Job 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Muli mai, gei Job ga daamada ga hagahuaidu di laangi dela ne haanau ieia, ga helekai,

²“Meenei God, hagahalaua ina di laangi dela ne haanau iei au. Hagahalaua ina di boo dela ne hagadili au!

⁴Meenei God, heia di laangi deelaa la gi bouli dongoeho. Goe haga de langahia ina di laangi deelaa. Hudee heia di maalama gii ina di laangi deelaa.

⁵Heia di laangi deelaa gii hai di laangi haga manawa gee ge bouli dongoeho. Nia gololangi gi duulia di maalama o di laa.

⁶Kaabee di boo deelaa gi daha mo di ngadau. Haga de langahia ina, hudee daulia dalia nia laangi.

⁷Gi heia di boo deelaa gi ono huwa ai, gei deai dono tene no lodo ai.

⁸Hai gi digau hai mogobuna gi hagahalaua ina di laangi deelaa, aalaa go digau ala e iloo di benebene di manu dragon go ‘Leviathan’.

⁹Abaaba ina di heduu luada gi de maahina. Hudee wanga ina di hagadagadagagee o di luada gi di boo deelaa.

¹⁰Hagahalaua ina di boo deelaa, dela go di boo ne haanau iei au no lodo, idimaa, ma gu haga uda mai gi di au nia haingadaa mo di manawa gee.

¹¹“Au bolo gii made hua i lodo tinae o dogu dinana be gii made hua i dogu madagoaa ne haanau.

¹²Dogu dinana ne daahi au i hongo ono wae eiaha? Mee ne aha dela ne haangai au gi ono weuu?

¹³Maa nei bolo au ne made i di madagoaa deelaa, gei au gu molooloo dolomeenei,

¹⁴e kii be nia king mo nia dagi ala ne hau nia hale nia king ala gu mooho dolomeenei,

¹⁵be e kii be nia dama daane di king ala ne haa nadau hale gi nia goolo mono silber,

¹⁶be e kii be di tama dela ne haanau dono mouli ai.

¹⁷I lodo nia daalunga, digau huaidu gu hagalee hai nadau huaidu, gei nia daane nogo ngalua duadua gu hagamolooloo hua.

¹⁸Digau galabudi guu noho labelaa i di aumaalia, gu hagalee longono labelaa nia wwolowwolo mo nia hagahooho o digau hagaloohi.

¹⁹Digau huogodoo la i golo, go digau ala e iloo nia daangada mo digau ala e de iloo nia daangada. Nia hege la gu maahede gi daha mo nadau dagi.

²⁰“Ma e aha dela nia daangada e hai gi mouli i lodo di mouli huaidu? Ma e aha dela e wanga di maalama gi digau ala e manawa gee?

²¹Digaula e tali hua nadau mmade, gei di made hagalee tale ang gi digaula. Digaula e hiihai gi taalunga i nia maluagina ala i golo.

²²Digaula hagalee tenetene gaa dae loo gi di nadau mmade gaa danu.

²³God e dugu hagammuni nadau mouli maalia, ge abaaba digaula i nia baahi huogodoo.

²⁴I di madagoaa miami, gei au e manawa gee. Au e deemee di ngala i dogu lodo huaidu.

²⁵Nia mee huogodoo ala e mmaadagu iei au ge hagamadagudagu e kila aga i dogu baahi.

²⁶Au hagalee noho i di aumaalia, hagalee molooloo, ogu haingadaa hagalee e odi.”