Hiobe 41

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Go oâ sâko ʒâŋene Lewiataŋ e hawicko sâcne rocmu? Me nameŋ‐ticne bofackehuc mecqaŋeŋnehec muczi sâcne basanaŋkecmu?

²Me go masune sâcne qâqâ hafecmu, me hawiczi mecqaŋeŋ‐ticnao sâcne hetec huocmu?

³E behetec ra juocte numu‐gareocmu me? Me go ere busâqoc manacmurâ kio wâwâsic moc egareocmu?

⁴Me gohec ʒâʒâfic ehuc dameŋ tâmiric kiŋaŋ qagarehuc juocte mupaŋkeocmu?

⁵Me kiŋaŋ narufâcge jaŋehec mamasiri eniŋte wipe mâteŋne iŋucne sâcne bajucmu?

⁶Me opâ qowi roro ŋic jaŋe furi‐ticne bafec bawahac ehuc dâŋgie moc baniŋmu? Me âbârâ ŋic jaŋe nareŋ gareŋ gie baniŋte sâcne hezuniŋmu?

⁷Go sahac‐ticne sasawa saozi sâcne âke mârâŋke‐fârecmu? Me tepe motec sâkozi qizec‐ticne sâcne muru fâuckecmu?

⁸Manakic, go ehec arec wâŋ sawa juju gie bacmu, erâ irec faicnao mocwâc bazore mi egareocmu; ehuc ehec juju gie bacmu irec moc mi nikecguocmu.

⁹Ŋic moc e Lewiataŋ honeocmuzi hâbi‐ticne goroŋkeme mâreŋko waha qaocmu.

¹⁰Lewiataŋ suruckepene momori jâmbâŋ eocmu, ehame ŋic moczi ere maio sâcne mi domaocmu.

¹¹Mozi ehec juju gie bahuc sâcne juocmu? Ŋic moczi iŋuc sâcne moc mi ejâmbâŋkeocmu, i aric kereŋne jâmbâŋ.

¹²“Irec go hazec râehaŋ Lewiataŋ kike‐ticnere gazape manac, ehuc sosoka â tâpiri ɋicwânʒâŋ‐ticnere fuŋne wâc gaza mutâc epe.

¹³Sahac‐ticne i ŋic moczi sâcne mi âkehockeocmu, erâ sahac‐ticne râŋgeŋ qaŋqaŋnere ŋic moczi wâc sâcne mi âke mârâŋkeocmu.

¹⁴Micsiec‐ticne gereŋ gereŋ qakicne i birihec domaha moczi moc micticne sâcne bâiŋdaŋkeocmu me?

¹⁵E râpe siecnao garac‐ticne sanaŋ qaŋqaŋne birio râe‐fârekicne, erâ i qânâ takirekicne iŋucnezi keketeŋ jâmbâŋ forakac.

¹⁶I keketeŋ â iitic jâmbâŋ fokacte ŋondeŋnao ira sawazi raʒic wefuc sâcne mi eekac.

¹⁷Jaŋe ʒiʒimic keketeŋ erâ foŋgopieŋte moczi moc sâcne mi bârâwiŋ‐jopaocmu.

¹⁸E kisiec qame ʒoc fuaekac, â ʒâŋe‐ticne i ʒoaŋzi wefuocte furic râeekac irec sâc bâruŋkeekac.

¹⁹Micticnaonec ʒocbâruŋ wahaekac, erâ wâc ʒoc uucne wefuhuc iiŋkerâ raekac.

²⁰Ŋic ŋoŋe hofâ qinʒiŋ rikepie hosâc feekac irec sâc jaha hosâzi sâkenaonec wahaekac.

²¹Micrombâŋ‐ticnezi ʒoc ficneme bâruŋkeekac, â micticnaonec ʒocbâruŋ wefuekac.

²²E upe‐ticne tâpiri sâkohecte ŋic jaŋe honerâ hâwic‐jopa‐fâreekac.

²³Sahac‐ticne i aeŋ iŋucne râŋgeŋ qaŋqaŋne sasawa, irec ŋondeŋnao urucne moc mi fokac.

²⁴Maŋticne i qânâ iŋucne hâhâwic‐ticne tâmiric, i buse iŋucne takirekicne â sanaŋ qaŋqaŋne jâmbâŋ.

²⁵Lewiataŋ e fahareme ŋiczi sawa mâcne, nemu jaŋe wâc honerâ hâwic‐jopame bititie sâqoreeŋgopieŋ.

²⁶E ʒikazi qa qâpuriŋ sâcne mi ecneekac erâ damu me tepe motec me biriŋ sâkozi tâpiri‐ticne wâc mi bawahaekac.

²⁷E aeŋte maname sopâc tinac eekac, â aeŋ bâbâroŋ sanaŋnere maname jâc semune tinac eekac.

²⁸E tepe moteczi muruzo epie mi wiseekac, â qânâ wickecnepie maname gâc tinac eekac.

²⁹Qândiŋte maname siŋsiŋ tinac eekac, â ŋic jaŋe damu wickecnepie mâc gâwie‐jareekac.

³⁰Meʒârâic‐ticne i kuʒi dâkâ micnehec iŋucne, irec hata rahuc sohoŋ wiac bâdoc qâdockeekac.

³¹E hâwec hefâuckeme qaŋqaŋ eekac, â opâ ʒâkâŋko hume kuru bâbâc wefuekac.

³²E fifia bahuc rame opâzi fâuckehuc râpefuŋnao irisuckeekac, ehuc qârâhâc fuaekac.

³³Mâreŋko qowi ere sâc moc mi juŋgopieŋ, e wiac irec me irec hâhâwic moc mi bajuekac.

³⁴E qowi kâcɋene â piticne honec‐jopame wawahane efâreeŋgopieŋ, eki hâcne qowi momori sasawa jaŋere femicne juekac.”