Hiobe 11

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Hiobe e iŋuc mume Namati ŋic Zofarizi dâŋ okacne kecʒiŋuc muhuc bâtikiecnewec:

²“Go mumusifuc dâŋ bocjaha mukomec irec okacne mi bâtikie‐garehuc wemocko mâc râepene foocmu. Me ŋic moczi dâŋ racne bocjaha murakume dâŋticne fârine moc eocmu me?

³Go dâŋ kosa wosekomec izi sâcne bâniniŋ‐nâpoocmu me? Me mu âke sisic boc etecne sâcne mi qatara‐garenaŋmu me?

⁴Go kecʒiŋuc hâcne mukomec: ‘No dâŋ mukopac i fârine sasawa, erâ Anuture maio bahac fâsâc domakopac wâc.’

⁵Ojai, Anutu e jahac dâŋ okacne bâtikie‐garezac me! Ehuc e jahacne miczi dâŋ gazame sâckezac.

⁶Wiac bocjaha ŋiczi mi mamana tarane fokacte eki maŋɋârâŋ ʒâkâŋnehec irec fuŋne gazazac me! Eme go fuŋnege ʒiŋuc mana taranʒaŋ: Anutu e kiŋge fokac irec sâcko mâcne, baafeckehuc bâtiŋguekac hâcne.

⁷“Anuture tâpiri â biŋe rara‐ticne i qeŋ bipinehec, Go irec fuŋne sâcne hone mana tarac ecmu me?

⁸Karoraczi Anutu aka sâcne mi hecneocmu, goki ine ira fezore quŋke sâqoreocmu. Anutu e hâmoc haere fuŋne manaekac, goki ine kâuc baekic.

⁹Anuture biŋe rara biaŋ i mâreŋ qaŋeŋne sâcke‐fârerâ raekac, â hâwec sâko sirickeekac wâc.

¹⁰Anutuzi fisirâ dâŋgieo râecguha mozi aka moc hecneocmu?

¹¹Anutu e ŋic sindaŋne jaŋere fuŋne manaekac, ehuc eebapa‐jeŋic sâqocne honeekac wâc.

¹²Kâte doŋgi ŋokacne moczi motecne rome ŋic hawari roocmu dameŋ ira ŋic mutucne jaŋe wâc mamanahec eniŋmu.

¹³“O Hiobe, go maŋge bârisiec, erâ mege Anuturao sicnehuc numuzemec.

¹⁴Go wiac sâqocne megao fokacko behetec raoc, eme wiac sindaŋnezi ficgao mi fozejec.

¹⁵Go iŋuc erâ mimi tâmiric qac firic jaha sâcne jucmu, ehuc hâhâwic tâmiric juhuc wama faio sanaŋkerâ juzemec.

¹⁶Rumizi fâre wahaekac irec sâc jaha ʒârâ ʒâpâ fâre wahaocmu, ehame ʒârâ ʒâpâ faio jumeŋ irec nikecguocmu.

¹⁷Iŋuc fuame gorao dapâczi herisieme tatamac eocmu, ehuc jujugezi ʒoaŋ tatamac irec sâc jâuruocmu.

¹⁸Eme go wama faio juhuc Anuturao rowecketec eki ŋezicgume juhâc qâhâmocmu.

¹⁹Ehuc râsi jaŋere hâhâwic mocwâc mi bajucmu, ehame ŋic ŋokac bocjaha jaŋe bafic‐jopacmurâ numu‐gareniŋmu.

²⁰Ŋic sindaŋne jaŋe ine wiseniŋte hata basarâ fifisacne fihuc maŋjeŋic gâckeocmu, jaŋe hâmoczi rocjopaocte irec mamana sawa juniŋmu hâcne.”