Hiobe 23

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Elifaʒi e iŋuc mume Hiobezi dâŋ okacne kecʒiŋuc bâtikie‐jarewec:

²“No sifu ʒiŋuczia wâc Anuture manape mi sâckekac, no kio wâwâsic ehape meticnezi bâmâcnukac jaha.

³Jai, no wena rarâ e bâfuapemu i moczi moc nazame manazapo me! Me e wena jukac i moczi moc nazame manarâ ra erao fisizapo!

⁴Erâ dâŋ bajukopac i âzâcnezapo, ehuc wiac ebac epe sâckeekac irec fuŋne wâc mujâmbâŋkezapo.

⁵Eme eki dâŋ okacne weniŋuc bâtikie‐narezac i wâc manazapo.

⁶E râsi sâko enarehuc tâpiri‐ticnere fuŋne norao moc bataniŋkezac me? Aricne, e dâŋ âzâcnehape hazec râerâ dâŋnane manazac.

⁷No siocmâc jukopacte Anutuhec dâŋgie sâcne bazapo, eme eki dâŋnane mutarahuc kiŋnane behe sanaŋkezac.

⁸“Manaŋgopieŋ, no ʒoaŋ wewefunao rahuc Anutu basa‐bipieekopac, â ʒoaŋ huhunao rahuc babasa gie bape arictac jaha wâc eekac.

⁹Anutu e faic mâreŋko gie bahuc juha moc mi honeekopac, me juwic mâreŋko ra juhame ere ʒâŋe fipe rame arictac eekac wâc.

¹⁰Eki ine hata raekopac sâc i mana‐fâreekac, irec e moc esâicnuocmuo ine ʒiŋuc honeocmu: Ŋic e maŋɋaɋac juekac.

¹¹No ere kike hata bâjâperâ raekopac, ehuc qanaopec me fâreopec rahuc hata‐ticne moc mi beheekopac.

¹²No mumutâc dâŋticne mana rereŋ eekopac, ehuc no nahacne maŋte dâŋ mâcne, ere micdâŋ bâjâpeekopac hâcne.

¹³Anutu e ŋiczi iŋuc me iŋuc ecnepene hec hetikic moc mi eocmu, e wiac i me i ezo murâ ejâmbâŋkeocmu.

¹⁴E nore dâŋ iŋuc me iŋuc maŋkerâ bajukac i fârinehec eocte giene baocmu, erâ nore dâŋ sawa mâcne, e dâŋ wiac iŋucne gâcne wâc maŋkerâ jukac jaha.

¹⁵No irec hâcne hâwicnume ere maio ɋarac ɋarac qaekopac, erâ irec manasuhuc maŋnane gâckeekac.

¹⁶Anutuzi bawahacnume hâbi‐nane goroŋkeekac, e bapafârezi hâhâwic henareme ʒâic busâqoc faio juekopac.

¹⁷Dapâczi foŋnume wiac moc mi honeekopac i jâmbomac, erâ i dapâczi mâcne, Anutuzi bâʒâicnume maŋnane omaeekac.