ejarepo.
22Me iŋuc ewiac moc epoo ine irec okacne menane qazunʒepieŋ, â ɋawe‐nane unuckenʒepieŋ.
23No Anuturaonec okacnere hâwicnume wiac iŋucne moc mi eekopac.
24“No maŋnane moneŋ mafao râepe mi fowec, me gol ɋaɋacnezi woworic‐nane wâc mi ewec.
25Menanezi gie bape mafa mâriri fua‐nareme mafa wiac i honehuc sifu maŋfefe mi epo.
26No ʒoaŋ e tatamac‐ticnere erâ dieŋzi mi hecnepo, â mosa e oŋa rarac‐ticnere erâ wâc mi dapecnepo.
27No maŋnane jaherao râepe soŋsoŋ foha mi qâsoriepo, erâ wâc menane sicne‐jactehuc araŋ moc mi bajactepo.
28Ŋic moc e iŋuc eocmuzi Anutu mickeocmu, irec no wiac iŋucne moc ezapo muzac mumutara ŋic jaŋe hâmocko râecnunʒapiŋ.
29“Kisâfâc‐nane jaŋe ʒârâ hâriŋ fua‐jareme moc mi ʒeri bari epo, me sisipiriczi imac‐jopame honec‐joparâ bubiaŋ wâc mi manapo.
30No mi sâwec‐jopapo, â hâmoczi rocjopaocte nunumu gie wâc mi bapo, irec no bahac tâmiric jukopac.
31Nore gie bahuc jueŋgopieŋ ŋic i jaŋe fuŋne‐nane ʒiŋuc mana taraeŋgopieŋ: E ŋic furune dameŋ sâc âgo ejarehuc juekac.
32No ŋic mâreŋ honeniŋte rac warec eeŋgopieŋ jaŋe hae ʒoŋao fonʒipiŋte ficnaneo hefârec‐jopaekopac.
33Ŋic gâcne jaŋe sâqocne‐jeŋic hesoŋkeeŋgopieŋ, no ine iŋuc moc mi eekopac.
34Ŋic jaŋe nore dâŋ moc weniŋuc muniŋmu muhuc hâwicnume kiŋ bahac‐nane moc mi hesoŋkeekopac. Â mu âke sisic‐jeŋicte rumerâ dâŋemâc juju me ficko soŋkerâ ŋeŋe i wâc mi eekopac.
35Jei, ŋic moczi dâŋnane moc manazac me! No ʒiŋuc musanaŋkekopac: Dâŋ mukopac i fârine sasawa, irec Anutu bapafâre eki dâŋ okacne bâtikie‐narezejec. Jei, kisâfâc‐nane jaŋe qoricnuhuc dâŋ muŋgopieŋ i papiao qâreŋkepie bajuzapo me!
36Ehuc upenaneo qonaŋkerâ juzapo, â ŋic jaŋe honeniŋte jowatuzapo.
37Erâ wiac ebac epo sâc i Anuture maio acmeruŋ tâmiric domahuc âzâcne‐fârezapo.
38“No mâreŋ he sarac ekopac i kâŋgâc ehuc mâreŋ irec rune moc mi jâoc ropo.
39Erâ nânâ monʒaŋ he sarac epie fârine fuawec gieŋic i jaŋe sakare‐jarehuc buc mi nâhuc jupo.
40No wiac iŋucne moc epoo ine padi jacgoŋ jahere âkehoc hofâ qinʒiŋ â opac wiac sawa fuarâ fozejec.” Hiobere dâŋ sasawa i ʒira hâcne tarakac.
