Hiobe 33

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“O Hiobe, go ʒi dâŋnanere hazec râec, ehuc dâŋ sasawa mukopac i mana‐fârec.

²Manakic, no okacne bâtikie‐garezo micnane aŋkekopac, ehuc maŋnaneo dâŋ fokac i muzo ekopac.

³Dâŋnane sioc tâmiric sasawa, â dâŋ mupemu i wâc fârine jaha.

⁴Anuture Mârozi bâfuacnuwec, â bapafârere nokafezi juju bâfua‐narewec.

⁵Go dâŋ okacne bâtikie‐narezo murâ bâtikie‐narezemec. Go dâŋge biaŋne manasu biric erâ nore maio domazemec.

⁶Manakic, nâhâc Anuture maio sâc mocjaha ekoperec, eki hâcne nâhâc mâmâc jaha afezi bâfuac‐nâfowec.

⁷Irec go nore mi hâwicguzejec, no ʒoɋac sâko egarehuc mi bawahacgupemu.

⁸“Go nore maio dâŋ mutec manapac, ehuc micfânâŋgere hazec râepac.

⁹Go kecʒiŋuc hâcne mukomec: ‘No kiŋ tâmiric jukopac, no wiac hehesicne moc mi epo, â bahac moc mi bâfuapore maŋɋaɋac jukopac hâcne.

¹⁰Anutuzi ine maŋgâŋ râsi enarehuc qa bâtiŋ enarekac.

¹¹E kike‐nane jâc fifitacko râehuc eebapa‐nane i me i honeocte ruc banareekac.’

¹²“Manakic, no ʒiŋuc gazakopac: Go dâŋ mukomec i mi sâckekac; Anutu e ŋic mamana siricke‐fâreekac.

¹³Ehame go wemocte ere manatec sâqoreha ʒiŋuc mukomec: ‘E dâŋnane i me i irec okacne moc mi bâtikie‐nareekac’?

¹⁴Anutu e dâŋ mumure hata‐ticne fuŋne fuŋne fokac i ŋiczi hone takireeŋgopeneŋ.

¹⁵Ŋic nâŋâc ŋafeo guŋ fohapene Anutuzi guŋqâhâŋ enârehuc dâŋ nâzâekac.

¹⁶Iŋuc enârehuc hazec‐nâŋec bâuŋtoekac, ehuc uŋ sawaŋ enâreme hâwic‐nâpoekac.

¹⁷Nâŋâc maŋfefe mi ehuc sâqocne râpeckenaŋte Anutuzi iŋuc hâcne enâreekac.

¹⁸Nâŋâc ʒikare micko fenʒipeŋte ŋezic‐nâpoekac, â nombâŋ mecnaonec wâc rocnâpoekac.

¹⁹“Anutu e ŋic bâtiŋ‐nâpohuc mume huc fua‐nâreekac, â siec bibiric‐nâŋec ʒâicke‐fâreekac.

²⁰Ŋic hucheczi nânâre boc mi ecneekac, ehuc nânâ aŋacnere wâc maname mamakâcne eekac.

²¹E sahac‐ticne waha‐fâreme siec sawa eekac.

²²Ehuc hâmoc haere biŋe eekac hâcne.

²³Ehame Anuture aŋelofâc guru dindiŋ jaŋe ŋic nâŋâc tiŋne jujure fuŋne nâzâ nâwotuc eeŋgopieŋ jaŋeraonec moczi ŋic e bafickeocte fuaocmuo

²⁴ine ere busâqoc manahuc Anutu ʒiŋuc âzâcneocmu: ‘No kiwiric‐ticne rokopacte bataratec hâmoc haeo mi huzejec.’

²⁵Eme eki manacneme ŋic e ɋiɋic qarâ mârâc tâpirihec juwec irec sâc jaha mocwâc bâfuarâ juocmu.

²⁶Ehuc Anutu numucneme micnao roocmu, erâ bubiaŋ manacnehuc araŋ bacneocmu, ehame Anutuzi manacneme kiŋfâsâc eocmu.

²⁷Ŋic e iŋuc fuacneme hofao fuŋne‐ticne ʒiŋuc mutaniŋkeocmu: ‘No sâqocne bâfuapo, ehuc wiac ebac epe sâqorewec, ehame Anutuzi ine sifu akicnuwec.

²⁸E iŋuc ehuc hâmockonec bataracnuwecte juju mocwâc fua‐nareme tatamacko jukopac.’

²⁹“Manakic, Anutu e wiac iŋucne ŋic nâŋâcnao arecne arecne baekac.

³⁰Erâ i ŋic juju‐nâŋec ŋezickehuc bârisie‐nâreme bubiaŋ faio ʒuhuckerâ junaŋte iŋuc eekac.

³¹O Hiobe, go dâŋnanere hazec râec, ehuc niniŋkerâ ŋehaŋte dâŋ mupe.

³²Me dâŋ okacne bâtikie‐narezo murâ bâtikie‐naretec manazepac; go wiac ebac etec sâckewec; i jâmbâŋ mutaniŋkepemurâ enarekac hâcne.

³³Me dâŋ okacne arictac ekacko ine mâc niniŋkerâ dâŋnanere hazec râehaŋtec weniŋuc erâ maŋɋârâŋhec ezo irec fuŋne qazu‐garepe.”