Hiobe 24

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Anutu e okac babazure ʒâfo wemocte mi râeekac, â kiŋaŋ qacneeŋgopieŋ jaŋere dâŋ mutiŋneocte wemocte dameŋ mi baekac?

²Ŋic sindaŋne jaŋe mâreŋ‐jeŋic bâsokaniŋte ma âke sueeŋgopieŋ, erâ lama fiuc rocjoparâ jaŋacne lamafâc jaŋehec bâturec‐jopaeŋgopieŋ.

³Jaŋe bekâ mâsiŋ jaŋere doŋgi kâŋgâc jowac roeŋgopieŋ, â hozec jaŋe sahac taha‐jeŋic râeniŋte moneŋ basahapie jaŋere bulimakao sakareeŋgopieŋ.

⁴Erâ ŋic qarâ suriŋne hatao bâfuac‐joparâ jâpec‐jopaeŋgopieŋ, â ŋic hapetac ejarepie wiserâ ra soŋkeeŋgopieŋ.

⁵Iŋuc ejarepie hapetac jaŋe jaŋacne â naru motecfâc‐jeŋic jaŋere nânâ bâfuaniŋte kâte doŋgi iŋucne mâreŋ burocnao babasa gie baeŋgopieŋ.

⁶Ŋic sindaŋne jaŋe hapetac ʒoɋac ejarepie gie‐jeŋicko nânâ qa roro eeŋgopieŋ, erâ waiŋ bâtirikicne i wâc ro nusec eeŋgopieŋ.

⁷Jaŋe ŋaqi qoruc‐jeŋic arictacte ŋafeo biuctac foeŋgopieŋ, â mâmâteŋ dameŋko bilaŋke rufaniŋte basaeŋgopieŋ.

⁸Tikio hoe sâko heekac izi hembânâŋ‐jopaekac, â fic basahuc ine qânâuŋko jâjâwâckehuc ŋeeŋgopieŋ.

⁹Ŋic sindaŋne jaŋe bekâ mâsiŋ kiŋaŋ qaqafâc‐jeŋic bacjopaeŋgopieŋ, â qarâ suriŋne jaŋere tofa taraocte naru motecfâc‐jeŋic rocjopaeŋgopieŋ.

¹⁰Ŋic hapetac jaŋe ŋaqi qoruc tâmiric biuctac jueŋgopieŋ, erâ bomboŋfâc‐jeŋic jaŋere nânâ qa roro eipiehuc sifu nânâre hâmoeŋgopieŋ.

¹¹Jaŋe oliwa hândâŋne bâpisickepie opâne wahaekac, â waiŋ hândâŋ‐jeŋic âte pisickehuc sifu opâre wâc hâmoeŋgopieŋ.

¹²Haeo hâmozo eeŋgopieŋ jaŋere ki owa fuaekac, â ʒâpâ jopakicne jaŋe babafic moc fua‐jareocte wira wâwâsic eeŋgopieŋ, ehame Anutuzi ine sifu mi mana‐jareekac.

¹³“Ŋic gâcne jaŋe tatamac râsi ecneeŋgopieŋ, ehuc Anuture eebapa hone mana tarac eniŋte takic‐jopaekac â hata‐ticne wâc mi bâjâpeeŋgopieŋ.

¹⁴Ʒikaŋic jaŋe ŋic hapetac â qarâ suriŋne jopaniŋte furic araraŋtea fahareeŋgopieŋ, â ŋafeo ine ŋic jaŋere wâcwiac fiuckeeŋgopieŋ.

¹⁵Boe sau ŋic jaŋe wâc iŋuc jaha hae ŋafeocte woŋec jueŋgopieŋ, ehuc ŋic moczi moc mi hone tarac‐nâpozejec muhuc ʒâŋe mai‐jeŋic sâockeeŋgopieŋ.

¹⁶Fiuc roro jaŋe ŋafeoa ficmotâc heropierâ wiac fiuc roeŋgopieŋ, ʒoaŋko ine tatamac dic bacnehuc soŋkeeŋgopieŋ.

¹⁷Jaŋe ʒoaŋ tatamacte hâwic‐jopaekac, dapâc qisiricte ine manapie âgo babafic‐jeŋic eekac.

¹⁸“Ŋic sindaŋne jaŋe eebapa‐jeŋiczi opâ rumi iŋucne erâ jowac‐jopame arictac eeŋgopieŋ, â mâreŋ ruckerâ jueŋgopieŋ i Anutuzi sâweckeekac, irec hesarac gie baniŋte mocwâc mi raeŋgopieŋ.

¹⁹Maniŋ titikuczi ʒoaŋ fârorocte kereŋkerâ omaeekac, irec sâc jaha sâqocne bapazi ŋic jujune jaŋere mâreŋkonec rârâŋneocmu.

²⁰Eme neŋgoc‐ticnezi mecne, me ŋic gâcne jaŋe mecne ere mocwâc mi manasuniŋmu, ehame umbeŋzi nanʒaŋneme arictac eocmu.

²¹“E hozec bâʒâic‐jopawecte â ŋokac hufiŋne hone bafic mi ejarewecte iŋuc hâcne fuacneocmu.

²²Anutu e mesanaŋ‐ticnezi ŋic tâpirihec jaŋe bawahac‐jopaekac, ehuc juju‐jeŋic jowac rome hâmoeŋgopieŋ.

²³Jaŋe Anutuzi wama faio juniŋte mana‐jarezo murâ mana‐jareocmu, erâ wâc hata‐jeŋicko rahapie dameŋ sâc hone jâjâpec‐jopaocmu.

²⁴Ŋic sindaŋne jaŋe iŋuc ejareme dameŋ bembeŋne mac gie‐jeŋic bapie fârinehec eocmu, izi ine ututuŋ jaha hofâ qinʒiŋ iŋucne ururuckeniŋmu. Jaŋe sopâc kecɋaŋ qâtâcnepene ɋaŋaekac irec sâc jaha ɋaŋaniŋmu.

²⁵Fuŋne iŋuc fokac i mozi mickeocmu? Me mozi dâŋnanere maname burec eha dâŋ moc sâcne muocmu?”