Hiobe 27

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Hiobezi iŋuc jazahuc ʒuhuckerâ dâŋ ʒiŋuc muwec:

²“Anutu jujune e bapafârezi dâŋnane mi mutiŋnehuc busâqoc bâfua‐narekac erao ɋetickehuc dâŋ ʒiŋuc mupaŋkekopac:

³No nokafe hehuc jufepemu sâc â Anuture Mâro jujunezi juju bâfua‐nareocmu sâc

⁴micnaneonec dâŋ hehesicne moc mi wahazejec, â nameŋ‐nanezi burecdâŋ moc mi muzejec.

⁵No bahacmâc jukopac, iŋuc manapaŋkehuc jufekuhape hâmoc dameŋ‐nane maickeme ʒiŋuc moc mi ŋazapemu: Ŋoŋe nore dâŋ muŋgopieŋ i fârine sasawa.

⁶Maŋnanezi mumu hehec mi enarekac, irec no bahacmâc jukopac, dâŋ i moc mi behe‐jâmbâŋkepemu.

⁷“No râsi enarehuc dâŋnane qaeŋgopieŋ jaŋe, ŋic sindaŋne â kiŋhec okacne fua‐jareekac sâc ijaha fua‐jarezejec.

⁸Anutuzi ŋic hehesicne juju‐jeŋic jowac roha wemo wiaczi woworic‐jeŋic eocmu?

⁹Wiac hâhâwicnezi maic‐jopahame Anutu wira wâwâsic ecnepie sâcne moc mana‐jareocmu me?

¹⁰Aricne, jaŋe dameŋ sâc Anutu bapafâre e numucnehuc ere aŋac manapie muzac sâckezac.

¹¹Ŋoŋe mana‐narehapie Anutu tâpiri ɋuŋɋasaŋ‐ticnere fuŋne ŋaza qazuc epemu, ehuc Anutu bapafâre e dâŋ weniŋucne mana biric ewec i wâc mutâcne‐ŋarepemu.

¹²Opoŋ, ŋoŋe ŋaŋac wiac i hone manac efârembiŋzi wemocte dâŋ racne keci boc muŋgopieŋ?

¹³“Ŋic sindaŋne â ʒâʒâicne jaŋe Anutu bapafâre eraonec okacne bâbâtiŋ kecʒiŋuc fua‐jareocmu:

¹⁴Jaŋe ŋokâfâc‐jeŋic bocjaha fuarâ juniŋmu mecne, erâ sifu ʒikao rarâ hâmo‐fâreniŋmu, â naru motecfâc‐jeŋic gâcne jaŋe nânâre hâmo sipiric eniŋmu.

¹⁵Ŋokâfâc‐jeŋic ʒanʒaŋne mac jaŋe ine huc mimicnezi rocjopame omaepie hozecfâc‐jeŋic jaŋe ki mamakuc mi ejareniŋmu.

¹⁶Ŋic sindaŋne jaŋe moneŋ wiac rufere sâc fojareha ŋaqi qoruc wiac‐jeŋic ŋic gâcne jaŋere sâc sirickehuc bajuniŋmu mecne.

¹⁷Iŋuc fojarehame ŋic tiŋne jaŋe jowac rorâ bajuniŋmu, â ŋic sioc tâmiric jaŋe moneŋ‐jeŋic bâtâc baniŋmu.

¹⁸Ŋic sindaŋne jaŋe fic baeŋgopieŋ i ŋeŋe sanaŋ aricne, i bameŋte qâruru irec sâc, erâ kiŋaŋ qaqazi gie soŋaŋkeekac ere boze wamba iŋucne.

¹⁹Jaŋe moneŋ mafa ɋâfoŋne fojareha jufeku ŋafe mocko waha guŋ foniŋmu, izi hae fureme faharerâ basaniŋmu.

²⁰Wiac hâhâwicnezi rumi sâko iŋucne fisi‐jareocmu, ehame mâŋâŋ ɋicwânʒâŋneheczi ficne suec‐jopame wise tâmireniŋmu.

²¹Â jowareczi wâc iŋuc jaha ficne suec‐jopame fic hae‐jeŋic beherâ ratâmireniŋmu.

²²Eme wise‐bipiehapie mâŋâŋzi moc mi akic‐jopahuc imac‐jopaocmu.

²³Ŋic sindaŋne jaŋe iŋuc fua‐jareme ŋic tucne jaŋe, sowine wiac iŋuc fua‐jarekac muhuc nifepupu ejareniŋmu.