Hiobe 40

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Eme Wofuŋzi ʒuhuckerâ Hiobe dâŋ kecʒiŋuc âzâcnewec:

²“O Hiobe, go Anutu bapafâre nore manatec sâqorekac, go iŋuc ekomecte dâŋ gaza‐fârepac irec okacne bâtikie‐narec.”

³Iŋuc âzâcneme Hiobezi Wofuŋ dâŋ kecʒiŋuc bâtikiecnewec:

⁴“O Wofuŋ, no iŋucnezi dâŋ okacne moc weniŋuc bâtikie‐garepemu? No dâŋ iŋuc me iŋuc ʒuhuckerâ muzore mi enarekac.

⁵No mârâc dâŋ muhuc gâcne musifuckepo, irec ʒi dâŋ i me i mocwâc mi mupemu.”

⁶Iŋuc mume Wofuŋ e ʒâʒâkiriŋ mâŋâŋmaŋko juhuc Hiobe dâŋ kecʒiŋuc âzâcnewec:

⁷“Go ŋic jâmbâŋ jukomecko faharerâ bifuŋge jomac, ehame no dâŋ mu wioc egarepe okacne bâtikie‐narec.

⁸‘Wofuŋ e wiac ʒi maŋgâŋ enareme mi sâckekac,’ go nore iŋuc muhuc gahacnere manatec tiŋne hawari ekac me?

⁹No tâpiri fonarekac irec sâc jaha gorao moc fokac? Me nore marac fânâŋ i ɋuŋ parandaŋ iŋuc fokac irec sâc jaha go moc fogarekac me?

¹⁰“Go tâpiri iŋucne moc fogarekacko ine faharerâ tatamac â ʒâŋe biŋe qonaŋketec izi erige ezejec, ehuc ʒai ʒonʒoŋ â huriri qâreŋge bâfuatec izi ŋaqige ezejec.

¹¹Go kimbeŋgere ʒoc ruqetec bâruŋkezejec, ehame maŋfefehec jueŋgopieŋ jaŋe bâfuac‐jopahuc bawahac‐jopazemec.

¹²Jâmbomac, jaŋe siŋjeŋic qatarahuc bawahac‐jopa‐jâmbâŋkezemec, â ŋic sindaŋne jaŋe ine juju‐jeŋickoa henʒaŋ qanʒaŋ‐jopazemec.

¹³Ehuc mâreŋmaŋko ducjopa‐fârezemec, â hâmoc haeo kâpâcwâru bacjopazemec.

¹⁴Go iŋuc moc sâcne efârecmuo ine noni mumbiaŋgupemu, ehuc wiac i go gahacne tâpirio ekomec i mutaniŋkepemu.

¹⁵“Go qowi sâko mako moc ʒâŋene Behemoto e honec; no go bâfuacgupo iŋuc jaha e bâfuapo, e bulimakao iŋucne sopâc kecɋaŋ nâekac.

¹⁶Erâ sifu sasanaŋ‐ticne i fekicne jâmbâŋ, â sahac‐ticnere rua sasawa i sanaŋ qaŋqaŋne.

¹⁷Gecticnezi ine qândâoŋnerâ jâmâzâc jâc iŋucne fe domakac â kike‐ticnere rua i râŋgeŋ qaŋqaŋne.

¹⁸Siec wiac‐ticne sasawa i aeŋ bâbâroŋ sanaŋne iŋucne, â me kike‐ticne ine aeŋ sanaŋne irec sâc.

¹⁹“Qowi wiac bâfuac‐jopa‐fârepo jaŋeraonec e hâcne hone wawarecnehec bâfuapo, tâpiri‐ticne i bâbâfua‐ticne noni sawa bawahapemu.

²⁰Qowi mimicne gâcne jaŋe tikio mamasiri eeŋgopieŋ e tiki irecnec hâcne nânâ bâfuaekac.

²¹E gugucjâcte fuŋnao fomanaekac, ehuc ʒamac ʒamac maŋko soŋkerâ foekac.

²²Gugucjâczi mumuc qacneekac, â kakikic jâcte tieŋ taeŋnezi ficboze ecneekac.

²³Opâ rumi sâko fisime mi hâwickeekac, â opâzi ʒâŋe mainao âeckeme mâc baŋaŋkerâ foekac.

²⁴Moczi moc hawiczi hehawickerâ roocmu? Me mozi sâkenao finʒuŋ râerâ fâre wefuocmu?