Hiobe 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Eme Zofari e iŋuc mume Hiobezi dâŋ okacne kecʒiŋuc bâtikie‐jarewec:

²“Ŋoŋe hazec râehapie dâŋ ŋazape mananiŋ; ŋoŋe iŋuc eniŋmuo ine manape bâmiriŋnuŋgopieŋ eocmu.

³Irec ŋoŋe mana‐narehapie dâŋ ŋazape, eme mupe tarame ine ʒuhuckerâ mu ruruc enarezo murâ enareniŋ.

⁴No ŋic jaŋehec mu qaqatarac mi ekopac, erâ ʒi maŋnane omaekac i fuŋnehec.

⁵Ŋoŋe moc honecnuniŋ me! Erâ bipic‐ŋeŋic tarame fâsâerâ ŋeniŋ!

⁶No wiac fua‐narewec irec manasurâ sahac‐nane gâgâmârâha ɋarac ɋarac qakopac.

⁷Anutuzi wemocte ŋic sindaŋne jaŋe mana‐jareme tâpirihec erâ mafa sâkohec juku ŋicqizec eeŋgopieŋ?

⁸Ehame naru motec ŋosafâc‐jeŋic jaŋe wâc ʒâŋe fai‐jeŋicko biaŋne soka sanaŋ eeŋgopieŋ.

⁹Anutuzi ŋic sindaŋne jaŋe mi bâtiŋ‐jopaekac, â wiacfâc‐jeŋic jaŋe wâc wama faio juhapie wiac hâhâwicne moczi moc mi sipiric‐jopaekac.

¹⁰Bulimakaofâc‐jeŋic jaŋe hufiŋne mi juhuc biaŋne fua sawec eeŋgopieŋ.

¹¹Naru motecfâc‐jeŋic jaŋe lama motecne iŋucne mamasiri ehuc kiwac qawac eeŋgopieŋ.

¹²Erâ gae woŋgâŋ ehuc kulele fâzeeŋgopieŋ, â mimi ŋokaczi dâŋeme manarâ ʒeri bari eeŋgopieŋ.

¹³Jaŋe juju‐jeŋic wama faio jutaraeŋgopieŋ, ehuc ʒâic wiac moc mi manahuc hâmoeŋgopieŋ.

¹⁴Ŋic sindaŋne jaŋe Anutu ʒiŋuc âzâcneeŋgopieŋ: ‘Go behec‐nâpoc, nâŋe gore eebapa hone mana tarac enaŋte takic‐nâpoekac.

¹⁵Bapafâre go mo, irec nâŋe go kiŋaŋ qagarenaŋmu, me go numu‐garepene fârine wemo wiac moc bâfua‐nârecmu?’

¹⁶Jaŋe ʒiŋuc hâcne mueŋgopieŋ: ‘Wiac fârine i nâŋe nâŋâcne tâpirio bâfuaeŋgopeneŋ.’ Irec no jaŋere dâŋzi âgo moc mi enareekac.

¹⁷“Ŋic sindaŋne jaŋere lambe moc ficne hâpokicne me? Me wiac hâhâwicnezi moc fua‐jareekac me? Me Anutuzi aaricko qa bâtiŋ moc ejareekac me?

¹⁸Me mâŋâŋzi padi jawa bawiseekac irec sâc moc ejareme wiseeŋgopieŋ?

¹⁹Ŋoŋe ʒiŋuc muŋgopieŋ: ‘Anutu e naru motec jaŋe mamacfâc‐jeŋic jaŋere sâqocnere erâ qa bâtiŋ ejareekac.’

²⁰Iŋuc mâcne, Anutu e sâqocne bapa jaŋe jaŋacne bâtiŋ‐jopazejec, ehame sâqocne‐jeŋicte iŋuc ejareekac i mana taranʒepieŋ.

²¹Ŋic moc e juju dameŋ‐ticne tarazo ehame naru motecfâc‐ticne jaŋe faicnao juhâmoniŋmu me mâcne irec mana mezac moc eocmu me?

²²Ŋic moczi Anutu mamana moc sâcne qazucneocmu? Me Anutu bapafâre ere dâŋ moc sâcne mutiŋneocmu?

²³Ŋic gâcne jaŋe huc ʒâic â mana mezac tâmiric wama faio juku hâmoeŋgopieŋ.

²⁴Jaŋe biuc wokemaŋ sâkohec, â siec ɋârâc‐jeŋic fufusuc jaha foha hâmoeŋgopieŋ hâcne.

²⁵Â ŋic gâcne jaŋe ine jujuhâmo moc mi fua‐jareha ʒaic fâro faio juku hâmoeŋgopieŋ.

²⁶Erâ ŋic i me i jaŋe mâmâc hâmopie ducjopaeŋgopieŋ, ehame umbeŋzi fai‐jeŋicko gerec gerec baekac.

²⁷“Manaŋgopieŋ, no maŋŋeŋicko dâŋ fokac i manakopac, â wiac hehesicne enareniŋte dâŋ birickeŋgopieŋ i kâuc mi bakopac.

²⁸Ŋoŋe ʒiŋuc muhuc wioŋgopieŋ: ‘Ŋic fekicne ere fic wena? Â ŋic hehesicnezi ŋec juc eekac ere boze wena?’

²⁹Hae mâreŋ honeniŋte rac warec ehuc jueŋgopieŋ ŋic i jaŋehec dâŋ muc manac moc embiŋ me? Ehuc dâŋ bajueŋgopieŋ i moc manambiŋ me?

³⁰Manarâ muzac ʒiŋuc mananʒapiŋ: Anutuzi aaric faio bâbâtiŋ gie baekac dameŋ ira ŋic sindaŋne jaŋe ŋezic‐jopaekac.

³¹Ŋic sindaŋne jaŋe mozi mai qanʒaŋ jaha fuŋne‐jeŋic mutaniŋkeocmu, me wiac hehesicne ebac eeŋgopieŋ irec okacne bazu‐jareocmu?

³²Ŋic sindaŋnezi hâmome ʒâŋeruŋko reŋke raeŋgopieŋ, ehuc ʒâŋeruŋ‐ticne hone soŋaŋ eeŋgopieŋ.

³³Erâ ŋic guru sâko jaŋe qâŋɋâŋ‐ticne rame bâjâperâ raeŋgopieŋ, ehuc nombâŋko hume aimuŋ jaha hemackeeŋgopieŋ.

³⁴Ehame ŋoŋe ine weniŋuc enareŋgopieŋ? Ŋoŋe mumusifuc â dâŋ racne izi bâmiriŋnuzo eŋgopieŋ, ŋoŋe dâŋ bâtikie‐nareŋgopieŋ i burec dâŋ sasawa.”