1Hiobe e iŋuc mume Temaŋŋic Elifaʒizi dâŋ kecʒiŋuc bâtikiecnewec:
2“No dâŋ tâmiric ʒuhuckerâ sâcne mi ŋepemu, irec ʒi dâŋ mupe manatec mi sâqoreoc.
3Manakic, go ŋic bocjaha dâŋ jaza qazuc ehuc jumeŋ, ehuc docke betaŋ ekicne jaŋe basanaŋ‐jopameŋ.
4Go ŋic fâfâc‐jopaha dopec‐jopahuc jumeŋ, â ɋarac ɋarac qahapie mu keteŋ ejaremeŋ.
5Ʒi ine ʒâic busâqoc wiaczi go gahacne maicguha, bipic tatara egareme maŋge omaezo ekac.
6Go Anutu araŋ bacneekic izi mi bâmiriŋguekac? Me tiŋne jujugezi mamanac juju mi bâfua‐gareekac me?
7“Go mana honec: Ŋic bahacmâc moczi moc sipirickewec? Me ŋic tiŋne moczi moc hâmo sipiric ewec me?
8No ʒiŋuc manaekopac: Ŋic moczi sâqocnere gie baocmu e irec fârine juku ijaha roocmu.
9Ŋic sâqocne jaŋe Anuture micrombâŋzi sipiric‐jopaocmu, â kimbeŋ‐ticnere ʒocbâruŋzi ʒâseŋ‐jopaocmu.
10Ŋic sindaŋne jaŋe laioŋ iŋucne owackeeŋgopieŋ, Anutuzi ine bâniniŋ‐jopahuc micsiec‐jeŋic qazuekac.
11Laioŋ jaŋe qowi tâmiric juhuc hâmo sipiric eeŋgopieŋ irec sâc ijaha ehapie naru motecfâc‐jeŋic siŋsaŋ qaeŋgopieŋ.
12“Dameŋ mocko biŋedâŋ moc kamierâ hazec‐naneo hume dâŋ saŋucne sawa manapo.
13I ŋafeo guŋko wiac hone manac eeŋgopeneŋ iŋuc tinac fuame honerâ guŋ ɋâri jupo.
14Ehuc fâfârerâ ɋarac ɋarac qapo, â me kike‐nane jâjâwâckewec.
15Ehame sawa sâqocnezi nowarume sahac‐nanezi araraŋ kiwec.
16Eme no wiac moc ŋic hawari tinac domaha honepo, erâ hone dendeŋnehuc sifu mi hone tarapo. Ehame fic hae tiŋbenoŋ fuarâ foha dâŋ moc kecʒiŋuc fuame manapo:
17‘Ŋic moczi moc Anuture maio tiŋke biaŋ erâ sâcne juocmu? Me ŋic moczi moc bâbâfua‐ticnere maŋfuŋko maŋɋaɋac erâ sâcne domaocmu me?
18Anutu e sambâŋko kiŋaŋ qaqafâc‐ticne jueŋgopieŋ jaŋe mi manasiŋ‐jopaekac, erâ wâc aŋelofâc‐ticne jaŋere maname wawahane eekac.
19E iŋuc eekaczi wemocko mâreŋŋic me mâreŋkonec wiac gâcne kikezi ââtenʒaŋkene i moc manasiŋ‐jopaocmu.
20Ŋic moc e furicte sâcne juocmu mecne erâ ine hae mi ŋafeha ututuŋ jaha hâmoocmu.
21Ehame wiac focnekac sasawa i rofâreniŋmu; eme ŋic e fuŋne weniŋucte hâmokopac i kâuc bahuc hâmoocmu hâcne.’
